ទម្លាប់សាមញ្ញៗនៅពេលល្ងាច ឬមុនពេលចូលគេងអាចជួយឱ្យដំណើរការខួរក្បាលមានសុខភាពល្អ មានស្មារតីយល់ដឹង អភិវឌ្ឍន៍ការចងចាំ និងពង្រឹងការផ្តោតអារម្មណ៍។ យោងតាមគេហទំព័រ livestrong បានបង្ហាញពីសម្មភាពប្រាំចំណុច ដែលសម្រួលដល់ការទទួលទានដំណេកប្រកបដោយផលិតភាព ដែលរៀបរាប់លម្អិតនៅខាងក្រោម៖

១. ទៅកន្លែងមានធម្មជាតិ ៖ កាលដែលស្ថិតនៅក្នុងបរិយាកាស មានព័ណ៌បៃតង ជាពិសេស រុក្ខជាតិព័ណ៌បៃតងតែម្តង គឺជួយឱ្យប្រព័ន្ធនៃការគិតមានដំណើរការល្អ (ដែលចំណុចនេះ ជំរុញទៅដល់ការមានសមត្ថភាពដោះស្រាយបញ្ហា មានហេតុមានផល ថែមទាំងអាចគ្រប់គ្រងកំហឹង និងអកប្បករិយាមិនល្អផងដែរ)។ ទន្ទឹមគ្នានោះការនៅជាមួយនឹងធម្មជាតិ ក៏ជួយឱ្យការចងចាំ មានភាពប្រសើរជាងមុន ថែមទាំងបង្កើនភាពបត់បែន ហើយពង្រឹងបាននូវការផ្តោតបានមួយកម្រិតផងដែរ។ មួយវិញទៀតគឺជួយដល់សុខភាពផ្លូវចិត្ត រួមបញ្ចូលទាំងជៀសវាងជំងឺបាក់ទឹកចិត្ត និងកាត់បន្ថយភាពតានតឹង។ ដូច្នេះហើយ ប្រសិនបើទីតាំងផ្ទះរបស់អ្នកមានបរិយាកាសបែបធម្មជាតិៗ ឬកន្លែងមានខ្យល់ចេញចូល សូមចំណាយពេលនៅកន្លែងដែលមានបរិយាកាសទាំងនោះឱ្យបានច្រើនតាមដែលអាចធ្វើបាន ដូចជាយកអាហារពេលល្ងាចទៅបរិភោគនៅបរិវេណខាងក្រៅ ឬក៏ទៅសំយាបខាងមុខផ្ទះជាដើម។ ឬក៏លោកអ្នកអាច ដើរកម្សាន្តនៅលើសួន ទីកន្លែងដែលមានរុំព័ទ្ធបន្ថែមទៅដោយបរិយាកាសបៃតង។

២. កំណត់ពេលចូលគេង ៖ នៅពេលកែវភ្នែកទាំងពីរបិទជិត វាប្រៀបបានជាការសម្រាកមួយពេល ដែលជួយឱ្យសុខភាពល្អប្រសើរ ហើយធ្វើឱ្យខួរក្បាលមានសភាពរីករាយ។ តាមរយៈការសិក្សារបស់ Digital Medicine បានរកឃើញថា មនុស្សដែលមិនទទួលទានដំណេកបានគ្រប់គ្រាន់ងាយក្នុងការបាក់ទឹកចិត្ត ហើយមិនអស់ទឹកចិត្ត ឬគ្មានអារម្មណ៍ក្នុងការផ្ចង់ទៅលើភារកិច្ចអ្វីមួយនោះទេ។ វិធីសាស្រ្តដែលជួយឱ្យអ្នកអាចតាមដាន និងកំណត់ខ្លួនឯងបាន គឺត្រូវកំណត់ម៉ោងគេងឱ្យបានត្រឹមត្រូវ និងទៀងទាត់ ដោយប្រើប្រាស់ទូរស័ព្ទ ឬឧបករណ៍អេឡិចត្រូនិចក្នុងការកំណត់ម៉ោងចូលគេង និងម៉ោងក្រោកពីគេង។ សូមចាំផងដែរថា ពេលវេលា និងស្ថានភាព ឬពេលផលិតភាពរបស់មនុស្សម្នាក់ៗខុសគ្នា មិនថាជាមនុស្សដែលនៅក្បែរខ្លួនរាល់ថ្ងៃនោះទេ។ ដូច្នេះការកំណត់ គឺត្រូវផ្ទៀងផ្ទាត់នឹងស្ថានភាពជាក់លាក់របស់ខ្លួនឯង។

៣. ពិសាទឹកជំនួសអាល់កុល ៖ តាមរយៈការសិក្សារបស់ Nature Communications កាលពីឆ្នាំ២០២២ បានរកឃើញថា ការពិសាភេសជ្ជៈមានជាតិអាល់កុលចំនួនពីរទៅបីកែវក្នុងមួយអាទិត្យអាចធ្វើឱ្យថាមពលខួរក្បាលខុះខ្សោយ ។ ភេសជ្ជៈមានជាតិអាល់កុលតែមួយកែវ ក៏អាចប៉ះពាល់ដល់ការគេងបានដែរ ដូចជាផ្លូវដង្ហើមនៃការគេងមិនដំណើរការល្អ និងយល់សប្ដិជាដើម ប៉ុន្តែនៅក្នុងករណីនេះ មិនមានមនុស្សច្រើនទេដែលចាប់អារម្មណ៍។ ដូច្នេះ ជំនួសឱ្យការកាន់កែវមានជាតិអាល់កុល លោកអ្នកអាចកាន់កែវទឹកជំនួសវិញ ដើម្បីជំរុញសុខភាពដំណេកឱ្យកាន់តែមានប្រសិទ្ធភាព។ បើតាមការសិក្សារបស់ Nutrients ក្នុងឆ្នាំ២០១៨វិញ បានឱ្យដឹងថា មនុស្សដែលមានវ័យលើសពី ៦៥ឆ្នាំ ហើយខ្វះជាតិទឹកជំរុញឱ្យឆាប់មានអាការៈវង្វេង ហើយប្រសិនបើអ្នកមិនទទួលទានទឹកឱ្យបានគ្រប់គ្រាន់ទេ វាអាចប៉ះពាល់ទៅដល់សរសៃប្រសាទទៀតផង។

៤. ផ្តោតអារ្មណ៍ទៅនឹងការអានសៀវភៅ ៖ អានជាវិធីនាំឱ្យសុខភាពរបស់អ្នកឆ្ពោះទៅកាន់ដំណាក់កាលលូតលាស់ជានិច្ច ។ ជារឿយៗតាមរយៈការអាន បានង្ហាញឱ្យឃើញថា វាជាផ្នែកមួយជួយជំរុញដល់ការគេង ដែលធ្វើឱ្យខួរក្បាលស្ថិតក្នុងសភាពស្ងប់ និងកាត់បន្ថយការថប់បារម្ភ។ មនុស្សដែលមានទម្លាប់អានសៀវភៅទៀងទាត់នឹងទទួលបាននូវការយល់ដឹងឥតគណនា។ តាមរយៈការសិក្សារបស់ Brain Connectivit ក្នុងឆ្នាំ២០១៣ បានរកឃើញថា ការអានប្រលោមលោកជួយបង្កើនទំនាក់ទំនងជាមួយសរសៃប្រសាទ។ ដោយឡែកបើតាម JAMA Psychiatry ក៏បានឱ្យដឹងបន្ថែមថា ការអានសៀវភៅទូទៅ កាសែត ឬទស្សនាវត្តី អាចកាត់បន្ថយជំងឺវង្វេង។

៥. រក្សាគម្លាតពីស្រ្គីនព័ណ៌ខៀវចំនួនពីរម៉ោងមុនពេលចូលគេង ៖ តាមការសិក្សារបស់ Journal of the Association for Consumer Research បានរកឃើញថា ការប្រើប្រាស់ឧបករណ៍អេឡិចត្រូនិចមិនបានត្រឹមត្រូវ មានដូចជាទូរស័ព្ទដៃ កុំព្យូទ័រ អាចធ្វើឱ្យថាមពលខួរក្បាលមានការថយចុះថាមពល រួមបញ្ចូលទាំងការកាត់បន្ថយលទ្ធភាពក្នុងការស្វែងយល់ចំណេះថ្មីៗ បាត់បង់ការចងចាំ ការគិតបែបស៊ីជម្រៅ ការដោះស្រាយបញ្ហា និងភាពច្នៃប្រតិដ្ឋទៀតផង។ បន្ទាប់ពីបានដឹងពីផលប៉ះពាល់នៃការប្រើប្រាស់ស្រ្គីនដែលមានពន្លឺលើសចំនួនរួចហើយ អ្វីដែលអ្នកអាចធ្វើបានគឺ កំណត់របៀបប្រើប្រាស់ ដោយប្តូរទៅជាពន្លឺសម្រាប់ប្រើពេលយប់ និងកំណត់ម៉ោងក្នុងការប្រើ ហើយរក្សាគម្លាតពីពន្លឺអេក្រង់អេឡិចត្រូនិច ឱ្យបានពីរម៉ោង មុនពេលទទួលទានដំណេក៕