ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងការស្រាវជ្រាវថ្មីៗ ដែលគេបានធ្វើការសិក្សាដោយសម្ភាសន៍អ្នកចូលរួមដែលមានវ័យចំណាស់ និងក្មេងជាង បានរកឃើញថា មិត្តភាពរវាងមនុស្សចាស់ និងមនុស្សវ័យក្មេងអាចលើកកម្ពស់ទំនាក់ទំនងរវាងមនុស្សខុសជំនាន់គ្នាក្នុងសង្គម ខណៈទំនាក់ទំនងបែបនេះផ្ដល់អត្ថប្រយោជន៍សម្រាប់ភាគីទាំងពីរ។
អ្នកជំនាញបានបង្ហាញពីអត្ថប្រយោជន៍ចំនួន ៤ នៅក្នុងការបង្កើតទំនាក់ទំនងរវាងមនុស្សមកពីជំនាន់ផ្សេងគ្នា ៖
១. អាចរៀនសូត្រពីគ្នាទៅវិញទៅមក ៖ មនុស្សវ័យចំណាស់ជាបុគ្គល ឆ្លងកាត់ដំណាក់កាលជីវិតបានច្រើន មានបទពិសោធន៍ជីវិតច្រើន មានជំនាញច្បាស់លាស់ ដឹងអំពីរបៀបអភិវឌ្ឍជំនាញ និងមានចំណេះដឹងអំពីរបៀបរបបធ្វើការ។ ដូច្នេះ មនុស្សវ័យចំណាស់អាចចែករំលែកចំណេះដឹងទាំងអស់នេះទៅកាន់មនុស្សវ័យក្មេង ខណៈមនុស្សវ័យក្មេង ក៏ជាមនុស្សដែលមានការយល់ដឹងច្រើនអំពីនិន្នាការសម័យទំនើប និងការរស់នៅក្នុងសង្គមឌីជីថល ហេតុនេះ ពួកគេក៏អាចចែករំលែកចំណេះដឹងនេះ មនុស្សវ័យចំណាស់វិញផងដែរ។
២. បង្កើតភាពរីករាយ ៖ ភាពរីករាយ និងការសើច គឺជាធាតុដ៏សំខាន់នៃការបង្កើតមិត្តភាព ។ អ្នកដែលបានចូលរួមក្នុងកិច្ចសម្ភាសន៍បានលើកឡើងថា មនុស្សវ័យចំណាស់ ហាក់ពូកែនិយាយរឿងកំប្លែង និងសម្បូររឿងនិយាយ ដើម្បីបង្កើតបរិយាកាសរីករាយ ដែលនាំឱ្យទំនាក់ទំនងពោរពេញដោយសំណើច។ ខណៈមនុស្សចាស់ ដែលបានចូលរួមសម្ភាសន៍ បានលើកឡើងថា «ខ្ញុំមិនមានអារម្មណ៍ថា ខ្លួនឯងចាស់ជាងគេនោះទេ។ តើអ្នកដឹងទេ? នៅពេលនិយាយជាមួយ មិត្តវ័យក្មេងរបស់ខ្ញុំ យើងលេងសើច និងចែករំលែករឿងកំប្លែងជាមួយគ្នា។ ខ្ញុំអាចនិយាយរឿងគ្រប់យ៉ាងជាមួយមិត្តដែលមានវ័យក្មេងជាង»។
៣. ការបង្កើតបណ្ដាញក្នុងសង្គម ៖ ការបង្កើតទំនាក់ទំនងរវាងមនុស្សក្នុងជំនាន់ផ្សេងគ្នា គឺជាប្រភពនៃការគាំទ្រ ការយកចិត្តទុកដាក់ និងផ្ដល់ជំនួយផ្សេងៗដ៏មានប្រសិទ្ធភាពបំផុត ប៉ុន្តែត្រូវបានមនុស្សជាច្រើនមើលរំលង។ មនុស្សវ័យក្មេង ដែលបានចូលរួមសម្ភាសន៍លើកឡើងថា «ការបង្កើតទំនាក់ទំនងជាមួយមនុស្សចាស់ ផ្ដល់ឱ្យគេនូវបណ្ដាញក្នុងសង្គម និងការគាំទ្រ ដែលមនុស្សវ័យក្មេងដូចគ្នាមិនអាចធ្វើបាន។ ដូច្នេះ ទំនាក់ទំនងនេះ ពិតជាសំខាន់ណាស់សម្រាប់មនុស្សវ័យក្មេង»។
៤. លុបបំបាត់ការមិនឱ្យតម្លៃមនុស្សវ័យក្មេង ៖ យោងតាមអង្គការសុខភាពពិភពលោក បានលើកឡើងថា មនុស្សម្នាក់ក្នុងចំណោម បីនាក់ បានរាយការណ៍ថា ពួកគេត្រូវបានរើសអើង និងមិនឱ្យតម្លៃពីសំណាក់មនុស្សចាស់។ ខណៈទង្វើនេះ អាចប៉ះពាល់ដល់សុខភាពផ្លូវចិត្ត ការផ្ដាច់ទំនាក់ទំនងក្នុងសង្គម និងសុខុមាលភាពទូទៅ។ ដូច្នេះ ការបង្កើតមិត្តភាពអន្តរជំនាន់ អាចកាត់បន្ថយគម្លាតរវាងមនុស្សចាស់ និងយុវវ័យ និងធ្វើឱ្យពួកគេអាចយល់ពីគ្នាបានច្រើនជាងមុន៕
