ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការពេញចិត្តនឹងរបៀបរស់នៅ ឬការទទួលបាននូវសុភមង្គល ក៏ដូចជាផ្នត់គំនិតវិជ្ជមាន ពុំមែនជាភាពចៃដន្យពេកនោះទេ! ប៉ុន្តែត្រូវការ ការផ្ទៀងផ្ទាត់របៀបនៃការរស់នៅប្រចាំថ្ងៃថា តើទម្លាប់ធ្វើល្អជាមួយខ្លួនឯងបានកម្រិតណា ទើបអាចរក្សាភាពវិជ្ជមានទាំងនោះបានក្នុងរយៈពេលវែង។
តាមរយៈគេហទំព័រ The IPaper បានបង្ហាញអំពីជំនាញមួយចំនួនដែលជំរុញសុភមង្គលនិងការផ្លាស់ប្តូររបត់ជីវិត ដោយមានរៀបរាប់លម្អិតដូចខាងក្រោម ៖
១. មានសតិ ឬស្មារតីរឭកដឹងជាប្រចាំ ៖ អ្នកដែលមានទម្លាប់ធ្វើសកម្មភាពជំរុញឱ្យស្មារតីនៅក្នុងបច្ចុប្បន្នភាពបានទៀងទាត់ ពួកគាត់មានទំនោរទៅរកភាពរីករាយច្រើនជាងអ្នកមិនបានអនុវត្តន៍ ព្រោះការយកចិត្តទុកដាក់ចំពោះសកម្មភាពទាំងនេះ គឺជាការបង្វឹកខួរក្បាលឱ្យមានការផ្តោត និងកាត់បន្ថយស្ត្រេស ក៏ដូចជាភាពតានតឹងជាដើម, ហើយសកម្មភាពក្នុងការប្រតិបត្តិទៀតសោត គឺមានច្រើនទម្រង់ដូចជា ការធ្វើសមាធិឱ្យបានជាប្រចាំរៀងរាល់ថ្ងៃ យ៉ាងហោចណាស់ប្រាំនាទីម្តង ឬក៏ការជ្រើសរើសទម្លាប់ដទៃទៀត ដែលផ្តល់ភាពងាយស្រួលទៅកាន់ខ្លួនឯងផ្ទាល់ មិនថាការគូសរូប និងការដើរយឺតជាដើម។ ជារួមព្យាយាមធ្វើសកម្មភាពទាំងឡាយណា ដែលធ្វើឱ្យលោកអ្នកទាញស្មារតីខ្លួនឯងឱ្យស្ថិតក្នុងបច្ចុប្បន្នភាព។ យ៉ាងណាមិញសូមកុំបន្ទោសខ្លួងឯង ប្រសិនបើមានការខកខាននៅថ្ងៃណាមួយ ដោយគ្រាន់តែព្យាយាមបន្តអនុវត្តន៍នៅថ្ងៃបន្ទាប់ជាការស្រេច។
២. ការបណ្ដុះនូវផ្នត់គំនិតសុទិដ្ឋិនិយម ៖ ការធ្លាក់ទៅក្នុងស្ថានការណ៍នៃការគិតអវិជ្ជមាន ឬការនិយាយមិនល្អចំពោះខ្លួនឯង ឬទៅកាន់អ្នកដទៃគឺជារឿងងាយស្រួលដែលមនុស្សបន្តធ្វើជារឿយៗ ខណៈការនិយាយវិជ្ជមានវិញ គឺត្រូវការឱ្យមនុស្សត្រូវបណ្ដុះទម្លាប់ល្អៗប្រចាំថ្ងៃទើបអាចរក្សាបាននូវផ្នត់គំនិតសុទិដ្ឋិនិយម។ ដូច្នេះប្រសិនបើលោកអ្នក ធ្លាប់មានបទពិសោធន៍នៃការគិតអវិជ្ជមានច្រើនពេក អ្វីដែលអាចសាកល្បងផ្លាស់ប្តូរបាន គឺការចាប់ផ្តើមសរសេរគំនិតខ្លួនឯងទៅក្នុងក្រដាសណាមួយ ឬការកត់ត្រាកំណត់ហេតុ ដោយសរសេររាល់អ្វីដែលលោកអ្នកកំពុងគិត និងឆ្លុះបញ្ចាំងជាពិសេសនៅពេលប្រទះនឹងបញ្ហាណាមួយ ឬក៏ពេលបាត់បង់ខ្លួនឯងក្នុងស្ថានភាពមិនល្អជាដើម។
៣. ការផ្សារភ្ជាប់ទំនាក់ទំនង ៖ កាលដែលមានទំនាក់ទំនងរឹងមាំជាមួយក្រុមមនុស្សដែលផ្តល់ការគាំទ្រ គឺជាប្រព័ន្ធការពារដ៏សំខាន់មួយ ក្នុងការថែទាំសុខភាពផ្លូវចិត្ត។ ទំនាក់ទំនង ជាការរួមចំណែកក្នុងការរស់នៅប្រចាំថ្ងៃផង ក៏ដូចជាការផ្សះផ្សាផ្លូវចិត្តក្នុងរយៈពេលវែងផងដែរ។ នៅក្នុងសង្គម មានប្រភេទមនុស្សដែលមានទស្សនៈចម្រុះ មានការគិតផ្ទុយគ្នា បទពិសោធន៍នៃការរស់នៅខុសគ្នា ភាសាខុសគ្នា និងវប្បធម៌ដាច់ដោយឡែកពីគ្នា។ ដូចនេះការរក្សាទំនាក់ទំនងក៏គួរតែយកចិត្តទុកដាក់លើការប្រើប្រាស់ពាក្យពេចន៍ក្នុងការសន្ទនា ការលើកដាក់សម្លេង ការស្វែងយល់អំពីភាសានៃក្ដីស្រឡាញ់រវាងគ្នានឹងគ្នា ការយល់ចិត្តអ្នកដទៃ រួមទាំងការផ្តល់ជំនួយ នៅពេលដែលមានតម្រូវការចាំបាច់ណាមួយ។ ការសិក្សាស្វែងយល់អំពីកិច្ចសន្ទនាជាមួយមនុស្សចម្រុះ សុទ្ធសឹងតែជាការរួមចំណែកជួយពង្រឹងទំនាក់ទំនងឱ្យមានភាពធន់ពីមួយពេល ទៅមួយពេល។
ទំនាក់ទំនងទៀតសោត មិនចាំបាច់ទាល់តែមានមនុស្សជិតស្និទ្ធនោះទេ សូម្បីតែមនុស្សទើបតែស្គាល់គ្នា មនុស្សធម្មតាទូទៅ ដែលបានជួបចៃដន្យ ឬជាមួយមនុស្សប្លែកមុខ ក៏ជាចំណែក្នុងការធ្វើទំនាក់ទំនងបានដែរ ដោយអនុវត្តន៍តាមរយៈវិធីសាស្រ្តសាមញ្ញៗដូចជា ការផ្តល់ទឹកមុខរួសរាយរាក់ទាក់ ការផ្តល់ស្នាមញញឹមទៅកាន់អ្នកធ្វើការផ្នែកផ្តល់សេវាកម្មទាំងឡាយ ជំនួសឱ្យការចេញក្រៅ ប៉ុន្តែកែវភ្នែកផ្តោតទៅលើអេក្រង់ទូរស័ព្ទដៃជាត្រីមុខ។ ការទំនាក់ទំនងជាមួយមនុស្សប្លែកមុខ ក៏ជាចំណែកវិជ្ជមានដែរ ព្រោះយ៉ាងហោចណាស់ លោកអ្នកបានជំរុញឱ្យភាគីម្ខាងទៀតមានភាពរីករាយតាមរយៈការស្វាគមន៍ ឬក៏ការសួរសុខទុក្ខជាដើម៕
