វិទ្យាស្ថានជាតិអប់រំ បានសម្រេច​ដាក់បញ្ចូលស្តង់ដាសាលាមធ្យមសិក្សាសាធារណៈគំរូទៅក្នុងកម្មវិធីបណ្តុះបណ្តាលគ្រូបង្រៀន ក្នុងគោលបំណងផ្សារភ្ជាប់ការអប់រំគ្រូបង្រៀនទៅនឹងសាលារៀន តាមរយៈការបន្ស៊ីទ្រឹស្តីទៅនឹងការអនុវត្តជាក់ស្ដែង។

ក្នុងកិច្ចប្រជុំក្រុមប្រឹក្សាភិបាលនៃវិទ្យាស្ថានជាតិអប់រំ ស្ដីពីវឌ្ឍនភាពនៃការអនុវត្ដក្របខណ្ឌកម្មវិធីកំណែទម្រង់គរុកោសល្យ កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន​ ណារ៉ុន ឧបនាយកមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា គរុនិស្សិតដែលកំពុងទទួលការបណ្ដុះបណ្តាលនៅវិទ្យាស្ថានជាតិអប់រំ ត្រូវបានតម្រូវឱ្យចុះគាំទ្រសាលាសហការ និងសាលាអនុវត្តលើស្តង់ដាទី២ (ការបង្រៀន និងរៀន) នៅរាជធានីភ្នំពេញ និងខេត្តកណ្តាល។ ឯកឧត្តមបណ្ឌិតសភាចារ្យ បន្តថា ការចុះគាំទ្រសាលារៀនមានគោលបំណង រួមមាន (១). អនុវត្តវិធីសាស្ត្របង្រៀនតាមទ្រឹស្តីអប់រំបែបស្ថាបនានិយម ដើម្បីលើកកម្ពស់បំណិនសតវត្សរ៍ទី២១ ដល់សិស្សានុសិស្ស (២). អនុវត្តការធ្វើពិសោធន៍វិទ្យាសាស្ត្រ និងការអប់រំស្ទែមនៅកម្រិតវិទ្យាល័យ (៣). អនុវត្តក្លឹបសិក្សា កិច្ចការគម្រោង និងការតាំងពិព័រណ៍វិទ្យាសាស្ត្រនៅវិទ្យាល័យ។

រដ្ឋមន្រ្តីក្រសួងអប់រំ ក៏បានផ្ដល់អនុសាសន៍បន្ថែមថា ត្រូវបង្កើតយន្តការសិក្សា និងវាយតម្លៃឯករាជ្យចំពោះគរុនិស្សិតចេញបង្រៀន និងត្រូវមានប្រព័ន្ធតាមដានដើម្បីត្រួតពិនិត្យមើលជាប្រចាំថា ក្រោយបញ្ចប់ការបណ្ដុះបណ្ដាល គរុនិស្សិតមានសមត្ថភាពបំពេញភារកិច្ចការងារបានល្អកម្រិតណា? វិធីសាស្ត្របង្រៀនត្រូវឆ្លើយតបនឹងស្តង់ដាសាលារៀនគំរូ និងកម្មវិធីក្រៅម៉ោងសិក្សា ហើយត្រូវបណ្តុះបណ្តាលវិធីសាស្ត្របង្រៀនថ្មីៗតាមបែបសាលារៀនជំនាន់ថ្មី។

លោកស្រីបណ្ឌិត ឃួន វិច្ឆិកា អ្នកនាំពាក្យក្រសួអប់រំ យុវជន និងកីឡា មានប្រសាសន៍ថា ស្តង់ដារសាលារៀនគំរូ គឺជាស្តង់ដារដែលក្រសួងអប់រំ​ យុវជន និងកីឡា បានដាក់ឱ្យប្រើប្រាស់ក្នុងដើមឆ្នាំសិក្សា២០២៣-២០២៤ ក្នុងគោលដៅសំខាន់ក្នុងការកសាងមូលធនមនុស្សជាពលរដ្ឋពេញលេញ និងភាពជាពលរដ្ឋសកល ក៏ដូចជាធ្វើយ៉ាងណាដើម្បីធានាការផ្ដល់សេវាអប់រំប្រកបដោយគុណភាព ក្នុងន័យនេះ គឺដើម្បីអភិវឌ្ឍសាលារៀនដើម្បីឱ្យក្លាយជាគ្រឹះស្ថានផ្ដល់ការសិក្សាប្រកបដោយគុណភាព។

អ្នកនាំពាក្យក្រសួអប់រំ បញ្ជាក់បន្ថែមថា ការដែលបុគ្គលិកទាំងអស់បានដឹងអំពីគោលនយោបាយរបស់រាជរដ្ឋាភិបាលរបស់ក្រសួង និងអ្វីដែលជាចំណុចអាទិភាពក្នុងការអនុវត្តនៅតាមសាលារៀន គឺជារឿងមួយសំខាន់ ដើម្បីឱ្យគាត់អាចប្រើប្រាស់តួនាទី និងភារកិច្ចការងារនៅតាមទីតាំងក្នុងការចូលរួមក្នុងការជំរុញធ្វើយ៉ាងណាឱ្យសាលារៀននៅទូទាំងប្រទេសអាចសម្រេចបាននូវស្ដង់ដាសាលារៀនគំរូ។ ទន្ទឹមគ្នានេះ ស្តង់ដារសាលារៀនគំរូនេះអាចសម្រេចទៅបានទាមទារឱ្យមានការចូលរួមទាំងអស់គ្នា ជាពិសេសគរុនិស្សិតដែលជាអនាគតគ្រូបង្រៀន សុទ្ធតែជាតួអង្គសំខាន់ក្នុងការចូលរួមសម្រេចគោលដៅនេះ។  

បើតាមការបញ្ជាក់របស់ លោកស្រីបណ្ឌិត ឃួន វិច្ឆិកា ចំណុចស្នូលសំខាន់នៃសាលារៀនគំរូនេះមានចំនួន៥ រួមមាន ១. លទ្ធផលសិក្សារបស់សិស្ស ២. ការរៀន និងបង្រៀន ៣. ការចូលរួមរបស់សហគមន៍ ៤. ការប្រតិបត្តិការ និងរដ្ឋបាលសាលារៀន ៥. គណនេយ្យភាពសាលារៀន។ ដូច្នេះ ចំណុចទាំងនេះ គឺជាអ្វីដែលគ្រឹះស្ថានបណ្ដុះបណ្ដាលគ្រូទាំងអស់នឹងយកទៅបណ្ដុះបណ្ដាលដើម្បីឱ្យគរុនិស្សិតបានដឹងអំឡុងពេលនៅរៀន ដើម្បីត្រៀមលក្ខណៈចូលរួមយ៉ាងពេញលេញ ក៏ដូចជាយល់ច្បាស់អំពីគោលនយោបាយដែលអនុវត្តនៅតាមសាលារៀន ព្រមទាំងធ្វើយ៉ាងណាឱ្យសាលារៀនដែលគាត់ទៅបង្រៀននៅពេលអនាគតក្លាយទៅជាសាលាដែលមានស្តង់ដារសាលាគំរូ៕