សុខភាពខួរក្បាល និងសមត្ថភាពនៃការចងចាំ គឺជាផ្នែកមួយដ៏សំខាន់ក្នុងការរស់នៅប្រចាំថ្ងៃ។ ដូចទៅនឹងសាច់ដុំដែរ ខួរក្បាលរបស់យើង ត្រូវការលំហាត់ប្រាណទៀងទាត់ ដើម្បីមានសុខភាពល្អ និងគិតបានរហ័ស។ យោងតាមការស្រាវជ្រាវ បានបង្ហាញថា មានទម្លាប់សាមញ្ញ ៦ ដែលអាចជួយពង្រឹងសុខភាពខួរក្បាល និងការចងចាំបានល្អ។

១. រៀនឧបករណ៍ភ្លេងថ្មីៗ ៖ ការរៀនលេងឧបករណ៍ភ្លេងមិនត្រឹមតែជាសកម្មភាពដ៏រីករាយ និងប្រកបដោយភាពច្នៃប្រឌិតប៉ុណ្ណោះទេ ប៉ុន្តែនេះក៏ជាវិធីសាស្ត្រដ៏មានឥទ្ធិពលក្នុងកាពង្រឹងសមត្ថភាពចងចាំរបស់យើងផងដែរ។ ទម្លាប់នេះអាចរំញោចផ្នែកផ្សេងៗនៃខួរក្បាល និងពង្រឹងមុខងារយល់ដឹង និងវែកញែករកហេតុផល។ ការសិក្សាមួយដែលត្រូវបានផ្សាយនៅក្នុង Journal of Neuroscience បានរកឃើញថា ការរៀនតន្រ្តី អាចនាំឱ្យមានភាពប្រសើរឡើងនៃការចងចាំ និងខួរក្បាល។ សូម្បីតែអនុវត្ត ពីរ ឬបីនាទីក្នុងមួយថ្ងៃ ក៏អាចធ្វើឱ្យមានការរីកចម្រើន គួរឱ្យកត់សម្គាល់លើសមត្ថភាពចងចាំរបស់អ្នកដែរ។ 

២. មានសកម្មភាពរាងកាយ ៖ ក្រៅពីល្អសម្រាប់រាងកាយ ការធ្វើសកម្មភាពទៀងទាត់ ថែមទាំងមានអត្ថប្រយោជន៍សម្រាប់ខួរក្បាលទៀតផង។ លំហាត់ប្រាណអាចបង្កើនលំហូរឈាមទៅកាន់ខួរក្បាល ដែលជួយរក្សាខួរក្បាលឱ្យមានសុខភាពល្អ និងបង្កើនមុខងារយល់ដឹង និងវែកញែកហេតុផល។ ការស្រាវជ្រាវរបស់ British Journal of Sports Medicine បង្ហាញថា សូម្បីតែការធ្វើលំហាត់ប្រាណកម្រិតមធ្យម ដូចជាការដើរ ឬជិះកង់ ក៏អាចបង្កើនការចងចាំ និងពង្រឹងសមត្ថភាពរៀនសូត្របានដែរ។ ការសិក្សាបានរកឃើញទៀតថា ការធ្វើលំហាត់ប្រាណកម្រិតមធ្យមយ៉ាងហោចណាស់ ៣០នាទីក្នុងមួយថ្ងៃ អាចជាជម្រើសដ៏ល្អ។

៣. លេងហ្គេមចងចាំ និងល្បែផ្គុំរូប ៖ មិនខុសពីរាងកាយនោះទេ ខួរក្បាលរបស់មនុស្សត្រូវការការហាត់ប្រាណជាប្រចាំ ដើម្បីរក្សារូបរាង និងមានសុខភាពល្អ។ ការចូលរួមក្នុងការគិត និងរិះរកវិធីដោះស្រាយបញ្ហា អាចជួយអ្នកបង្កើនការចងចាំ និងពង្រឹងមុខងារយល់ដឹង។ មានកម្មវិធី និងហ្គេមជាច្រើន ដែលត្រូវបានរចនាឡើងជាពិសេស ដើម្បីពង្រឹងសមត្ថភាពចងចាំ។ វាអាចផ្ដល់នូវភាពរីករាយ និងអន្តរកម្ម ដើម្បីភ្ជាប់ខួរក្បាលរបស់អ្នកទៅនឹងការគិត និងពង្រឹងជំនាញដោះស្រាយបញ្ហា។ ការសិក្សាមួយនៅក្នុង Journal of Cognitive Enhancement បានរកឃើញថា មនុស្សដែលចូលរួមក្នុងសកម្មភាពរំញោចខួរក្បាលជាប្រចាំ មានការចងចាំ និងសមត្ថភាពយល់ដឹងប្រសើរឡើងឆាប់រហ័ស។

៤. ញ៉ាំអាហារដែលជួយបង្កើនសកម្មភាពខួរក្បាល ៖ អាហារដែលមនុស្សបរិភោគ មានឥទ្ធិពលយ៉ាងខ្លាំងទៅលើសុខភាពខួរក្បាល។ របបអាហារសម្បូរដោយសារធាតុប្រឆាំងអុកស៊ីតកម្ម ខ្លាញ់ល្អ វីតាមីន និងសារធាតុរ៉ែ ផ្ដល់ថាមពល និងជំនួយដល់ការការពារ និងប្រឆាំងនឹងជំងឺខួរក្បាល។ យោងតាម Harvard health បានបង្ហាញថា របបអាហារដូចជា ផ្លែប័ររី ត្រី គ្រាប់ធញ្ញជាតិ និងបន្លែបៃតង ផ្ដល់អត្ថប្រយោជន៍ពិសេសៗជាច្រើនសម្រាប់សុខភាពខួរក្បាល។

៥. ការធ្វើសម្មាធិបានត្រឹមត្រូវ ៖ ការធ្វើសម្មាធិជួយបង្កើនការចងចាំ ធ្វើឱ្យប្រសើរឡើងនូវការផ្ដោតអារម្មណ៍ និងការយកចិត្តទុកដាក់ទៅលើកិច្ចការផ្សេងៗ ។ ការធ្វើសម្មាធិបានត្រឹមត្រូវ អាចជួយឱ្យអ្នកផ្ដោតអារម្មណ៍លើការរស់នៅក្នុងបច្ចុប្បន្នភាព កាត់បន្ថយភាពតានតឹង និងការថប់បារម្ភ ដែលជះឥទ្ធិពលវិជ្ជមានដល់មុខងារយល់ដឹងនៃខួរក្បាល។ ការសិក្សាមួយដែលត្រូវបានចេញផ្សាយនៅក្នុង Frontiers in Psychology បានរកឃើញថា ការចំណាយពេល ២ ឬ ៣ នាទី ជារៀងរាល់ថ្ងៃ ដើម្បីធ្វើសម្មាធិ អាចជួយពង្រឹងសមត្ថភាពចងចាំរបស់អ្នក។ 

៦. រៀនភាសាថ្មីៗ ៖ ការរៀនភាសាថ្មីៗ ឬប្រើច្រើនភាសាជាប្រចាំ ក្នុងការរស់នៅប្រចាំថ្ងៃ អាចជួយឱ្យខួរក្បាលរបស់យើងមានសុខភាពល្អ និងការចងចាំប្រសើរឡើង។ មនុស្សដែលប្រើភាសាពីរ ត្រូវបានផ្សារភ្ជាប់ទៅនឹងការគ្រប់គ្រងការយល់ដឹងកាន់តែប្រសើរ និងមានសមត្ថភាពចងចាំខ្ពស់។ ការស្រាវជ្រាវនៅក្នុង Journal of Experimental Psychology បានរកឃើញថា បុគ្គលដែលចេះពីរភាសាឡើងទៅ មានសមត្ថភាពខ្ពស់ក្នុងការរំលឹកឡើងវិញនូវព័ត៌មាន និងមានភាពបត់បែនក្នុងការបំពេញការងារ៕