យោងតាមការចេញផ្សាយរបស់ សាលាវេជ្ជសាស្ត្រហាវឺត បានឱ្យដឹងថា ជាតិស្ករគឺជាសារធាតុ ដែលមានឥទ្ធិពលខ្លាំងចំពោះសុខភាពមនុស្ស។ ជាទូទៅ ជាតិស្ករកើតឡើងដោយធម្មជាតិ និងមានក្នុងអាហារដូចជា ផ្លែឈើ បន្លែ គ្រាប់ធញ្ញជាតិ និងទឹកដោះគោ គឺមានជាតិកាបូអីដ្រាត។ ការទទួលទានអាហារ ដែលមានជាតិស្ករពីធម្មជាតិ គឺមិនប៉ះពាល់ដល់សុខភាពនោះទេ។ លើសពីនេះ អាហាររុក្ខជាតិ ក៏មានសារធាតុសំខាន់ៗដូចជា ជាតិសរសៃ សារធាតុរ៉ែសំខាន់ៗ សារធាតុប្រឆាំងអុកស៊ីតកម្ម ប្រូតេអ៊ីន និងកាល់ស្យូមជាដើម។ ដោយសាររាងកាយរបស់មនុស្ស រំលាយអាហារទាំងនេះយឺតៗ ជាតិស្ករនៅដែលមាននៅក្នុងអាហារទាំងនោះ នឹងធ្វើការផ្គត់ផ្គងថាមពលដល់កោសិការយ៉ាងជាប់លាប់។ ការទទួលទានផ្លែឈើ បន្លែ និងគ្រាប់ធញ្ញជាតិបានច្រើន ក៏ចូលរួមចំណែកកាត់បន្ថយហានិភ័យនៃជំងឺរ៉ាំរ៉ៃ ដូចជា ជំងឺទឹកនោមផ្អែម ជំងឺបេះដូង និងជំងឺមហារីកមួយចំនួនផងដែរ។

ហានិភ័យនៃការទទួលទានជាតិស្ករបន្ថែមច្រើនហួសហេតុ

ទោះជាយ៉ាងណាក៏ដោយ បញ្ហានឹងកើតឡើង នៅពេលអ្នកទទួលទានស្ករដែលបន្ថែមពីខាងក្រៅច្រើនពេក ពោលគឺ ស្ករដែលបង្កើនរសជាតិអាហារ ឬពន្យាពេលហួសកំណត់ផលិតផល ។ នៅក្នុងរបបអាហារមនុស្សសម័យថ្មី ប្រភពអាហារមានច្រើនប្រភេទ និងមានផ្ទុកជាតិស្ករខ្ពស់បន្ថែមខ្ពស់ ជាពិសេស គឺ ភេសជ្ជៈ ទឹកផ្លែឈើ ទឹកដោះគោជូរ គ្រាប់ធញ្ញជាតិ នំខេក ស្ករគ្រាប់ និងអាហារកែច្នៃជាច្រើនទៀត ។ លើសពីនេះ អ្វីដែលយើងមិនសូវចាប់អារម្មណ៍នោះគឺ ស្ករបន្ថែម ក៏មាននៅក្នុង ស៊ុប នំបុ័ង និងសាច់ដែលគេវេចខ្ចប់រួចផងដែរ។

ជាលទ្ធផលបានបង្ហាញថា មនុស្សបានទទួលទានស្ករបន្ថែមច្រើនលើសកំណត់។ យោងតាមវិទ្យាស្ថានជាតិមហារីករបស់សហរដ្ឋអាមេរិកបានបង្ហាញថា បុរសពេញវ័យទទួលទានស្ករបន្ថែមជាមធ្យម ២៤ស្លាបព្រាក្នុងមួយថ្ងៃ ដែលស្មើនឹង ៣៨៤ កាឡូរី។

វេជ្ជបណ្ឌិត Frank Hu សាស្ត្រាចារ្យផ្នែកអាហារូបត្ថម្ភ នៅសាកលវិទ្យាល័យ Harvard T.H នៃសុខភាពសាធារណៈ «ជាទូទៅ ឥទ្ធិពលនៃការទទួលទានជាតិស្ករលើស អាចធ្វើឱ្យមានបញ្ហាធាត់ និងទឹកនោមផ្អែម ត្រូវបានគេដឹងគ្រប់គ្នា ប៉ុន្តែរឿងមួយដែលធ្វើឱ្យមនុស្សជាច្រើនភ្ញាក់ផ្អើលនោះ គឺ ស្ករអាចមានឥទ្ធិពលយ៉ាងធ្ងន់ធ្ងរដល់សុខភាពបេះដូងេបស់ពួកគេ។»

ជំងឺដែលបណ្ដាលមកពីការទទួលទានស្ករ បន្ថែម (ស្ករដែលបន្ថែមក្នុងចំណីអាហារ)

នៅក្នុងការសិក្សាមួយដែលត្រូវបានផ្សាយនៅក្នុងឆ្នាំ២០១៤ នៅក្នុង JAMA Internal Medicine លោកវេជ្ជបណ្ឌិត Hu និងសហការីរបស់គាត់បានរកឃើញទំនាក់ទំនងរវាងរបបអាហារ ដែលមានជាតិស្ករខ្ពស់ ជាមួយនឹងហានិភ័យខ្ពស់ នៃការស្លាប់ដោយជំងឺបេះដូង។ ក្នុងរយៈពេលនៃការសិក្សា ១៥ឆ្នាំ បានរកឃើញថា មនុស្សដែលទទួលបាន ១៧ភាគរយ ទៅ ២១ភាគរយនៃកាឡូរី ដែលមានក្នុងស្ករបន្ថែម មានហានិភ័យខ្ពស់ប្រឈមមុខនឹងការស្លាប់ ដោយសារជំងឺសរសៃឈាមបេះដូង ៣៨ភាគរយ បើធៀបទៅនឹងអ្នកទទួលបានស្ករបន្ថែម ៨ភាគរយ នៃកាឡូរី។

លោកវេជ្ជបណ្ឌិត Hu មានប្រសាសន៍ថា «ជាមូលដ្ឋាន ការទទួលទានជាតិស្ករបន្ថែមកាន់តែខ្ពស់ ហានិភ័យនៃជំងឺបេះដូងកាន់តែខ្ពស់។ ជាក់ស្ដែង ការទទួលទានស្ករខ្ពស់ នឹងជំរុញឱ្យថ្លើមធ្វើការលើសកំណត់។»

យ៉ាងណាក៏ដោយ ចំពោះសំណួរថា តើជាតិស្ករប៉ះពាល់ដល់សុខភាពយ៉ាងណានោះ? មិនត្រូវបានគេយល់ស្របទាំងស្រុងនោះទេ ប៉ុន្តែវាហាក់ដូចជាមានទំនាក់ទំនងដោយប្រយោលជាច្រើន។ វេជ្ជបណ្ឌិត Hu មានប្រសាសន៍ថា «ថ្លើមរបស់មនុស្សបំប្លែងជាតិស្ករ តាមរបៀបដូចគ្នានឹងជាតិអាល់កុល ហើយបំលែងការបូអ៊ីដ្រាតពីរបបអាហារទៅជាខ្លាញ់។» យូរៗទៅ សកម្មភាពនេះអាចនាំឱ្យមានការប្រមូលផ្ដុំខ្លាញ់កាន់តែច្រើន ដែលអាចប្រែទៅជាខ្លាញ់រុំថ្លើម ដែលជាវិបត្តិរួមចំណែកឱ្យមាន ជំងឺទឹកនោមផ្អែម ដែលបង្កើនហានិភ័យនៃជំងឺបេះដូង។

លោកវេជ្ជបណ្ឌិតបន្ថែមថា « ផលប៉ះពាល់នៃការទទួលទានជាតិស្ករបន្ថែម ដែលមានក្នុងចំណីរអាហារ នឹងធ្វើឱ្យសម្ពាធឈាមឡើងខ្ពស់ កើនឡើងការរលាក ឡើងទម្ងន់ ជំងឺទឹកនោមផ្អែម និងជំងឺខ្លាញ់រុំថ្លើម ដែលជំងឺទាំងអស់នេះ សុទ្ធសឹងតែមានទំនាក់ទំនងជាមួយនឹងការកើនឡើងហានិភ័យនៃការគាំងបេះដូង និងជំងឺដាច់សរសៃឈាមខួរក្បាល។»៕