• TVET ជាស្ពានចម្លងទន់ភ្លន់ មានភាពបត់បែន ស្របតាមស្ថានភាពជាក់ស្តែងរបស់ប្រជាពលរដ្ឋ
• TVET ប្រែក្លាយកម្លាំងពលកម្មកម្ពុជា ជាអ្នកជំនាញ ជាអ្នកបច្ចេកទេស និងជាមូលធនមនុស្ស
• កម្មវិធី TVET 1.5M មានយុវជនស្នើ​សុំ​ចុះឈ្មោះចូលរៀន​សរុប​ចំនួន ១២១ ៧២៩នាក់

ក្នុង​ឱកាស​ចូលរួមជាអធិបតី​ក្នុង​ទិវា​ជាតិ​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ លើកទី៨ កាលពីចុងសប្តាហ៍នេះ ឯកឧត្តម​បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា លើកឡើងថា ការអប់រំបណ្តុះបណ្តាល បច្ចេកទេស និងវិជ្ជាជីវៈ (TVET) គឺជាឧបករណ៍ក្នុងការប្រែក្លាយកម្លាំងពលកម្មកម្ពុជា ជាអ្នកជំនាញ ជាអ្នកបច្ចេកទេស និងជាមូលធនមនុស្ស ដែលគាំទ្រដល់ការកាត់បន្ថយនិកម្មភាពភាពក្រីក្រ និងការធ្វើ ទំនើបកម្មរចនាសម្ព័ន្ធឧស្សាហកម្មនៅកម្ពុជា ពីឧស្សាហកម្មអតិពលកម្មឈានទៅឧស្សាហកម្មផ្អែក លើជំនាញ លើកកម្ពស់កម្រិតជីវភាពប្រជាជនឱ្យកាន់តែប្រសើរ និងជំរុញកំណើនសេដ្ឋកិច្ចជាតិ។

ឯកឧត្តមឧបនាយករដ្ឋមន្រ្តី មានប្រសាសន៍ថា ការអប់រំបណ្ដុះបណ្តាលបច្ចេកទេសនិងវិជ្ជាជីវៈ គឺជាស្ពានចម្លងទន់ភ្លន់ មានភាពបត់បែន ស្របតាមស្ថានភាពជាក់ស្តែងរបស់ប្រជាពលរដ្ឋក្នុងទម្រង់ជារយៈពេលខ្លី មធ្យម និងវែង ទាំងក្នុងប្រព័ន្ធ និងក្រៅប្រព័ន្ធ ហើយអាចធ្វើឡើងនៅតាមគ្រឹះស្ថានសិក្សា សហគ្រាស សហគមន៍ និងដោយចល័ត ដែលមានប្រសិទ្ធភាពឆាប់រហ័សឆ្ពោះទៅរកការងារ និងជាផ្លូវដែលអាចបន្តការសិក្សាបានស្របពេលដែលអាចបំពេញការងារបានក្នុងពេលជាមួយគ្នា ដើម្បីស្វែងរកចំណូល និងចូលរួមចំណែកក្នុងការគាំទ្រសេដ្ឋកិច្ចគ្រួសារបាន ឬអាចបន្តការសិក្សាទៅកម្រិតខ្ពស់បន្តបន្ទាប់បានក្រោយពីផ្អាកមួយរយៈដើម្បីបំពេញការងារ។

ក្នុងនាមរាជរដ្ឋាភិបាល ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានធ្វើការ​វាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងការងារ និងបណ្តុះបណ្តាលវិជ្ជាជីវៈនិងដៃគូទាំងអស់ ដែលបានរៀបចំទិវាជាតិដ៏មានសារៈប្រយោជន៍នេះឡើង និងការសម្រេចបានសមទ្ធិផលសំខាន់ៗជាច្រើននាឆ្នាំកន្លងទៅ ដូចជា ការអភិវឌ្ឍកញ្ចប់ស្តង់ដាបណ្តុះបណ្តាល, ការទទួលស្គាល់មជ្ឈមណ្ឌលវាយតម្លៃសមត្ថភាពរបស់មជ្ឈមណ្ឌលសាធារណៈ, ការបន្តជំរុញការស្រាវជ្រាវ និងនវានុវត្តន៍ដល់គ្រឹះស្ថាន TVET, ការចុះអនុស្សរណៈនៃការយោគយល់គ្នាជាមួយសភាពាណិជ្ជកម្មកម្ពុជា និងសមាគមនិយោជកចំនួន១៧, ការទទួលបានពាន់រង្វាន់កម្រិតអន្តរជាតិរបស់វិទ្យាស្ថានជាតិពហុបច្ចេកទេសកម្ពុជា (NPIC) និងវិទ្យាស្ថានជាតិបណ្តុះបណ្តាល បច្ចេកទេស(NTTI) ពីប្រទេសសិង្ហបុរី, និងការបោះជំហានទៅមុខនៃ “កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស”។

គួរជំរាបជូនដែរថា ក្នុងយុទ្ធសាស្រ្ត​បញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា បាន​ដាក់​ចេញ​នូវ​កម្មវិធី​គោល​នយោបាយ​ជាអាទិភាព​ក្នុងការ​បណ្តុះបណ្តាល​ជំនាញវិជ្ជាជីវៈ និងបច្ចេកទេស ដល់យុវជន​គោលដៅ​មក​ពី​គ្រួសារ​ក្រីក្រ និង​គ្រួសារ​ងាយរងហានិភ័យ​នៅទូទាំង​ប្រទេស​ មានប្រមាណ ១,៥លាននាក់ (TVET 1.5M) ក្នុង​កម្រិត​សញ្ញាបត្របច្ចេកទេស និង​វិជ្ជាជីវៈ១ ដោយ​មិនបង់ថ្លៃ និង​ទទួលបាន​ប្រាក់ឧបត្ថម្ភ​ចំនួន ២៨ម៉ឺនរៀល​ក្នុងមួយខែ ដែល​ត្រូវ​បានប្រកាស​ដាក់​ឱ្យ​អនុវត្ត​ជាផ្លូវការ កាលពីថ្ងៃទី១៤ ខែវិច្ឆិកា ឆ្នាំ២០២៣។

តាមរយៈកម្មវិធីគោលនយោបាយ TVET ១លាន៥សែននាក់នេះ បើយោង​តាម​របាយការណ៍​របស់ក្រសួងការងារ និង​បណ្តុះបណ្តាលវិជ្ជាជីវៈ គិត​ត្រឹមខែឧសភា ឆ្នាំ២០២៥ មានយុវជនស្នើ​សុំ​ចុះឈ្មោះចូលរៀន​សរុប​ចំនួន ១២១ ៧២៩នាក់ (យុវជន​មក​ពី​គ្រួសារក្រីក្រ និង​គ្រួសារងាយរងហានិភ័យសរុបចំនួន ៤៩ ៣១១នាក់) និង​សិស្ស​កំពុងសិក្សា និង​បានបញ្ចប់សរុបចំនួន ៧៣ ៩០៥នាក់ (យុវជន​មក​ពីគ្រួសារក្រីក្រ និង​គ្រួសារងាយរងហានិភ័យសរុបចំនួន ៣៤ ១៣០នាក់) ក្នុងនោះ សិស្ស​ដែល​បាន​បញ្ចប់​ការ​សិក្សា​មាន​ចំនួន ៣៨ ៤៨៦នាក់ (យុវជន​មក​ពីគ្រួសារក្រីក្រ និង​គ្រួសារងាយរងហានិភ័យសរុបចំនួន ១៦ ៩៧៥នាក់)៕