ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្ពុជាបានអំពាវនាវឱ្យសហគមន៍អន្តរជាតិពង្រឹងការអនុវត្តច្បាប់អន្តរជាតិ ដើម្បីការពារកុមារក្នុងជម្លោះប្រដាប់អាវុធ ខណៈបានជម្រាបទៅកាន់វេទិកាអង្គការសហប្រជាជាតិថា កុមារជាង ៦,៤០០នាក់ នៅកម្ពុជានៅតែស្ថិតក្នុងស្ថានភាពភៀសសឹក និងត្រូវការការការពារ ជាពិសេសការធានាសិទ្ធិទទួលបានការអប់រំ និងជំនួយមនុស្សធម៌។
ការអំពាវនាវនេះត្រូវបានធ្វើឡើងដោយឯកឧត្ដម កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ (អ.ស.ប.) ក្នុងកិច្ចពិភាក្សាបើកចំហរបស់ក្រុមប្រឹក្សាសន្តិសុខ អ.ស.ប. ស្តីពី «កុមារ និងជម្លោះប្រដាប់អាវុធ» នៅទីក្រុងញូវយ៉ក កាលពីថ្ងៃទី២៥ ខែមិថុនា ឆ្នាំ២០២៦។
ក្នុងកិច្ចថ្លែងការណ៍ ឯកឧត្តមបានសម្ដែងការព្រួយបារម្ភយ៉ាងខ្លាំងចំពោះការកើនឡើងនៃការរំលោភបំពានធ្ងន់ធ្ងរលើកុមារក្នុងតំបន់ជម្លោះ និងអំពាវនាវឱ្យគ្រប់ភាគីគោរព និងអនុវត្តកាតព្វកិច្ចក្រោមច្បាប់មនុស្សធម៌អន្តរជាតិ និងច្បាប់សិទ្ធិមនុស្សអន្តរជាតិឱ្យបានពេញលេញ ដើម្បីធានាសុវត្ថិភាព និងសិទ្ធិរបស់កុមារ។
ឯកឧត្ដមបានបញ្ជាក់ថា កុមារជាង ៦,៤០០នាក់ នៅកម្ពុជានៅតែបន្តភៀសសឹក ហើយបានគូសបញ្ជាក់ពីសារៈសំខាន់នៃការធានាសិទ្ធិទទួលបានការអប់រំ តាមរយៈគំនិតផ្ដួចផ្ដើម «សាលារៀនបណ្ដោះអាសន្ននៅជំរំ» ដើម្បីឱ្យកុមារភៀសសឹកអាចបន្តការសិក្សាបាន ទោះស្ថិតក្នុងស្ថានភាពអាសន្នក៏ដោយ។
ទន្ទឹមនឹងនេះ កម្ពុជាក៏បានអំពាវនាវឱ្យមានការផ្តល់ជំនួយមនុស្សធម៌ដែលផ្តោតលើតម្រូវការរបស់កុមារ ដើម្បីជួយកុមារដែលរងផលប៉ះពាល់ពីជម្លោះ។
ឯកឧត្តម កែវ ឈា បានបញ្ជាក់ថា កម្ពុជានឹងបន្តសហការជាមួយអង្គការសហប្រជាជាតិ និងដៃគូអន្តរជាតិទាំងអស់ ដើម្បីធានាថា កុមារគ្រប់រូបអាចរស់នៅ សិក្សា និងរីកចម្រើន ដោយគ្មានអំពើហិង្សា និងការភ័យខ្លាច។
សូមជម្រាបថា «សាលារៀនបណ្ដោះអាសន្ននៅជំរំ» គឺជាគំនិតផ្ដួចផ្ដើមរបស់ក្រសួងអប់រំ យុវជន និងកីឡា សម្រាប់ផ្ដល់ការអប់រំដល់កុមារភៀសសឹក។ ឯកឧត្តមបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា អាជ្ញាធរមូលដ្ឋាន រួមជាមួយដៃគូអភិវឌ្ឍន៍ បានចុះត្រួតពិនិត្យការអនុវត្តកម្មវិធីនេះជាបន្តបន្ទាប់ ដើម្បីធានាថា កុមារដែលត្រូវភៀសខ្លួននៅតែអាចបន្តការសិក្សាបាន ទោះស្ថិតក្នុងស្ថានភាពលំបាក និងត្រូវចាកចេញពីលំនៅឋានក៏ដោយ៕
