ជាទូទៅយើងបានដឹងហើយថា ភាពសប្បាយរីករាយ ឬកាត់បន្ថយភាពស្មុគស្មាញ គឺជាការធ្វើឱ្យសុខភាពរាងកាយ និងសុខភាពផ្លូវចិត្តប្រសើរឡើងពីមួយថ្ងៃ ទៅមួយថ្ងៃ! ព្រោះការបន្ថយភាពស្មុគស្មាញ ឬអាការៈតានតឹង បានបង្កើនអាយុនៃការរស់នៅ ក៏ដូចជាពង្រឹងសុខុមាលទាំងមូល។ អារម្មណ៍ល្អ! ជំរុញការគិតល្អ! រួមទាំងជះឥទ្ធិពលវិជ្ជមានទៅដល់ការរស់នៅជាក់ស្តែងទៀតផង ហើយសុភមង្គលដែលមានភាពយូរអង្វែងគឺផ្តើមចេញពីខ្លួន​ឯង ដោយការអនុវត្ត ការគិត និងការសម្រេចចិត្តជាដើម។​

តាមរយៈ គេហទំព័រ Hello Magazine បានបង្ហាញគន្លឹះ៣ចំណុចដែលជួយឱ្យជៀសវាងទម្លាប់ទាំងឡាយណា ដែលនាំឱ្យស្មុគស្មាញ ៖​

១. ការកត់សម្គាល់អារម្មណ៍ផ្ទាល់ខ្លួន ៖ ការកត់សម្គាល់ស្ថានភាពអារម្មណ៍ខ្លួនឯងក្នុងចំណុចនេះ គឺសំដៅលើការទទួលស្គាល់អារម្មណ៍ ដែលកំពុងកើតមានដោយមិនមានការវាយតម្លៃណាមួយ មិនថាកំពុងសោកសៅ ខ្ជិល ខឹង អាក់អន់ចិត្ត រំភើប ភ័យ និងភាពស្លន់ស្លោជាដើម ដែលធ្វើយ៉ាងណាជំរុញឱ្យខ្លួនឯងមានស្មារតីស្ថិតនៅបច្ចុប្បន្នភាព។

នៅពេលដែលសង្កេតដឹងហើយ សូមព្យាយាមទទួលស្គាល់ និងបណ្តោយឱ្យរសាត់បន្តិចម្តងៗ ជំនួសឱ្យទប់ស្កាត់ ឬព្យាយាមវិភាគថា ល្អ ឬមិនល្អ ទាំងកំពុងមិនសប្បាយចិត្ត ឬក៏ចង់ផ្លាស់ប្តូរស្ថានការណ៍ភ្លាមៗ។ ការកត់សម្គាល់អារម្មណ៍ផ្ទាល់ខ្លួន និងការទទួលស្គាល់ជាធម្មជាតិនៃអារម្មណ៍ ជាការបញ្ជៀសកុំឱ្យខ្លួនឯងបណ្តុះទម្លាប់ធ្វើឱ្យសុខភាពផ្លូចិត្តស្មុគស្មាញ ឬមិនរីករាយ។

២. បង្វឹកនិងថែទាំខួរក្បាលឱ្យមានសុខភាពល្អ ៖ ខួរក្បាលមានសុខភាពមិនល្អ ជំរុញឱ្យប៉ះពាល់ដល់ការគិត, ខណៈពេលដែលមិនទាន់ធ្លាក់ចូលក្នុងស្ថានភាពធ្ងន់ធ្ងរ ឬភាពស្មុគស្មាញខ្លាំង អ្វីដែលគួរធ្វើក្នុងការអនុវត្តនោះគឺ ការអប់រំចិត្តជាប្រចាំតាមរយៈការធ្វើសមាធិ ការស្វែងរកអ្នកជំនាញដើម្បីប្រឹក្សាសុខភាពផ្លូវចិត្ត រួមទាំងការធ្វើលំហាត់ប្រាណឱ្យបានរាល់ថ្ងៃ។ បង្វឹក និងថែរទាំខួរក្បាលឱ្យមានសុខភាពល្អមានន័យថា ធ្វើយ៉ាងណាឱ្យខ្លួនឯងអនុវត្តន៍សកម្មភាពប្រចាំថ្ងៃក្នុងការទប់ស្កាត់ គ្រប់គ្រងទម្លាប់មិនល្អដើម្បីរក្សាសុខុមាលភាពផ្លូវចិត្តឱ្យនឹងធឹង។

៣. និយាយជាមួយខ្លួនឯង ឬមនុស្សដែលទុកចិត្ត ៖ នៅពេលកើតមានភាពស្មុគស្មាញ គឺជំរុញឱ្យមានភាពច្របូកច្របល់ជាច្រើននៅក្នុងចិត្ត ហើយនៅពេលដែលបៀមទុក្ខរឿងរ៉ាវទាំងនេះយូរៗទៅ វានឹងបង្កឱ្យសុខភាពផ្លូវចិត្តមានបញ្ហាក្នុងកម្រិតណាមួយ។ ដូច្នេះ សូមនិយាយជាមួយខ្លួនឯង ឬមនុស្សដែលទុកចិត្ត​ ចាត់ជាកត្តាមួយជួយឱ្យជំរុញឱ្យភាពមន្ទិលទាំងឡាយ បានធូរស្រាលជាងមុន ហើយការនិយាយជាមួយខ្លួនឯងទៀតសោធ អាចនិយាយនៅមុខកញ្ចក់ ការស្មឹងស្មាធិ៍នៅក្បែរធម្មជាតិ ឬការសរសេរកំណត់ហេតុចេញមកក្រៅជាដើម៕