ក្រុមអ្នកស្រាវជ្រាវនៅសាកលវិទ្យាល័យ Graz នៃប្រទេសអូទ្រីស បានវិភាគទៅលើឥទ្ធិពលនៃការធ្វើលំហាត់ប្រាណជាទៀងទាត់ ទៅលើសមត្ថភាពស្រមើស្រមៃ និងភាពច្នៃប្រឌិតរបស់មនុស្ស។ គេបានរកឃើញទំនាក់ទំនងយ៉ាងស៊ីជម្រៅរវាងការហាត់ប្រាណ ជាមួយនឹងសុខភាពអារម្មណ៍វិជ្ជមាន និងការគិតប្រកបដោយភាពច្នៃប្រឌិត។ ជាទូទៅ ប្រសិនបើការរបស់នៅរបស់អ្នកសកម្មជាងមុន មានន័យថា អ្នកនឹងមានភាពច្នៃប្រឌិតខ្ពស់ជាងមុន។

អ្នកជំនាញបានសិក្សាទៅលើក្រុមមនុស្សពេញវ័យ ៧៩នាក់ ដែលមានអាយុចន្លោះពី ១៨ ទៅ ៣៣ឆ្នាំ ក្នុងរយៈពេល ៥ថ្ងៃ ដោយតម្រូវឱ្យពួកគេធ្វើចលនារាងកាយជារៀងរាល់ថ្ងៃ។ អ្នកចូលរួមទាំងអស់ ក៏តម្រូវឱ្យធ្វើតេស្តវាយតម្លៃអំពីកម្រិត នៃភាពច្នៃប្រឌិត និងកម្រិតវិជ្ជមាននៃអារម្មណ៍ក្នុងរយៈពេល ៥ថ្ងៃនោះដែរ។ ជាលទ្ធផល កម្រិតនៃភាពច្នៃប្រឌិត និងអារម្មណ៍វិជ្ជមានរបស់ចូលរួមគឺល្អប្រសើរជាងមុនពេលចូលរួម ព្រោះនៅពេលហាត់ប្រាណជាទៀងទាត់បានជំរុញការបញ្ចេញនូវអរម៉ូន endorphins ដែលជំរុញការកើនឡើងលំហូរឈាម និងលក្ខណៈរាងកាយផ្សេងទៀត ធ្វើឱ្យអ្នកមានអារម្មណ៍ល្អ និងជំរុញការគិតឱ្យកាន់តែប្រសើរឡើង។

ក្រៅជួយជំរុញគំនិតច្នៃប្រឌិត ការធ្វើលំហាត់ប្រាណ ក៏ធ្វើឱ្យស្ថានភាពផ្លូវចិត្តប្រសើរឡើងផងដែរ។ ការចេញក្រៅ ធ្វើចលនារាងកាយដូចជា ដើរ រត់ ជិះកង់ និងហែលទឹកជាដើម អាចកាត់បន្ថយហានិភ័យនៃជំងឺវង្វេង និងជំងឺធ្លាក់ទឹកចិត្ត។ អ្នកជំនាញបញ្ជាក់ថា ការហាត់ប្រាណគឺជាវិធីសាស្ត្រដ៏ល្អ ក្នុងការកាត់បន្ថយបន្ទុកសុខភាពផ្លូវចិត្តលើបុគ្គលម្នាក់ៗ និងកាត់បន្ថយការចំណាយលើការថែទាំសុខភាព ជាពិសេសសុខភាពផ្លូវចិត្ត។

យោងតាមការប៉ានស្មានរបស់អង្គការសុខភាពពិភពលោកក្នុងឆ្នាំ២០១៩ បានឱ្យដឹងថា មនុស្សប្រហែល ២៦៤នាក់ ស្ថិតក្នុងអត្រា ៣,៥ ភាគរយនៃចំនួនប្រជាជនពិភពលោក កំពុងធ្លាក់ទៅក្នុងវិបត្តិសុខភាពផ្លូវចិត្ត។​ ក្នុងនោះចំនួនស្ត្រីមានច្រើនជាងបុរស។ ដូច្នេះហើយ ការទប់ស្កាត់បញ្ហាសុខភាពផ្លូវចិត្តពិតជាមានសារៈសំខាន់សម្រាប់មនុស្សសម័យថ្មី៕