ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការស្រាវជ្រាវបែបវិទ្យាសាស្ត្របង្ហាញថា ការសម្លឹងមើលអេក្រង់នៅពេលយប់ មុនចូលគេងបាន រំខានដំណេក ខ្លាំងជាងការទទួលទានកាហ្វេនៅពេលល្ងាចទៅទៀត។
ពន្លឺពណ៌ខៀវ និងឥទ្ធិពលរបស់វាលើខួរក្បាល
អេក្រង់មិនគ្រាន់តែរំខានការគេងរបស់អ្នកប៉ុណ្ណោះទេ វាក៏ប៉ះពាល់ដល់ដំណើរការ នៃការគេងលក់ស្កប់ស្កល់ផងដែរ។
ជាការពិត នៅពេលថ្ងៃ ពន្លឺពណ៌ខៀវ ផ្ដល់អត្ថប្រយោជន៍ជាច្រើន ព្រោះពន្លឺថ្ងៃ និងអំពូល LED នឹងជួយបង្កើនការប្រុងប្រយ័ត្ន ជួយគ្រប់គ្រងនាឡិកាធម្មជាតិក្នុងរាងកាយរបស់អ្នក។ ប៉ុន្តែនៅពេលយប់ ពន្លឺដដែលនោះ នឹងផ្ញើសារខុសទៅកាន់ខួរក្បាលរបស់អ្នក។ វាប្រាប់រាងកាយរបស់អ្នកឱ្យត្រូវតែភ្ញាក់ពីដំណេក ខណៈដែលជាក់ស្ដែង អ្នកត្រូវការសម្រាក។
អ្នកស្រាវជ្រាវនៅសាកលវិទ្យាល័យ Harvard បានរកឃើញថា ពន្លឺពណ៌ខៀវរារាំងមេឡាតូនីន ដែលជាអរម៉ូន ផ្ដល់សញ្ញាថា ដល់ពេលដែលត្រូវគេង ហើយការរារាំងនេះ ខ្លាំងជាងពន្លឺពណ៌បៃតង ដល់ទៅ ២ដង។ វាពន្យារពេលនាឡិកាធម្មជាតិក្នុងរាងកាយរបស់អ្នក រហូតដល់ ៣ម៉ោង។ ការពន្យារពេលនេះ គឺប្រៀបដូចជាអ្នកកំពុងធ្វើដំណើរឆ្លងកាត់ល្វែងម៉ោង (Time Zone) ដោយមិនបានធ្វើដំណើរចាកចេញពីបន្ទប់គេងដូច្នោះដែរ។
យោងតាម Sleep Foundation បានបង្ហាញថា ពន្លឺទាំងអស់អាចមានឥទ្ធិពលលើដំណេក ប៉ុន្តែប្រភេទ នៃពន្លឺនីមួយៗមានឥទ្ធិពលខុសៗគ្នា។ ជាឧទាហរណ៍ ពន្លឺថ្ងៃធម្មជាតិ អាចឡើងដល់ ១០,០០០ lux (ជារង្វាស់នៃពន្លឺ) ខណៈដែលពន្លឺក្នុងផ្ទះភាគច្រើននៅទាបជាង ៥០០ lux ។ ហេតុផលនេះហើយ ទើបបណ្ដាលឱ្យពន្លឺនៅខាងក្រៅ ជាសញ្ញាដ៏មានអនុភាព សម្រាប់គ្រប់គ្រងនាឡិកាធម្មជាតិក្នុងរាងកាយរបស់អ្នក។
សូម្បីតែពន្លឺកម្រិតទាប ក៏អាចមានឥទ្ធិពលលើនាឡិកាធម្មជាតិក្នុងរាងកាយរបស់អ្នកផងដែរ។ ការសិក្សារបស់សាកលវិទ្យាល័យ Toronto បានបង្ហាញថា ពន្លឺក្នុងផ្ទះបានកាត់បន្ថយកម្រិតជាតិមេឡាតូនីន បើទោះជាអ្នកពាក់វ៉ែនតាការពារពន្លឺពណ៌ខៀវក៏ដោយ។ អ្នកដែលនៅក្នុងបន្ទប់ងងឹត គ្មានវ៉ែនតា មិនមានការប្រែប្រួលជាតិមេឡាតូនីននោះទេ។ នេះបង្ហាញថា រាងកាយរបស់យើង ងាយរងឥទ្ធិពលពីពន្លឺ បើទោះជាពន្លឺនោះមានលក្ខណៈស្រទន់ ឬក៏ភ្លឺខ្លាំងក៏ដោយ។
ពន្លឺពណ៌ខៀវ មានឥទ្ធិពលខ្លាំងជាងការទទួលទានកាហ្វេពេលល្ងាច
ការសិក្សាមួយពីសាកលវិទ្យាល័យ Colorado Boulder ក្នុងឆ្នាំ២០១៥ បានរកឃើញថា ការទទួលទានកាហ្វេ espresso ពីរដង បីម៉ោងមុនចូលគេង អាចពន្យារនាឡិកាធម្មជាតិក្នុងរាងកាយរបស់អ្នក រយៈពេល ៤០នាទី។ នៅក្នុងការប្រៀបធៀប ការនៅជាមួយពន្លឺអេក្រង់ភ្លឺខ្លាំង មានឥទ្ធិពលខ្លាំងជាង ការទទួលទានកាហ្វេ espresso ជិតទ្វេដង។
ពន្លឺដើរតួនាទីសំខាន់ខ្លាំងណាស់ អំឡុងពេលគេង។ ពន្លឺអេក្រង់ អំពូលនៅលើក្បាលដំណេក និងពន្លឺពេលយប់ សុទ្ធតែអាចរំខានដល់នាឡិកាធម្មជាតិក្នុងរាងកាយរបស់អ្នក ដែលធ្វើឱ្យអ្នកមិនងាយងងុយគេង និងពិបាកគេងលក់ស្រួល។
ទម្លាប់ នៃការប្រើអេក្រង់ ដើម្បីគេងលក់ស្រួល
អនុវត្តសកម្មភាពចំនួន ៤នេះ ដើម្បីពង្រឹងគុណភាពដំណេករបស់អ្នក ៖
ប្រើពន្លឺកម្រិតទាប មុនចូលគេង ៖ អ្នកត្រូវបន្ថយកម្រិតពន្លឺយ៉ាងហោចណាស់មួយម៉ោង មុនចូលគេង។
ជៀសវាងមើលអេក្រង់មុនចូលគេង ៖ អ្នកអាចជៀសវាងការប្រើអេក្រង់មុនចូលគេង តាមរយៈការបិទទូរស័ព្ទ ថេបប្លេត និងទូរទស្សន៍ ១-២ ម៉ោង មុនចូលគេង។ ប្រសិនបើត្រូវប្រើអេក្រង់ ដោយជៀសមិនរួច ត្រូវបើកមុខងារពេលយប់ ឬពាក់វ៉ែនតាការពារពន្លឺពណ៌ខៀវ។
ប្រើវាំងនន ដើម្បីបាំងពន្លឺពីខាងក្រៅ ៖ ដើម្បីគេងលក់ស្កប់ស្កល់ អ្នកត្រូវការបន្ទប់ដែលងងឹត ដូច្នេះ អ្នកអាចប្រើវាំងនន ដើម្បីបាំងពន្លឺ ពីខាងក្រៅ ដើម្បីធានាថា បន្ទប់ងងឹត។
ប្រើម៉ាស់បាំងភ្នែក ៖ ប្រសិនបើដៃគូ ឬអ្នកនៅបន្ទប់ជាមួយអ្នកត្រូវការពន្លឺ អ្នកអាចប្រើម៉ាស់បាំងភ្នែក ដើម្បីសម្រួលឱ្យអ្នកអាចគេងក្នុងភាពងងឹតបាន៕
