ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកអ្នកប្រាកដជាធ្លាប់បានឮដំបូន្មានជាញឹកញាប់មកហើយថា ត្រូវញ៉ាំទឹកឱ្យបានយ៉ាងហោចណាស់ ៨ កែវក្នុងមួយថ្ងៃ ដើម្បីឱ្យខួរក្បាល និងរាងកាយដំណើរការបានល្អ។ ប៉ុន្តែ លោកវេជ្ជបណ្ឌិត Sean Hashmi ឯកទេសរោគធាត់ និងវេជ្ជសាស្ត្រគ្រួសារ នៅមណ្ឌល Kaiser Permanente នៃរដ្ឋកាលីហ្វ័រញ៉ា បានកត់សម្គាល់ថា មនុស្សភាគច្រើនតែងតែយល់ច្រឡំថាមានតែការញ៉ាំទឹកមួយមុខទើបអាចបំពេញជាតិទឹកបាន តាមពិតទៅ «របបអាហារដែលអ្នកញ៉ាំជារៀងរាល់ថ្ងៃ ក៏ដើរតួនាទីយ៉ាងសំខាន់ក្នុងការផ្តល់ជាតិទឹកដល់រាងកាយផងដែរ»។
ការញ៉ាំរបបអាហារដែលមានតុល្យភាព និងសម្បូរទៅដោយបន្លែ ផ្លែឈើ អាចផ្តល់ជាតិទឹកដល់ទៅ ២០ ភាគរយ នៃតម្រូវការជាតិទឹកប្រចាំថ្ងៃរបស់រាងកាយ។ មិនតែប៉ុណ្ណោះ វាថែមទាំងផ្តល់នូវវីតាមីន និងជាតិសរសៃ (Fiber) យ៉ាងច្រើនទៀតផង។
ដើម្បីជួយដល់ការជ្រើសរើសរបបអាហារប្រចាំថ្ងៃ អ្នកជំនាញបានណែនាំបន្លែ និងផ្លែឈើចំនួន ៥ ប្រភេទ ដែលមានជាតិទឹកខ្ពស់បំផុត និងងាយស្រួលរកទិញនៅលើទីផ្សារប្រទេសយើង ៖
១. ត្រសក់
ត្រសក់គឺជាបន្លែដែលមានជាតិទឹកខ្ពស់បំផុតមួយ ដោយវាមានផ្ទុកជាតិទឹករហូតដល់ទៅជាង ៩៥ ភាគរយ។ ក្រៅពីយកទៅស្ល ឬធ្វើជាបន្លែ លោកអ្នកអាចច្នៃវាធ្វើជាអាហារសម្រន់ ដោយហាន់ជាបន្ទះៗញ៉ាំជាមួយទឹកជ្រលក់ ឬទឹកគ្រឿង ដើម្បីជំនួសឱ្យការញ៉ាំដំឡូងបារាំងបំពង។
២. ឪឡឹក
ឪឡឹកមានជាតិទឹកខ្ពស់ និងមានកាឡូរីទាប (ត្រឹមតែ ៤៦ កាឡូរីប៉ុណ្ណោះក្នុងមួយពែង)។ វាជាជម្រើសដ៏ល្អឥតខ្ចោះសម្រាប់ញ៉ាំលាងមាត់ ឬធ្វើជាសាឡាត់ផ្លែឈើ លាយជាមួយស្លឹកជីអង្កាម ដើម្បីបង្កើនរសជាតិ និងផ្តល់ភាពស្រស់ស្រាយនៅពេលមានអាកាសធាតុក្តៅ។
៣. ស្ពៃក្តោប
ទោះបីជាបន្លែបៃតងស្ទើរតែគ្រប់ប្រភេទសុទ្ធតែមានជាតិទឹកក៏ដោយ ប៉ុន្តែស្ពៃក្តោប មានជាតិទឹកខ្ពស់ជាងគេ បើធៀបនឹងទម្ងន់ ពោលគឺមានរហូតដល់ ៩៦ ភាគរយ។ ក្រៅពីធ្វើជាសាឡាត់ លោកអ្នកអាចប្រើសន្លឹកស្ពៃនេះមកខ្ចប់សាច់អាំង។
៤. ផ្លែប៉េងប៉ោះ
ប៉េងប៉ោះមានផ្ទុកជាតិទឹកប្រហែល ៩៤ ភាគរយ និងសម្បូរទៅដោយសារធាតុប៉ូតាស្យូម (២៩២ មីលីក្រាម ក្នុងប៉េងប៉ោះទំហំមធ្យមមួយផ្លែ)។ ប៉េងប៉ោះជាបន្លែដែលងាយស្រួលចម្អិន និងច្នៃបានច្រើនមុខ មិនថាយកទៅធ្វើទឹកជ្រលក់ ឆា ស្ល ឬគ្រាន់តែហាន់ជាចំណិតស្តើងៗ រួចរោយអំបិល និងម្រេចបន្តិច ក៏មានរសជាតិឆ្ងាញ់បាត់ទៅហើយ។
៥. ម្ទេសប្លោក
ម្ទេសប្លោក (ពណ៌បៃតង ក្រហម លឿង) មានជាតិទឹកប្រហែល ៩២ ភាគរយ។ លោកអ្នកអាចហាន់វាជាដុំតូចៗដើម្បីបន្ថែមភាពស្រួយនៅក្នុងសាឡាត់ ឬហាន់ជាកង់ធំៗសម្រាប់ជ្រលក់ជាមួយទឹកគ្រឿងផ្សេងៗ។
ទោះជាយ៉ាងណាក៏ដោយ អ្នកជំនាញបានផុ្តល់ដំបូន្មានថា ”ទោះបីជាការញ៉ាំបន្លែផ្លែឈើខាងលើនេះមានផ្តល់ជាតិទឹកក៏ដោយ តែសូមកុំប្រើវាធ្វើជាលេសដើម្បីកាត់បន្ថយការញ៉ាំទឹកស្អាតឱ្យសោះ”។ វិធីសាស្ត្រដែលល្អបំផុតគឺ ការញ៉ាំបន្លែផ្លែឈើទាំងនេះ រួមផ្សំជាមួយនឹងការញ៉ាំទឹកស្អាតឱ្យបានទៀងទាត់ជារៀងរាល់ថ្ងៃ ដើម្បីធានាថា រាងកាយរបស់អ្នកមានជាតិទឹកគ្រប់គ្រាន់ និងមានសុខភាពមាំមួនជានិច្ច៕
