ក្នុង​ពិធីបិទ នៃកិច្ចប្រជុំកំពូល​សម្ព័ន្ធប្រតិបត្តិករ​កម្មវិធីផ្តល់​អាហារ​នៅសាលារៀន​តំបន់​អាស៊ីអាគ្នេយ៍ ឯ​ខេត្ត​សៀមរាប កាលពី​ពេលថ្មីៗនេះ ឯកឧត្តម​បណ្ឌិត​សភាចារ្យ ហង់ជួន ណារ៉ុន ឧបនាយក​រដ្ឋមន្រ្តី រដ្ឋមន្រ្តី​ក្រសួង​អប់រំ ​យុវជន និង​កីឡា មានប្រសាសន៍ថា ការផ្តល់​អាហារ​នៅ​សាលារៀន មិនត្រឹម​តែ​ដើរតួនាទី​ជាការបន្ថែម​សមាសធាតុ​អាហារូបត្ថម្ភ​ប៉ុណ្ណោះទេ តែក៏ជា​ឧបករណ៍​ដ៏មានឥទ្ធិពល​ក្នុងការរៀបចំ​អនាគត​របស់សិស្ស។

ឯកឧត្តមបណ្ឌិត​សភាចារ្យមានប្រសាសន៍បញ្ជាក់ថា កម្មវិធីផ្តល់អាហារនៅសាលារៀន​ដោយប្រើប្រាស់​កសិផល​សហគមន៍ ជាបណ្ដុំបទពិសោធន៍​ដែលបានអនុវត្ត​ជាក់ស្តែងរបស់​កម្ពុជាកន្លងមក ហើយកម្មវិធីនេះបានផ្តល់នូវផលជះវិជ្ជមានសំខាន់ៗ ដូចជា ការកែលម្អអាហារូបត្ថម្ភ ការលើកកម្ពស់លទ្ធផលការសិក្សា ការបង្កើនអត្រាចុះឈ្មោះចូលរៀន និងការចូលរៀន ការគាំទ្រដល់ផលិតកម្មកសិកម្មក្នុងស្រុក ការលើកកម្ពស់ការរួបរួមក្នុងសង្គម ការពង្រឹងការអប់រំសុខភាព និងអនាម័យ ការកាត់បន្ថយវិសមភាព និងការផ្តល់អត្ថប្រយោជន៍សេដ្ឋកិច្ចរយៈពេលវែង។ បើតាមឯកឧត្តម ហង់ជួន ណារ៉ុន ផលជះទាំងនេះ មិនត្រឹមតែដោះស្រាយតម្រូវការអាហារូបត្ថម្ភក្នុងរយៈពេលខ្លីប៉ុណ្ណោះទេ ប៉ុន្តែថែមទាំងជាមូលដ្ឋានគ្រឹះសម្រាប់កែលម្អការអប់រំ សុខភាព និងសុខុមាលភាពសហគមន៍រយៈពេលវែង ។

“ការស្វែងរកដំណោះស្រាយពីភាគីពាក់ព័ន្ធ ការចូលរួមរបស់សហគមន៍ និងការវិនិយោគរបស់រាជរដ្ឋាភិបាល ពិតជាចាំបាច់ក្នុងការអភិវឌ្ឍន៍ និងការអនុវត្តគោលនយោបាយ និងកម្មវិធីផ្តល់អាហារនៅសាលារៀនប្រកបដោយប្រសិទ្ធភាព”

ឯកឧត្តម Park Jung-Wook ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋ​កូរ៉េប្រចាំព្រះរាជា​ណាចក្រ​កម្ពុជា ក៏​បានលើកឡើងថា ការផ្តល់អាហារូបត្ថម្ភដល់កុមារ ជាអាទិភាពចម្បងនៅសាធារណរដ្ឋកូរ៉េ ហើយការផ្តល់អាហារនៅតាមសាលារៀន ត្រូវបានអនុវត្តនៅស្ទើរតែទូទាំងប្រទេស ទាំងសម្រាប់កម្រិតបឋមសិក្សា និងមធ្យមសិក្សា។ ឯកឧត្តមបន្តថា សាធារណរដ្ឋកូរ៉េ បាននិងកំពុងផ្តល់ការគាំទ្រដល់ប្រទេសមួយចំនួនក្នុងតំបន់អាស៊ី តំបន់អាហ្វ្រិក និងតំបន់អាមេរិកឡាទីន ក្នុងការអនុវត្តកម្មវិធីផ្តល់អាហារនៅសាលារៀន។

ជាមួយគ្នានេះ ឯកឧត្តម ហ្សាក់ ប៉ឺឡេ (Jacques PELLET) ឯកអគ្គរដ្ឋទូតនៃសាធារណរដ្ឋបារាំងប្រចាំព្រះរាជាណាចក្រកម្ពុជា បានលើកឡើងពីគំនិតផ្តួចផ្តើមក្នុងការបង្កើតសម្ព័ន្ធប្រតិបត្តិករកម្មវិធីផ្តល់អាហារនៅសាលារៀន ដែលមានគោលដៅក្នុងការផ្តល់ឱកាសឱ្យកុមារគ្រប់រូបទទួលបានអាហារនៅសាលារៀនប្រកបដោយអាហារូបត្ថម្ភនៅត្រឹមបំណាច់ឆ្នាំ២០៣០។ ឯកឧត្តម ហ្សាក់ ប៉ឺឡេ បន្តថា រដ្ឋាភិបាលនៃសាធារណរដ្ឋបារាំង យកចិត្តទុកដាក់ជាខ្លាំង និងបានវិនិយោគយ៉ាងច្រើនលើការផ្តល់អាហារដែលប្រកបដោយជីវជាតិ និងអាហារូបត្ថម្ភនៅសាលារៀន។

គួរ​ជំរាបជូនដែរថា ដើម្បី​ធានា​បាន​នូវ​ការ​អនុវត្ត​ប្រក្បដោយ​ប្រសិទ្ធភាព និង​និរន្តរភាព នៃការផ្តល់​អាហារ​តាម​សាលា​រៀនស្របតាម​ចក្ខុវិស័យជាតិ រាជរដ្ឋាភិបាល​កម្ពុជា បានដាក់ចេញនូវគោលនយោបាយ​ជាច្រើន ដូចជា គោលនយោបាយ​ជាតិស្តីពីសុខភាពសិក្សា, យុទ្ធសាស្រ្តជាតិស្តីពីសន្តិសុខស្បៀង និងអាហារូបត្ថម្ភ, គោលនយោបាយស្តីពីការផ្តល់អាហារតាមសាលារៀនឆ្នាំ២០២៤-២០៣៥ និងក្របខ័ណ្ឌគោលនយោបាយជាតិគាំពារសង្គមឆ្នាំ២០១៦-២០២៥ ព្រមទាំងការបង្កើតទិវាជាតិអាហារូបត្ថម្ភ​ជាដើម៕