​ទិន្នន័យ​ចំណាត់ថ្នាក់​ប្រព័ន្ធ​អប់រំ​ពិភពលោក​ឆ្នាំ​២០២៦​ ​(​Education​ ​Rankings​ ​by​ ​Country​ ​2026​) ​ចេញផ្សាយ​ដោយ​ ​World​ ​Population​ ​Review​ ​បាន​បង្ហាញ​ថា​ ​ប្រទេស​ដាណឺម៉ាក​ ស៊ុយអែត ​ចក្រភព​អង់គ្លេស​ និង​ហ្វាំងឡង់ ​គឺជា​ប្រទេស​ដែល​មាន​ប្រព័ន្ធ​អប់រំ​ល្អ​បំផុត​នៅលើ​ពិភពលោក​ ​ដោយសារ​ការ​វិនិយោគ​ខ្លាំង​លើ​គុណភាព​គ្រូបង្រៀន​ សមត្ថភាព​ក្នុង​ការ​សិក្សា​ ​និង​ការ​អប់រំ​កុមារ​តូច​។​

​យោង​តាម​ទិន្នន័យ​ដែល​បាន​ធ្វើ​បច្ចុប្បន្នភាព​នៅ​ថ្ងៃទី​២២​ ​ខែ​ឧសភា ​ឆ្នាំ​២០២៦​ ​ប្រទេស​ដាណឺម៉ាក​ទទួល​បាន​ពិន្ទុ​ខ្ពស់​បំផុត​ ​១០០, ​ខណៈ​ស៊ុយអែត​ទទួល​បាន​ ​៩៩.៩, ​ចក្រភព​អង់គ្លេស​ ​៩៦.៨​ ​និង​ហ្វាំងឡង់​ ​៩៦.៦​។

​ដាណឺម៉ាក​ ត្រូវ​បាន​គេ​ស្គាល់​ថា​ ​ជា​ប្រទេស​ដែល​មាន​ប្រព័ន្ធ​អប់រំ​ផ្តោត​លើ​សុខុមាលភាព​សិស្ស ​ការ​រៀន​បែប​ច្នៃប្រឌិត​ ​និង​ការ​បង្កើត​បរិយាកាស​សិក្សា​ដែល​មិន​ដាក់​សម្ពាធ​ខ្លាំង​លើ​កុមារ​។ ​ប្រទេស​នេះ​ក៏​មាន​ការ​វិនិយោគ​ខ្ពស់​លើ​ការ​បណ្ដុះបណ្ដាល​គ្រូ ​និង​ផ្តល់​សេវា​អប់រំ​ដោយ​ឥត​គិត​ថ្លៃ​ចាប់ពី​កម្រិត​បឋម​រហូតដល់​ឧត្ដម​សិក្សា​។​

​ស៊ុយអែត​វិញ​ ​មាន​កេរ្តិ៍ឈ្មោះ​ល្បី​ផ្នែក​ប្រព័ន្ធ​អប់រំ​ដែល​ផ្ដល់​សិទ្ធិ​ស្មើគ្នា​ ​និង​លើកទឹកចិត្ត​ឱ្យ​សិស្ស​អភិវឌ្ឍ​ជំនាញ​គិត​វិភាគ​ ​និង​ការងារ​ជា​ក្រុម​។ ​ប្រទេស​នេះ​ផ្ដោត​ខ្លាំង​លើ​ការ​អប់រំ​បែប​បត់បែន ​និង​បរិយាកាស​រៀន​ដែល​គាំទ្រ​សុខភាព​ផ្លូវចិត្ត​របស់​សិស្ស​។​

​ចំណែក​ហ្វាំងឡង់ ​តែងតែ​ត្រូវ​បាន​លើកឡើង​ជា​គំរូ​អប់រំ​ល្អ​បំផុត​មួយ​ក្នុង​ពិភពលោក​ ​ដោយសារ​មាន​ម៉ោង​សិក្សា​សមរម្យ​ ​ការ​ធ្វើតេស្ត​តិច​ និង​ការ​ជឿជាក់​ខ្ពស់​លើ​គ្រូបង្រៀន​។ ​គ្រូ​នៅ​ហ្វាំងឡង់​ភាគ​ច្រើន​ត្រូវ​មាន​សញ្ញាបត្រ​ថ្នាក់​អនុបណ្ឌិត​ ​ហើយ​វិជ្ជាជីវៈ​គ្រូ​ត្រូវ​បាន​គេ​ចាត់ទុក​ថា​មាន​កិត្យានុភាព​ខ្ពស់​។

​ដោយឡែក​ ចក្រភព​អង់គ្លេស​ ​មាន​សាកលវិទ្យាល័យ​ល្បី​ៗ​លំដាប់​ពិភពលោក​ជាច្រើន​ ​ដូចជា​ ​Oxford​ ​និង​ ​Cambridge​ ​ហើយ​មាន​ប្រព័ន្ធ​ស្រាវជ្រាវ​ និង​អប់រំ​ឧត្តម​សិក្សា​ដែល​ទទួលស្គាល់​ជា​សកល​។​

​របាយការណ៍​ដដែល​បាន​បង្ហាញ​ថា​ ​សហរដ្ឋ​អាមេរិក​ជាប់​ចំណាត់ថ្នាក់​លេខ​១២​ ក្នុង​ពិភពលោក​។ ​ទោះបី​ប្រទេស​នេះ​មាន​គុណភាព​អប់រំ​ថ្នាក់​ឧត្ដម​សិក្សា​ ​និង​សមិទ្ធផល​ស្រាវជ្រាវ​ខ្ពស់​ក៏ដោយ​ ​ប្រព័ន្ធ​អប់រំ​របស់​ខ្លួន​នៅតែ​ប្រឈម​បញ្ហា​ផ្នែក​ប្រសិទ្ធភាព​ ​ការ​ចំណាយ​ខ្ពស់​ និង​ភាព​មិន​ស្មើគ្នា​នៃ​លទ្ធផល​សិក្សា​កម្រិត​ ​K​-​12​ ​បើ​ប្រៀបធៀប​នឹង​ប្រទេស​ឈាន​មុខ​ផ្សេង​ៗ​។​

​ការ​រៀបចំ​ចំណាត់ថ្នាក់​នេះ​ ​ផ្អែក​លើ​កត្តា​ជាច្រើន​ ​រួមមាន​ ​គុណភាព​ប្រព័ន្ធ​អប់រំ​សាធារណៈ​ ​ការ​ចូល​ដំណើរការ​ថ្នាក់​ឧត្តម​សិក្សា​ ​និង​ការ​យល់ឃើញ​ជា​សកល​ចំពោះ​គុណភាព​អប់រំ​របស់​ប្រទេស​នីមួយ​ៗ​។​

​សូម​ជម្រាប​ជូន​ថា​ ​ទិន្នន័យ​នេះ​ត្រូវ​បាន​ប្រមូល​ពី​របាយការណ៍​ ​Best​ ​Countries​ ​របស់​ ​U​.​S​.​ ​News​ ​និង​មូលដ្ឋាន​ទិន្នន័យ​អប់រំ​ ​World​ ​Top​ ​20​ ​(​WT​20​) ​ដែល​បាន​ប្រមូល​សូចនាករ​អន្តរជាតិ​ពាក់ព័ន្ធ​នឹង​អក្ខរកម្ម ​ប្រព័ន្ធ​សិក្សា​ ​និង​សមិទ្ធផល​អប់រំ ​ដើម្បី​ធ្វើ​ការ​ប្រៀបធៀប​រវាង​ប្រទេស​នានា​៕