ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សមាគមនិស្សិតខ្មែរនៅសាធារណរដ្ឋកូរ៉េ នឹងរៀបចំកម្មពិធីជួបជុំ បង្ហាញសិល្បៈ វប្បធម៌ខ្មែរក្នុងឱកាសកម្មពិធីសង្រ្កាន្តឆ្នាំថ្មីដែលគ្រោងនឹងធ្វើឡើងនៅថ្ងៃទី១៩ ខែមេសា ឆ្នាំ២០២៥ ខាងមុន។
កញ្ញា ឈឿម ភីថង ប្រធានសមាគមនិសិ្សតខ្មែរ នៅសាធារណរដ្ឋកូរ៉េ បានឱ្យដឹងថា សមានិស្សិតខ្មែរនៅសាធារណរដ្ឋកូរ៉េនឹងរៀបចំពិធីអបអរសាទរបុណ្យចូលឆ្នាំប្រពៃណីខ្មែរ នៅមជ្ឈមណ្ឌលសិល្បៈខាងប៊ុក ទីក្រុងសេអ៊ូល នៃសាធារណរដ្ឋកូរ៉េ។ នៅក្នុងពិធីអបអរនេះ នឹងរំលេចឡើងនូវសកម្មភាពជាច្រើនដូចជា ការដាក់តាំងពិពណ៌ស្នាដៃសិល្បៈខ្មែរ ការសម្តែងរបាំនិងចម្រៀងប្រពៃណីខ្មែរ ការពិសារម្ហូបអាហារខ្មែរ និងសំណេះសំណាលបង្កើតភាពស្និទ្ធស្នាល សកម្មភាពរាំលេងចង្វាក់ប្រពៃណីខ្មែរ ការលេងល្បែងកំសាន្តប្រជាប្រិយខ្មែរ និងការចាប់រង្វាន់យកវត្ថុអនុស្សាវរីយ៍ ជាដើម។
បើតាម កញ្ញា ភីថង ពិធីជួបជុំនេះ នឹងមានការចូលរួមពី លោកជំទាវឯកអគ្គរាជទូតកម្ពុជាប្រចាំនៅសាធារណៈរដ្ឋកូរ៉េ មន្ត្រីស្ថានឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ, នាយក និងបុគ្គលិកមជ្ឈមណ្ឌលសិល្បៈវប្បធម៌ខាងប៊ុក បណ្ដាក្រុមហ៊ុនដៃគូសហការណ៍របស់សមាគមននិស្សិតខ្មែរនៅសាធារណរដ្ឋកូរ៉េ និងនិស្សិតខ្មែរដែលកំពុងសិក្សានៅសាធារដ្ឋកូរ៉េជាដើម។
កញ្ញា ភីថង យល់ថា ការរៀបចំកម្មវិធីនេះឡើង មិនត្រឹមតែជាវិធីមួយក្នុងការថែរក្សា និងផ្សព្វផ្សាយវប្បធម៌ ទំនៀមទម្លាប់ខ្មែរនោះទេ តែក៏ជាឱកាសល្អមួយសម្រាប់ការជួបជុំមិត្តនិស្សិត និងចែករំលែកការសប្បាយរីករាយគ្នាទៅវិញទៅមកក្រៅពីការហត់នៀយក្នុងការសិក្សា ក្នុងឱកាសរដូវការចូលឆ្នាំខ្មែរផងដែរ។
គួរបញ្ជាក់ថា កម្មវិធីនេះ នឹងជួយបង្ហាញវប្បធម៌ខ្មែរទៅកាន់ឆាកអន្តរជាតិ ជាពិសេសក្នុងសង្គមកូរ៉េ និងជួយឱ្យនិស្សិតដែលរស់នៅឆ្ងាយផ្ទះ ទទួលបានភាពរីករាយក្នុងថ្ងៃចូលឆ្នាំ និងរក្សាទំនាក់ទំនងល្អជាមួយស្ថានទូតខ្មែរ សិស្សច្បង សិស្សប្អូន ជាដើម។
តាងនាមជាប្រធានសមាគមនិស្សិតខ្មែរនៅសាធារណរដ្ឋកូរ៉េ កញ្ញា ឈឿម ភីថង សង្ឃឹមថា នឹងបន្តមានកម្មវិធីបែបនេះទៀតនាឆ្នាំក្រោយៗទៀត រួមទាំងតំបន់នានា ក្នុងសាធារណរដ្ឋកូរ៉េ ដើម្បីអាចបន្តផ្សព្វផ្សាយ និងបង្ហាញទៅកាន់ឆាកអន្តរជាតិកាន់តែច្រើន៕
