ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងសុខាភិបាលបានដាក់ជំងឺគ្រុនឈាមឱ្យស្ថិតក្រោមការតាមដានប្រុងប្រយ័ត្នខ្ពស់ និងពង្រឹងការឆ្លើយតបនៅទូទាំងប្រទេស ខណៈជំងឺនេះកំពុងមាននិន្នាការកើនឡើងស្របពេលរដូវវស្សា ដោយគិតត្រឹមឆ្នាំ២០២៤ កម្ពុជាបានរកឃើញអ្នកឆ្លងប្រមាណ ១២,០០០ករណី។
លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល បានប្រាប់ AMS ថា បច្ចុប្បន្នស្ថានភាពជំងឺគ្រុនឈាមកំពុងស្ថិតក្រោមការតាមដានយ៉ាងម៉ត់ចត់ និងការឆ្លើយតបយ៉ាងសកម្មពីក្រសួងសុខាភិបាល ដើម្បីទប់ស្កាត់ការរីករាលដាលឱ្យបានទាន់ពេលវេលា។
លោកបានឱ្យដឹងថា ទោះបីចំនួនអ្នកជំងឺសរុបប្រហាក់ប្រហែលនឹងឆ្នាំមុនក៏ដោយ ករណីឆ្លងកំពុងកើនឡើងរាយប៉ាយនៅតាមតំបន់ភូមិសាស្ត្រជាច្រើន ដែលទាមទារឱ្យអាជ្ញាធរ ស្ថាប័នសុខាភិបាល និងប្រជាពលរដ្ឋ បង្កើនការប្រុងប្រយ័ត្នជាពិសេសក្នុងអំឡុងរដូវវស្សា។
លោកវេជ្ជបណ្ឌិត ហ៊ុយ រ៉េកុល បញ្ជាក់ថា កត្តាសំខាន់ដែលធ្វើឱ្យការគ្រប់គ្រងជំងឺគ្រុនឈាមមានប្រសិទ្ធភាព រួមមានការគាំទ្រពេញទំហឹងពីថ្នាក់ដឹកនាំក្រសួងសុខាភិបាល និងរដ្ឋបាលរាជធានី-ខេត្ត ការផ្គត់ផ្គង់សេរ៉ូម អាបែត ថ្នាំបាញ់មូស និងសម្ភារៈចាំបាច់ឱ្យបានគ្រប់គ្រាន់ ព្រមទាំងប្រព័ន្ធតាមដានជំងឺដែលអាចរកឃើញ និងឆ្លើយតបចំពោះការផ្ទុះជំងឺបានយ៉ាងឆាប់រហ័ស។
លោកបន្ថែមថា ក្រសួងក៏កំពុងពង្រឹងកិច្ចសហការរវាងថ្នាក់ជាតិ និងថ្នាក់ក្រោមជាតិ ក្នុងការស៊ើបអង្កេតករណីស្លាប់ ការតាមដានការរាតត្បាត និងជំរុញឱ្យប្រជាពលរដ្ឋដែលមានរោគសញ្ញាសង្ស័យជំងឺគ្រុនឈាម ទៅពិនិត្យ និងព្យាបាលនៅមន្ទីរពេទ្យរដ្ឋឱ្យបានក្នុងរយៈពេល ៤៨ម៉ោង បន្ទាប់ពីចាប់ផ្តើមមានរោគសញ្ញា ដើម្បីកាត់បន្ថយហានិភ័យនៃផលវិបាកធ្ងន់ធ្ងរ។
ក្រសួងសុខាភិបាលបានបញ្ជាក់ថា រដូវវស្សាបង្កឱ្យមានវត្ថុដក់ទឹកកើនឡើង ដែលជាប្រភពបង្កបង្កើតមូសខ្លា ខណៈការប្រែប្រួលអាកាសធាតុ និងឥទ្ធិពលបាតុភូត El Niño ក៏អាចជំរុញឱ្យចំនួនមូសខ្លា និងការឆ្លងជំងឺគ្រុនឈាមកើនឡើងផងដែរ។
ក្រសួងបានអំពាវនាវឱ្យប្រជាពលរដ្ឋ អាជ្ញាធរមូលដ្ឋាន សហគមន៍ ម្ចាស់ការដ្ឋានសំណង់ និងអាជីវករលក់សំបកកង់ ចូលរួមលុបបំបាត់ប្រភពដក់ទឹក ដោយផ្លាស់ប្តូរទឹកក្នុងពាង អាងទឹក ថូផ្កា និងធុងស្តុកទឹកជាប្រចាំ បិទគម្របធុងទឹកឱ្យជិត កម្ចាត់វត្ថុដែលអាចដក់ទឹក និងសហការជាមួយមន្ត្រីសុខាភិបាលក្នុងការដាក់ថ្នាំសម្លាប់ដង្កូវទឹក។
ជាមួយគ្នានេះ ក្រសួងបានក្រើនរំលឹកថា ប្រសិនបើមានរោគសញ្ញាគ្រុនក្តៅខ្លាំងភ្លាមៗ ចន្លោះពី ៣៩ ដល់ ៤០អង្សាសេ ឬសង្ស័យថាឆ្លងជំងឺគ្រុនឈាម ត្រូវទៅទទួលការពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតបំផុតឱ្យបានឆាប់រហ័ស។
ក្រសួងសុខាភិបាលក៏បានអំពាវនាវឱ្យសាធារណជនបន្តអនុវត្តពាក្យស្លោក «ខ្ញុំ និងគ្រួសារខ្ញុំ ជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក» ដើម្បីរួមគ្នាកាត់បន្ថយប្រភពកំណើតមូសខ្លា និងទប់ស្កាត់ការរីករាលដាល នៃជំងឺគ្រុនឈាមនៅទូទាំងប្រទេស៕
