ឈានមកដល់ការរំឮក ឬការជជែកអំពីការប្តេជ្ញាចិត្តសម្រាប់ចាប់ផ្តើមដំណើរជីវិតនៅឆ្នាំថ្មី មនុស្សផ្តោតលើការពង្រឹងសកម្មភាពមួយចំនួនដូចជា ទម្លាប់ហាត់ប្រាណប្រចាំថ្ងៃ ការជ្រើសប្រភេទអាហារមានសារធាតុចិញ្ចឹមទៅកាន់រាងកាយ គុណភាពនៃការគេង និងការគ្រប់គ្រងស្រ្តេសជាដើម។ ការប្តេជ្ញាច្រើនរូបភាពបែបនេះ គោលដៅរួម គឺថែទាំសុខភាពខ្លួនឯងឱ្យបានល្អ ដើម្បីមានថាមពលគ្រប់គ្រាន់ទៅអភិវឌ្ឍន៍សមត្ថភាពផ្នែកជំនាញរៀងៗខ្លួន, ប៉ុន្តែពួកគេហាក់ភ្លេចថា គ្រាន់តែមានទម្លាប់ពិសាទឹកបានគ្រប់គ្រាន់រៀងរាល់ថ្ងៃ ក៏បានរួមចំណែកដល់ការថែទាំរាងកាយ និងផ្លូវចិត្តមួយផ្នែកធំបាត់ទៅហើយ។

តាមរយៈគេហទំព័រ Earth បានឱ្យដឹងថា អត្ថប្រយោជន៍ជារួមដែលទទួលបានពីការទទួលទានទឹកបានគ្រប់គ្រាន់ក្នុងការទ្រទ្រង់រាងកាយគឺ សម្រួសដល់ដំណើរការសរសៃឈាម ការរួមចំណែកបន្ថយសម្ពាធឈឺចាប់អ្នកមានជំងឺទឹកនោមផ្អែម បង្កើនភាពស្រស់ស្រាយ និងស្បែកមានសុខភាពល្អជាដើម​ មួយវិញទៀត ការររក្សាជាតិទឹកទៅក្នុងរាងកាយជំរុញឱ្យភាពងាយស្រួលក្នុងរបៀបរស់នៅដូចជាការបន្ទោបង់ប្រចាំថ្ងៃ និងជៀសវាងពីជំងឺនានា។ គេអាចសង្កេតអាការខ្វះជាតិទឹកដោយខ្លួនឯងតាមរយៈវិធីសាមញ្ញៗដូចជា ស្បែកស្ងួតមានប្រេះនៅបបូរមាត់ ទឹកនោមមានព័ណ៌លឿង ឬខាប់ ស្រេកទឹក (កុំចាំទាល់តែស្រេកទើបបរិភោគ ព្រោះវាជាសញ្ញាបង្ហាញថារាងកាយខ្វះទឹក) ឬកត់សម្គាល់តាមរយៈភាពសោះកក្រោះជាដើម។

វិធីសាស្រ្តនៃការទទួលទានទឹកដោយមិនបង្ខំចិត្ត

ជាទូទៅ ការទម្លាប់ខ្លួនទៅនឹងទម្លាប់ថ្មីៗណាមួយ ពុំមែនជារឿងងាយស្រួលប៉ុន្មានទេ តែយ៉ាងណា ដើម្បីទម្លាប់ខ្លួនឱ្យព្យាយាមទទួលទានទឹកប្រចាំថ្ងៃ ដោយមិនមានការបង្ខិតបង្ខំខ្លួនឯង លោកអ្នកអាចសាកល្បងតាមរយៈវិធីសាស្រ្តខាងក្រោម៤ដូចតទៅ ៖

១. មុនពេលចាប់កាន់កែវកាហ្វេ ៖ កាហ្វេជាភេសជ្ជដ៏ពេញនិយមដែលមនុស្សទទួលទានក្នុងគោលដៅបង្កើនថាមពលមុនចាប់ផ្តើមថ្ងៃថ្មី ខណៈកាហ្វេក៏ជាផ្នែកមួយច្រោះជាតិទឹកខ្លាំងចេញពីក្នុងខ្លួន ដែលជាហេតុតម្រូវឱ្យមានការទទួលទានទឹកឱ្យបានច្រើនទ្វេដង។ ហើយដើម្បីជំរុញខ្លួនឯងឱ្យមានទម្លាក់ទទួលទានទឹកបានទៀតទាត់ កំឡុងពេលរង់ចាំកែវកាហ្វេដែលកំពុងតែឆុង គួររៀនទម្លាប់ទទួលទានទឹកឱ្យអស់មួយកែវ សកម្មភាពបែបនេះ មិនត្រឹមតែជាការរុញខ្លួនឯងឱ្យមានទម្លាប់ល្អប៉ុណ្ណោះទេ ប៉ុន្តែជាការចាប់ផ្តើមថ្ងៃថ្មីប្រកបដោយភាពស្រស់បស់ផងដែរ។

២. ការធ្វើកំហាត់ប្រាណ ៖ មិនថាដើរនៅលើសួនសាធារណៈ ឬដើរលេងនៅតាមផ្លូវ ឬក៏ពេលទៅធ្វើលំហាត់ប្រាណនោះទេ ការកាន់ដបដែលមានទឹកសម្រាប់ពិសានៅជាប់ដៃ ជាជំណែកមួយបំផុសការទទួលទានទឹកក្នុងចំនួនមួយកាន់តែច្រើនឡើងៗ។ ហើយកំឡុងពេលរាងកាយធ្វើចលនាទៀតសោធ ចំណង់នៃការពិសាទឹកក៏កាន់តែកើនមានដូចគ្នា ដែលធ្វើឱ្យភ្លេចៗខ្លួន ក៏ពិសាសទឹកអស់ពីដបតែម្តង។ ការរក្សាជាតិទឹកពេលធ្វើចលនា ចាត់ថាជាវិធីមួយដ៏មានភាពឈ្លាសវាងវៃ។

៣. កំឡុងពេលសម្រាកទទួលទានអាហារថ្ងៃត្រង់ ៖ របៀបនៃការទទួលទានអាហារថ្ងៃត្រង់មានច្រើនបែប ដោយឡែកអ្នកខ្លះប្រើប្រាស់ពេលចម្អិនអាហារ អ្នកខ្លះកម្ដៅ ឬអ្នកមួយចំនួនទៀតទៅបរិភោគនៅភោជនីយដ្ឋាន មិនថា កំឡុងពេលសម្រាកទទួលទានអាហារថ្ងៃត្រង់តាមរបៀបណាទេ កំឡុងពេលរង់ចាំអាហារឆ្អិន ឬការយកអាហារមកដាក់លើតុ គួរឆ្លៀតឱកាសនេះទទួលទានទឹកឱ្យបានយ៉ាងហោចណាស់មួយកែវសិន ដែលនេះជាវិធីមួយមានភាពសាមញ្ញ និងរក្សាបាននូវភាពទៀងទាត់ផងដែរ។

៤. ដាក់ដបទឹកនៅលើតុធ្វើការ ៖ សម្រាប់អ្នកប្រើប្រាស់ពេលមិនតិចជាង៣ម៉ោង ក្នុងការអង្គុយធ្វើការ គួរតែមានដបទឹកនៅក្បែរខ្លួនជានិច្ច មូលហេតុដែលលើកទឹកចិត្តឱ្យអនុវត្តន៍បែបនេះ មិនត្រឹមតែជំរុញខ្លួនឯងឱ្យទទួលទានទឹកឱ្យបានច្រើននោះទេ ប៉ុន្តែបានរួមចំណែកឱ្យខួរក្បាល និងរាងកាយមានភាពស្រស់បំព្រងផងដែរ។ តាមរយៈវិធីសាមញ្ញៗទាំងនេះ បានផ្តល់នូវភាពងាយស្រួលក្នុងការជំរុញឱ្យខ្លួនឯងកាន់តែមានទម្លាប់ទទួលទានទឹកបានច្រើនជាងមុន រួមទាំងការរក្សាទម្លាប់ថែទាំសុខភាពផ្លូវកាយ និងផ្លូវចិត្តក្នុងរយៈពេលវែង៕