ជំនាញទំនាក់ទំនង គឺជាជំនាញដ៏មានសារៈសំខាន់សម្រាប់ភាពជោគជ័យនៅកន្លែងការងារ ការកសាងទំនាក់ទំនង និងបង្កើតឥទ្ធិពលលើអ្នកដទៃ។ ទោះជាយ៉ាងណាក៏ដោយ មិនមែនមនុស្សគ្រប់គ្នាសុទ្ធតែកើតមកមានទេពកោសល្យ និងទំនុកចិត្តក្នុងការទំនាក់ទំនងពីធម្មជាតិនោះទេ។ នោះហើយ ជាមូលហេតុដែលការអានសៀវភៅ ពាក់ព័ន្ធនឹងការពង្រឹងជំនាញទំនាក់ទំនង មានសារៈសំខាន់ សម្រាប់ការអភិវឌ្ឍអាជីព។ ខាងក្រោមនេះ ជាអត្ថប្រយោជន៍ ៥ ដែលទទួលបានពីការអានសៀវភៅ ជំនាញទំនាក់ទំនង សម្រាប់ការអភិវឌ្ឍអាជីព។

១. បង្កើនទំនុកចិត្ត ៖ អត្ថប្រយោជន៍ចម្បងមួយនៃការអានសៀវភៅ ពាក់ព័ន្ធនឹងការពង្រឹងជំនាញទំនាក់ទំនង គឺ អាចជួយអ្នកបង្កើនទំនុកចិត្ត និងឱ្យតម្លៃខ្លួនឯង។ សៀវភៅជាច្រើន នឹងផ្ដល់នូវបច្ចេកទេស និងគន្លឹះជាក់ស្ដែង លំហាត់ និងឧទាហរណ៍ ដែលអាចជួយអ្នកយកឈ្នះលើអារម្មណ៍ភ័យខ្លាច ការសង្ស័យ និងអារម្មណ៍មិនស្រណុកចិត្ត អំឡុងពេលទំនាក់ទំនង ។ តាមរយៈការអនុវត្តអ្វីដែលអ្នកបានរៀន អ្នកអាចអភិវឌ្ឍផ្នត់គំនិតវិជ្ជមាន ធ្វើឱ្យសម្ដីមានទម្ងន់ និងមានភាពច្បាស់លាស់។ អ្នកក៏អាចរៀនសូត្រពីរបៀបដោះស្រាយបញ្ហាក្នុងស្ថានការតានតឹងណាមួយ តាមរយៈ ការផ្ដល់មតិយោបល់ ការដោះស្រាយជម្លោះ ឬការរិះគន់ផងដែរ។

២. ពង្រឹងចំណេះដឹង ៖ ប្រយោជន៍មួយទៀតនោះគឺពង្រីកចំណេះដឹង និងការយល់ដឹងអំពីប្រធានបទ និងទស្សនៈ ដែលមានភាពចម្រុះ។ ការប្រាស្រ័យទាក់ទង មិនមែនគ្រាន់តែជាការនិយាយ ឬសរសេរប៉ុណ្ណោះទេ ប៉ុន្តែក៏ជាការស្ដាប់ និងរៀនសូត្រដូចគ្នា។ តាមរយៈការអានស្នាដៃរបស់អ្នកនិពន្ធផ្សេងៗ ដែលមានការយល់ឃើញ និងមកពីវិស័យខុសៗគ្នា អាចបង្រៀនអ្នកអំពីគំនិត ការយល់ដឹង និងព័ត៌មានថ្មីៗ។ ជាពិសេស អ្នកក៏អាចរៀនពីរបៀបទំនាក់ទំនង ប្រកបដោយប្រសិទ្ធភាព ជាមួយនឹងអ្នកដទៃ ដែលមានវប្បធម៌ ផ្នត់គំនិត និងរបៀបគិតខុសពីអ្នក។

៣. បង្កើនភាពច្នៃប្រឌិត ៖ ចំណុចដែលរឹតតែពិសេសនោះ គឺ ការអានសៀវភៅប្រភេទនេះ អាចជួយអ្នកបង្កើនភាពច្នៃប្រឌិត និងគំនិតបង្កើតថ្មី។ ការប្រាស្រ័យទាក់ទង មិនត្រឹមតែជាការបញ្ចូនព័ត៌មានប៉ុណ្ណោះទេ ប៉ុន្តែជាការបង្កើតគុណតម្លៃ និងមានឥទ្ធិពលចំពោះគ្នាទៅវិញទៅមក។ តាមរយៈការអានបានច្រើន នឹងជំរុញឱ្យអ្នកកាន់តែចង់រៀនសូត្រ មានការស្រមើស្រមៃខ្ពស់ អាចអភិវឌ្ឍសមត្ថភាពគិតបែបត្រិះរិះ ការដោះស្រាយបញ្ហា និងការនិយាយពន្យល់អ្នកដទៃ។

៤. ពង្រឹងទំនាក់ទំនង ៖ ការប្រាស្រ័យទាក់ទង មិនត្រឹមតែជាការបង្ហាញពីខ្លួនអ្នកប៉ុណ្ណោះទេ ប៉ុន្តែជាការភ្ជាប់ទំនាក់ទំនង និងបង្ហាញការយល់ចិត្ត និងអារម្មណ៍មនុស្សជុំវិញខ្លួន។ តាមរយៈការអានសៀវភៅ អំពីជំនាញទំនាក់ទំនង អ្នកនឹងអាចស្វែងយល់អំពីរបៀបស្ដាប់ដៃគូសន្ទនាបានត្រឹមត្រូវ ការសួរសំណួរ ការផ្ដល់មតិយោបល់ និងបង្ហាញការពេញចិត្តចំពោះដៃគូ។ លើសពីនេះ អ្នកក៏អាចរៀនពីរបៀប ដោះស្រាយវិវាទ ការចរចា ដើម្បីទទួលបានលទ្ធផល ឈ្នះ – ឈ្នះ និងការធ្វើការងារជាក្រុម ប្រកបដោយប្រសិទ្ធភាព។

៥. អភិវឌ្ឍអាជីព ៖ តាមរយៈការអាន អ្នកនឹងយល់អំពីរបៀបបង្ហាញគុណតម្លៃ និងសក្តានុពលរបស់ខ្លួន ទៅកាន់ អតិថិជន ក្រុមការងារ ឬថ្នាក់ដឹកនាំជាដើម។ ចំណុចនេះ នឹងធ្វើឱ្យអ្នកដទៃ បានឃើញពីភាពខ្លាំង ស្នាដៃ និងឆន្ទៈ របស់អ្នកបានដោយងាយ។ ដូច្នេះ អ្នកនឹងទទួលបានឱកាសខ្ពស់ ក្នុងការឆ្ពោះទៅរកភាពជោគជ័យក្នុងអាជីព៕