យោងតាម Psychology Today បញ្ហា Impostor Syndrome ដែលត្រូវបានគេស្គាល់ថា ជាបាតុភូតក្លែងបន្លំ (Impostor phenomenon) ឬបទពិសោធន៍ក្លែងបន្លំ (Impostor experience) គឺជាបាតុភូតផ្លូវចិត្តមួយ ដែលបុគ្គលម្នាក់ៗសង្ស័យពីសមិទ្ធិផលរបស់ខ្លួន និងមានអារម្មណ៍ថាដូចជាក្លែងបន្លំ ទោះបីជាមានភស្ដុតាងបង្ហាញរួចក៏ដោយ។ នៅពេលយើងមានបទពិសោធន៍បែបនេះ យើងអាចមានអារម្មណ៍ថា យើងកំពុងបោកបញ្ឆោតអ្នកដទៃ ឱ្យគិតថាយើងមានសមត្ថភាពខ្លាំងជាងសមត្ថភាពផ្ទាល់ខ្លួនដែលយើងមាន។

អារម្មណ៍ដូចជាក្លែងបន្លំ ឬបោកបញ្ឆោតអ្នកដទៃនេះ ច្រើនតែទាក់ទងនឹងរបៀបដែលយើងមានអារម្មណ៍ចំពោះខ្លួនឯង។ វាអាចជាប្រភពនៃកម្រិតខ្ពស់នៃភាពតានតឹង និងការថប់បារម្ភ ព្រមទាំងឥទ្ធិពលនៃការសង្ស័យខ្លួនឯង និងឱ្យតម្លៃខ្លួនឯងទាប។

ដំណើរការនេះ ត្រូវបានគេយល់ថា ជាការបង្ហាញពីជម្លោះផ្លូវចិត្ត និងអារម្មណ៍មិនមានសុវត្ថិភាពចំពោះលក្ខណៈសម្បត្តិខ្លួនឯង (Insecurities)។ គំនិត អារម្មណ៍ ការលើកទឹកចិត្ត និងបំណងប្រាថ្នា ដែលកើតឡើងដោយមិនដឹងខ្លួន ដើរតួនាទីយ៉ាងសំខាន់ក្នុងការរៀបចំឥរិយាបថ និងបទពិសោធន៍របស់យើង។ ខណៈអារម្មណ៍នៃភាពមិនគ្រប់គ្រាន់ និងការសង្ស័យខ្លួនឯងខ្លះ អាចកើតចេញពីបទពិសោធន៍ក្នុងវ័យកុមារភាព។

ជាឧទាហរណ៍ នៅក្នុងវ័យកុមារភាព យើងអាចទទួលបានការរិះគន់ ការវិនិច្ឆ័យ ឬការប្រៀបធៀបទៅនឹងអ្នកដទៃ ពីសំណាក់អ្នកថែទាំ ឬអាណាព្យាបាល ដែលនាំឱ្យយើងក្លាយជាមនុស្សដែលខ្វះការគោរពខ្លួនឯង និងការភ័យខ្លាច នៃការវិនិច្ឆ័យ ឬបដិសេធ។ ឬប្រហែលជាយើងធំធាត់ឡើង ក្នុងបរិយាកាស ដែលមិនទទួលស្គាល់ និងបំពេញតម្រូវការរបស់យើង ដែលនាំឱ្យយើងឈានដល់ការសន្និដ្ឋាន ដោយមិនដឹងខ្លួនថា តម្រូវការរបស់យើង និងយើងជានរណា មិនសមនឹងទទួលបានការយកចិត្តទុកដាក់។

លើសពីការសង្ស័យខ្លួនឯង

Impostor Syndrome មិនមានន័យដូចគ្នាទៅនឹងពាក្យថា សង្ស័យខ្លួនឯង ឬអារម្មណ៍មិនមានសុវត្ថិភាពនោះទេ ប៉ុន្តែវាជាបទពិសោធន៍ខាងក្នុងដ៏ស្មុគស្មាញ ដែលអាចមានឬសគល់យ៉ាងជ្រៅ។ ចំណុចកណ្ដាលមួយ នៃបាតុភូតនេះ គឺការភ័យខ្លាច និងការថប់បារម្ភក្នុងបង្ហាញខ្លួនឯងឱ្យពិភពលោកខាងក្រៅបានស្គាល់ថាយើងជាអ្នកណា។

យើងទាំងអស់គ្នា ខិតខំ ដើម្បីបង្ហាញឱ្យអ្នកដទៃមើលឃើញ ដឹង និងទទួលស្គាល់ថាយើងជានរណា។ ទោះជាយ៉ាងណាក៏ដោយ សម្រាប់អ្នកមានបញ្ហា Impostor Syndrome យល់ថា អារម្មណ៍ដែលត្រូវបានគេមើលឃើញ ឬ Being Seen គឺជាបទពិសោធន៍នៃការបង្ហាញ ឬសំញែងអ្នកដទៃ។ អារម្មណ៍ភ័យខ្លាចថា អ្នកដទៃស្គាល់ច្បាស់នេះ គឺផ្សារភ្ជាប់ទៅនឹងការមិនទុកចិត្ត ថា អ្នកដទៃ នឹងមិនទទួលយកយើងជាអ្នកណា។

នៅពេលដែលយើង មានអារម្មណ៍ថា ស្ថិតនៅក្រោមការគៀបសង្កត់ និងជំរុញឱ្យយើងបង្ហាញពីសមត្ថភាពខ្លួនឯង ឬបង្ហាញប្រាប់អ្នកដទៃថា យើងមានជីវិតលើផែនដីនេះ ដូចគេដូចឯងដែរ។ ការទទួលបានអារម្មណ៍បែបនេះ ធ្វើឱ្យយើងចាប់ផ្ដើមផ្ដាច់ខ្លួន ពីបំណងប្រាថ្នា ក្ដីស្រម៉ៃ និងការទទួលស្គាល់ភាពខុសពីគេរបស់យើង។ ឥទ្ធិពលដ៏លំបាកបំផុតនៃបទពិសោធន៍នេះ គឺការឃ្លាតឆ្ងាយ ពីអ្វីដែលធ្វើឱ្យយើងក្លាយជាមនុស្ស៕