ការសរសេរ Personal Statement ឬសេចក្ដីថ្លែងការណ៍ផ្ទាល់ខ្លួនមានសារៈសំខាន់ជាខ្លាំងក្នុងដាក់ពាក្យស្នើសុំអ្វីមួយ ជាពិសេសការក្នុងការដាក់ពាក្យស្នើសុំអាហារូបករណ៍សិក្សានៅសាកលវិទ្យាល័យ។ ការសរសេរសេចក្ដីថ្លែងការណ៍ផ្ទាល់ខ្លួនបង្ហាញអំពីចំណាប់អារម្មណ៍ក្នុងការសិក្សា ចំណង់ចំណូលចិត្ត ព័ត៌មានដែលចាំបាច់ក្នុងជីវិតរបស់បេក្ខជនស្នើពាក្យសុំជាដើម ។

ការសរសេរសេចក្ដីថ្លែងការផ្ទាល់ខ្លួននេះគួរបង្ហាញអំពីសមិទ្ធិផលសិក្សា ការប្ដេជ្ញាចិត្ត តួនាទីដឹកនាំ កីឡា កាអប់រំ និងជំនាញពាក់ព័ន្ធមួយចំនួនទៀតដោយភ្ជាប់ជាមួយឯកសារយោង ។ ជាមួយគ្នានេះអ្នកសរសេរត្រូវធ្វើបែបណាឱ្យមានភាពងាយស្រួលមើល និងអានដើម្បីអាចទាញចំណាប់អារម្មណ៍អ្នកពិនិត្យបាន ។

សេចក្ដីថ្លែងការផ្ទាល់ខ្លួនត្រូវមានពី២៥០ពាក្យទៅ៥០០ពាក្យ ដោយសរសេរជាប្រយោគសាមញ្ញ ខ្លី និងប្រើចំណងជើងដែលគួរឱ្យចាប់អារម្មណ៍ ជៀសវៀងការសរសេរដោយប្រើពាក្យស្មុគស្មាញ ។ នេះបើតាមការចុះផ្សាយតាមរយៈគេហទំព័រអប់រំបរទេស Scholarship&Job កាលពីពេលថ្មីៗនេះ ។

តើគួរសេចក្ដីថ្លែងការ ឬ Personal Statement បែបណាទើបមានភាពទាក់ទាញ?

ដើម្បីឱ្យការសរសេរសេចក្ដីថ្លែងការណ៍មួយឱ្យមានភាពទាក់ទាញអ្នកសរសេរគួរតែអនុវត្តន៍នូវចំណុចសំខាន់ៗដូចជា៖

១. សរសេរសេចក្ដីផ្ដើមដែលមានភាពទាក់ទាញ ៖ ជាការសរសេរណែនាំអំពីបុគ្គលិកលក្ខណៈរបស់អ្នក ប៉ុន្តែមិនមែនសរសេរអំពីជីវប្រវត្តិរបស់អ្នកទេ គឺត្រូវសរសេរអំពីចំណាប់អារម្មណ៍របស់អ្នកនៅក្នុងវគ្គសិក្សា បទពិសោធន៍ស្រាវជ្រាវរបស់អ្នកក្នុងប្រធានបទសិក្សា ។ សេចក្ដីផ្ដើមថ្លែងការផ្ទាល់ខ្លួនត្រូវប្រើប្រាស់ប្រយោគឃ្លាដែលទាក់ទង និងគាំទ្រលើកម្មវិធីសិក្សា ឬសាកលវិទ្យាល័យដែលបានស្នើសុំពាក្យទៅសិក្សា ។

២. សង្កត់ធ្ងន់លើមហិច្ឆតា និងចំណាប់អារម្មណ៍របស់បេក្ខជន ៖ តួនៃសេចក្ដីថ្លែងការណ៍ផ្ទាល់ខ្លួន អ្នកត្រូវសរសេរអំពីគោលដៅអនាគតក៏ដូចជាផែនការរបស់អ្នកដែលបានដាក់ និងកំពុងធ្វើដើម្បីសម្រេចគោលដៅទាំងនោះ ។ លើសពីនេះ អ្នកសរសេរត្រូវបង្ហាញអំពីមូលហេតុអ្វីដែលអ្នកជ្រើសរើសវគ្គសិក្សា ឬកម្មវិធីអាហារូបករណ៍នោះ (អាហារូបករណ៍ដែលអ្នកកំពុងស្នើសុំ) និងបង្ហាញវិញថា តើអាហារូបករណ៍នឹងផ្ដល់ការសិក្សា ឬជួយដល់ផែនការសិក្សារបស់សាម៉ីខ្លួនដូចម្ដេចខ្លះ ។

៣. បង្ហាញបទពិសោធន៍ដែលគួរឱ្យចាប់អារម្មណ៍របស់អ្នក ៖ បទពិសោធន៍មនុស្សម្នាក់ៗគួរតែផ្ដោតលើចំណង់ចំណូលចិត្តរបស់សាម៉ីខ្លួន ដើម្បីបង្កើនសមត្ថភាពនិងភាពរីកចម្រើនរបស់បុគ្គល ។ បទពិសោធន៍របស់បុគ្គលអាចជា ការងារស្ម័គ្រចិត្ត ការលេងកីឡា ការពង្រឹងចំណងគ្រួសារ ការរៀនអំពីវប្បធម៌ផ្សេងៗជាដើម ។ ដូចនេះហើយបទពិសោធន៍ក៏ជាកត្តាធ្វើឱ្យអ្នកអាចលេចធ្លោបានដែរ ។

៤. និយាយអំពីអ្វីដែលជំរុញអ្នក ៖ នៅក្នុងចំណុចនេះ អ្នកសរសេរអាចសរសេរអំពីចំណុច និងគោលបំណងហេតុអ្វីដែលអ្នកចាប់អារម្មណ៍ទៅលើអាហារូបករណ៍ ឬកម្មវិធីសិក្សា ឬផែនការអាជីវកម្មដែលអ្នកកំពុងស្នើសុំ និងផែនការបន្ទាប់របស់អ្នកក្រោយពីទទទួលបានអាហារូបករណ៍នេះ ។ ជាមួយគ្នានេះ នៅពេលអ្នកធ្វើការឆ្លើយសំណួរ ឬសរសេរចម្លើយបង្ហាញអ្នកត្រូវធ្វើការសរសេរឆ្លើយតបនឹងសំណួរខាងលើដោយប្រុងប្រយ័ត្ន ហើយគួរតែមានគម្រោងសម្រាប់សេចក្ដីថ្លែងការផ្ទាល់ខ្លួនរបស់អ្នក ។ អ្នកសរសេរត្រូវប្រាកដថា ការសរសេរឡើងរបស់ខ្លួនមិនមានការចម្លងពីរបស់អ្នកដទៃឡើង ។ ការមានសំណេរពង្រាងអាចឱ្យអ្នកស្វែងរកនូវចំណុចកំហុសរបស់អ្នក និងចំណុចចន្លោះខ្វះខាតរបស់អ្នកបានដោយងាយស្រួល ។

៥. ពិនិត្យឡើងវិញ ៖ អ្នកសរសេរត្រូវធ្វើការពិនិត្យឡើងវិញ ដើម្បីរកមើលកំហុសវេយ្យាករណ៍ អក្ខរាវិរុទ្ធ និងឃ្លាមិនប្រក្រតី ឬពិបាកយល់ណាមួយ ។ អ្នកសរសេរគួរតែឱ្យនរណាម្នាក់ជួយមើល អាន និងពិនិត្យជៀសវាងអ្នកមិនអាចរកកំហុសអចេតនារបស់ខ្លួនឯងដូចជា លោកគ្រូ អ្នកគ្រូ សាស្ត្រាចារ្យនៅសាកលវិទ្យាល័យរបស់អ្នក ។ ការទទួលបានមតិកែលម្អពីសំណាក់ពូកគាត់ក៏ជាផ្នែកមួយសំខាន់ក្នុងការបន្ថែម ឬបន្ថយអត្ថន័យ ដើម្បីឈានទៅរកការទទួលបានលទ្ធផលល្អក្នុងការសរសេរសសេចក្ដីថ្លែងការផ្ទាល់ខ្លួនរបស់អ្នក ឬ Personal Statement ៕