ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមចំណាត់ថ្នាក់មុខវិជ្ជាឆ្នាំ២០២៦ របស់ Times Higher Education (THE) ប្រទេសសិង្ហបុរីឈរនៅលំដាប់ទី១ ក្នុងតំបន់អាស៊ីអាគ្នេយ៍ ដោយមានសាកលវិទ្យាល័យជាប់ចំណាត់ថ្នាក់ក្នុងចំណោមសាកលវិទ្យាល័យកំពូលទាំង ២០ របស់ពិភពលោកលើមុខវិជ្ជាវិទ្យាសាស្ត្រកុំព្យូទ័រ។
សាកលវិទ្យាល័យសិង្ហបុរី និងសាកលវិទ្យាល័យបច្ចេកវិទ្យាណានយ៉ាង គឺជាស្ថាប័ន ២ ក្នុងតំបន់អាស៊ីអាគ្នេយ៍ ដែលជាប់ចំណាត់ថ្នាក់កំពូលទាំង ២០ របស់ពិភពលោក។ ខណៈ NUS ជាប់ចំណាត់ថ្នាក់លេខ ១៣ ក្នុងចំណាត់ថ្នាក់ឆ្នាំ២០២៦ ដែលចេញផ្សាយកាលពីថ្ងៃពុធសប្ដាហ៍មុន ដោយ Times Higher Education មានមូលដ្ឋាននៅចក្រភពអង់គ្លេស ដោយធ្លាក់ចុះពីរចំណាត់ថ្នាក់ពីឆ្នាំ២០២៥ ខណៈដែល NTU ឡើងដល់លេខ ១៦ ពីលេខ ១៩ កាលពីឆ្នាំមុន។
នៅក្នុងចំណាត់ថ្នាក់សាកលវិទ្យាល័យពិភពលោក THE ឆ្នាំ២០២៦, NUS ជាប់ចំណាត់ថ្នាក់លេខ ១៧ ខណៈដែល Nanyang ជាប់ចំណាត់ថ្នាក់លេខ ៣១។
ចំណាត់ថ្នាក់វិទ្យាសាស្ត្រកុំព្យូទ័រ វាយតម្លៃការអនុវត្តនៅគ្រប់ផ្នែកនៃមុខវិជ្ជា ការអភិវឌ្ឍន៍កម្មវិធី និងវិស្វកម្ម បញ្ញាសិប្បនិម្មិត និងម៉ាស៊ីនចេះរៀន ព្រមទាំងជំនាញសន្តិសុខសាយប័រ និងបណ្ដាញ។ THE បានវាយតម្លៃសាកលវិទ្យាល័យចំនួន ១១៦៥ មកពីប្រទេស និងដែនដីចំនួន ៨៤ ដោយប្រើសូចនាករ នៃការអនុវត្តចំនួន ១៨ ។
ដើម្បីទទួលបានសិទ្ធិចូលរួមក្នុងការវាយតម្លៃ ស្ថាប័ននានាត្រូវបំពេញតាមកម្រិតនៃការបោះពុម្ពផ្សាយយ៉ាងហោចណាស់ មានលទ្ធផលស្រាវជ្រាវចំនួន ៥០០ ក្នុងរយៈពេល ៥ឆ្នាំ ចាប់ពីឆ្នាំ២០២០ ដល់ ២០២៤។
សាកលវិទ្យាល័យ Oxford នៅចក្រភពអង់គ្លេសត្រូវបានគេដាក់ឈ្មោះថា ជាសាកលវិទ្យាល័យល្អបំផុតរបស់ពិភពលោកសម្រាប់វិទ្យាសាស្ត្រកុំព្យូទ័រ។ ដោយឡែក សាកលវិទ្យាល័យ Peking របស់ចិន ជាប់ចំណាត់ថ្នាក់ល្អបំផុតនៅអាស៊ី និងជាស្ថាប័នតែមួយគត់នៅតំបន់អាស៊ី ជាប់ចំណាត់ថ្នាក់ក្នុងចំណោមសាកលវិទ្យាល័យកំពូលទាំង ១០ របស់ពិភពលោក។
សាកលវិទ្យាល័យចំនួន ៥៦ មកពីអាស៊ីអាគ្នេយ៍ត្រូវបានដាក់បញ្ចូលក្នុងការវាយតម្លៃនេះ ដែលក្នុងនោះ ប្រទេសសិង្ហបុរីជាប់ចំណាត់ថ្នាក់ខ្ពស់បំផុតក្នុងតំបន់ និងប្រទេសម៉ាឡេស៊ីមានសាកលវិទ្យាល័យច្រើនជាងគេ គឺ ២០ស្ថាប័ន៕
