រ៉ាឌី ភានុម៉ា ជាសិស្សមកពីសាលារៀនជំនាន់ថ្មីព្រះស៊ីសុវត្ថិ​ ដែលមានវ័យត្រឹមតែជាង១០ឆ្នាំប៉ុណ្ណោះ ប៉ុន្តែរូបគេសម្រេចចិត្តរៀនវិស្វកម្មមេកានិកពាក់ព័ន្ធនឹងការឌីស្សាញបែបឌីជីថល តាមរយៈកម្មវិធីរបស់ Steaming Cambodia តាំងពីថ្នាក់ទីប្រាំមួយ​ ។ បទពិសោធន៍របស់ ភានុម៉ា បង្ហាញឱ្យឃើញពីបរិបទសង្គមបច្ចុប្បន្នមានភាពរីកចម្រើនផ្នែកបច្ចេកវិទ្យា ហើយក៏ជំរុញបាននូវវឌ្ឍនភាពនៃការអប់រំផងដែរ។

កត្តាដែលបណ្តាលឱ្យធនធានមានវ័យក្មេងរូបនេះ ជ្រើសយកជំនាញ វិស្វកម្មមេកានិក គឺស្ថិតនៅក្នុងហេតុផលមួយ​ចំនួនដូចជា ភានុម៉ា ជាក្មេងម្នាក់ដែលមានលក្ខណៈពិសេសមួយដោយស្គាល់អំពីនិស្ស័យផ្ទាល់ខ្លួនក៏ដូចជា ជំនាញដែលខ្លួនចង់រៀន តាមរយៈការសាកល្បង ការសិក្សារៀនសូត្រ  ព្រមទាំងទទួលបានការត្រួសត្រាយផ្លូវពីសំណាក់អាណាព្យាបាលផងនោះ បានធ្វើឱ្យ ភានុម៉ា សម្រេចចិត្តរៀនដោយគ្មានភាពស្ទាក់ស្ទើរ។ ទន្ទឹមគ្នានោះ ភានុម៉ា ក៏បានឱ្យ​ដឹងដែរថា ការសម្រេចចិត្តមួយនេះ មិនត្រឹមតែទទួលបាននូវអត្ថប្រយោជន៍មកកាន់ខ្លួនឯងនិងគ្រួសារតែប៉ុណ្ណោះទេ ប៉ុន្តែជំនាញដែលគេកំពុងសិក្សានេះ ក៏ចូលរួមចំណែកក្នុងការអភិវឌ្ឍសង្គមជាតិក្នុងបរិមាណសមគួរផងដែរពាក់ព័ន្ធនឹងហេដ្ឋារចនាសម្ព័ន ឬការអប់រំជាដើម។

ខ្ញុំជ្រើសយកជំនាញវិស្វកម្មមេកានិក ដោយសារវាជាអ្វី ដែលខ្ញុំចូលចិត្តតាំងពីក្មេងមក ហើយមួយទៀត ខ្ញុំដឹងថាធ្វើកិច្ចការនេះ វាអាចជួយសង្គមបានច្រើន។ បើប្រយោជន៍ចំពោះខ្លួនខ្ញុំ ពេលខ្ញុំចេះជំនាញហ្នឹង ខ្ញុំអាចទៅធ្វើការ បានការងារល្អ ហើយខ្ញុំអាចធ្វើនេះធ្វើនោះបានច្រើនតាមដែលខ្ញុំចូលចិត្ត

រ៉ាឌី ភានុម៉ា ជាសិស្សមកពីសាលារៀនជំនាន់ថ្មី

ជាមួយគ្នានេះ ភានុម៉ា ក៏បាន​ឱ្យដឹងដែរ មុននឹងខ្លួន​ចូលទៅសិក្សាក្នុងកម្មវិធី Steaming Cambodia ខ្លួន​ក៏​បានហ្វឹកហាត់ដុសខាត់សមត្ថភាពជាមុនយ៉ាងក្រាសក្រែលដែរ ទាក់ទងទៅនឹងកម្មវិធីដែលត្រូវរៀន ពោលគឺធ្វើយ៉ាងណាឱ្យចេះប្រើប្រាស់  Run Summation ទៅវិញទៅមក។ បន្ទាប់ពីមានចំណេះជំនាញខ្លះៗហើយ យុវជនរូបនេះ ក៏បន្តចូលរៀនវគ្គបំប៉នបន្ថែមអំពី AdvanSix រួមទាំងកម្មវិធីជាច្រើនទៀតក្នុងកម្មវិធីសិក្សារបស់ STEAMING Cambodia ។ ដោយសារតែខ្លួនជាវិស្វកឌីស្សាញ ដូច្នេះអ្វីដែលត្រូវរៀន គឺផ្តោតទៅលើការឌីស្សាញ ដូចជាគូសរូបយកទៅផ្គុំជាមួយគ្នា ឬការបង្កើតផែនការបន្ទាប់ជាដើម។

ត្បិតថាមានការជំរុញលើកទឹកចិត្តពីអ្នក​អាណាព្យាបាលក៏ពិតមែន ប៉ុន្តែកំឡុងពេលសិក្សា ភានុម៉ា ក៏ជួបនូវបញ្ហាប្រឈមមួយចំនួនដែរ ។ បញ្ហា​ទាំងនោះ​មាន​ដូចជា រូបគេមិនទាន់មានសមត្ថភាពពេញលេញក្នុងការស្គាល់កម្មវិធី ហើយសូម្បីតែកុំព្យូទ័រក៏មិនបានដឹងព័ត៌មានច្រើន ដែលបណ្តាលឱ្យ ភានុម៉ា ពិបាកក្នុងការស្វែងរកកុំព្យូទ័រប្រើប្រាស់ ហើយចំពោះប្រភេទកម្មវិធីដែលត្រូវយកមកប្រើប្រាស់សម្រាប់ឌីស្សាញ ភានុម៉ា បានឱ្យដឹងថា ហាក់មិនមានភាពទូលាយទេ ដែលបង្ខំឱ្យខ្លួន​ត្រូវសម្រេចិត្តប្រើប្រាស់កម្មវិធីមិនផ្លូវការមួយចំនួន ហើយកាលដែលធ្វើបែបនេះ វាមិនឆ្លើយតបនឹងតម្រូវការក្នុងរយៈពេលវែងទាល់តែសោះ។

ភានុម៉ា បន្ថែមថា ខ្លួនគេផ្ទាល់មិនធ្លាប់មានអារម្មណ៍ប្លែកខុសគេម្តងណាឡើយ ដោយគ្រាន់តែរៀនជំនាញទាំងមានវ័យក្មេងខណៈទស្សនៈមួយចំនួនយល់ឃើញថា ដើម្បីសិក្សាជំនាញមេកានិចបាន គឺទាល់តែមនុស្សមានវ័យជំទង់ ឬយុវវ័យ ឬបញ្ចប់ការសិក្សាទុយភូមិទើបចាប់ផ្តើមរៀនជំនាញនេះបាន។ បើទោះបីជាវ័យរបស់ ភានុម៉ា នៅកំពុងពេញសប្បាយ និងកម្សាន្តលេងជាមួយមិត្តនៅឡើយ ប៉ុន្តែបែរជាផ្តោតពេលស្ទើរតែទាំងស្រុងទៅលើការសិក្សា ក៏ ភានុម៉ា នៅតែបង្ហាញការពេញចិត្តចំពោះអ្វីដែលគេបានជ្រើសរើស។ លើសពីនោះ ភានុម៉ា ថែមទាំងមានមោទនភាពចំពោះខ្លួន​ឯងទៀតផង ព្រោះយល់ថាខ្លួនកំពុងតែចំណាយពេលដ៏ត្រឹមត្រូវ និងរៀនអ្វីដែលចាំបាច់តាំងតែពីនៅជាវ័យក្មេង។ ភានុម៉ា រំលេចឱ្យដឹងអំពីឆន្ទៈដែលរូបគេបានរៀនកន្លងមកថា នឹងយកទៅជួយខ្លួនឯង និងសង្គមតាមរយៈអភិវឌ្ឍ roboting នៅស្រុកខ្មែរ។

ខ្ញុំអត់សូវខ្វល់ខ្លាំងទេ ដោយសារ ខ្ញុំគិតថា បើមនុស្សខ្ញុំ ខ្ញុំខុសគេ មានន័យខ្ញុំរៀនបានពីក្មេងទៅកាន់តែល្អ មានន័យថាយើងអត់ពិបាកចាយពេលចាស់ទៅអញ្ចឹងទេ។ ហើយបើរឿងលេងខ្ញុំក៏អត់សូវខ្លាំងដែរ មានន័យថា ខ្ញុំច្រើនផ្តោតពេលរបស់ខ្ញុំទៅលើ 3D Design ដោយសារខ្ញុំដឹងថា អាហ្នឹង! វាជួយខ្ញុំបានច្រើន….

រ៉ាឌី ភានុម៉ា ជាសិស្សមកពីសាលារៀនជំនាន់ថ្មី

ភានុម៉ា បន្ថែមថា ការរៀនពីក្មេងទៅនេះ ក៏វាអាស្រ័យទៅលើមនុស្ស និងស្ថានភាពជាក់ស្ដែងដែរ គ្រាន់តែថាអ្វីដែលភានុម៉ាបានសម្រេចចិត្តនេះ ព្រោះគិតថាវានឹងចំណេញពេលច្រើនសម្រាប់ប្រើប្រាស់នៅថ្ងៃអនាគត់៕