សុខភាពល្អ ជាចំណុចមួយដែលមនុស្សគ្រប់ស្រទាប់វណ្ណៈប្រាថ្នាចង់បាន ហើយពេលខ្លះដើម្បីទទួលបានចំណុចដ៏សំខាន់នេះ មនុស្សជាច្រើនបានអនុវត្តន៍ទាំងមានភាពលំបាក រហូតដល់ពេលខ្លះបោះបង់ចោលក៏មាន ។ យោងតាមគេហទំព័រ NPR​ បានបង្ហាញសកម្មភាពបួនចំណុចងាយ ហើយគ្រប់គ្នាសុទ្ធតែអាចធ្វើបាន ដើម្បីទទួលបានសុខភាពល្អ ៖

 ១. បង្កើនឱកាសទទួលបានសុខភាពល្អដោយមិនបាច់ទៅទីតាំងហាត់ប្រាណផ្ទាល់ ៖ មិនចូលចិត្តកន្លែងហាត់ប្រាណមែនទេ? កុំបារម្ភពេក! វាមិនមែនជាបញ្ហាដែលបង្អាក់លោកអ្នកពីការទទួលបានសុខភាពល្អនោះទេ។ អ្នកវិទ្យាសាស្រ្តបានបង្ហាញថា អ្នកនៅតែអាចធ្វើឱ្យរាងកាយមានភាពសកម្មក្នុងការរស់នៅប្រចាំថ្ងៃ។ ហើយទង្វើដែលជំរុញឱ្យរាងកាយទទួលបានលំហាត់ប្រាណរស់រវើក លោកអ្នកគ្រាន់តែដើរចុះដើរឡើងជុំវិញទីស្នាក់អាស្រ័យ។ បើក្នុងករណីលោកអ្នក មានកន្លែងរស់នៅច្រើនជាន់ វាគឺជាឱកាសមួយជំរុញឱ្យអ្នកមានចលនាតាមរយៈការចុះឡើងៗ ។ បើមិនដូច្នោះទេ អ្នកអាចធ្វើឱ្យ​រាងកាយមានចលនាតាមរយៈការរាំ ការពត់ខ្លួនទៅមុខទៅក្រោយ ។ ការចលនារាងកាយ ឱ្យរឹងមាំមិនទាមទារឱ្យលោកអ្នកចាំបាច់ត្រូវតែទៅទីតាំងហាត់ប្រាណនោះទេ ទីណាក៏អាចអនុវត្តន៍បានដែរឱ្យតែមានការតាំងចិត្តធ្វើវាឱ្យបានជាប្រចាំ។

២. សកម្មភាពសាមញ្ញៗប៉ុន្តែទទួលបានផលវិជ្ជមានច្រើន ៖ រឿងរ៉ាវខ្លះ វាសាមញ្ញទេ ប៉ុន្តែវាបានជំរុញឱ្យលោកអ្នកទទួលបានផលចំណេញច្រើន ជាក់ស្ដែងការទៅកម្សាន្ត ឬទៅកន្លែងដែលមានធម្មជាតិ វាអាចកាត់បន្ថយការចំណាយ ប៉ុន្តែផ្តល់អត្ថប្រយោជន៍ជាច្រើនទៅកាន់សុខភាពផ្លូវចិត្តរបស់អ្នក។

៣. រៀនសូត្រអំពីការរស់នៅរបស់ជនជាតិជប៉ុន ៖ ជាមេរៀនមួយពីជនជាតិជប៉ុន គឺរាងកាយមានភាពរហ័សរហួន និងបន្សាំជាមួយនឹងការធ្វើចលនារាងកាយជាប្រចាំ ។ ដែលគំរូភាពមួយនេះ នាំឱ្យមនុស្សមានសុខភាពល្អ និងស្វាហាប់។ ជនជាតិជប៉ុន គឺមានទម្លាប់ក្នុងការដើរ ហើយពេលត្រូវធ្វើដំណើរ គឺពួកគាត់ត្រូវធ្វើដំណើរតាមរយៈរថភ្លើង ដែលជាហេតុតម្រូវឱ្យមានការដើរ ដែលក្នុងករណីនេះវាបង្កឱ្យមានផាសុកភាពក្នុងការរស់នៅ ។ ជារួមអ្វីដែលអាចរៀនសូត្រពីជនជាតិជប៉ុន ក្នុងការបង្កើនសុភមង្គល គឺការធ្វើឱ្យរាងកាយមានភាពសកម្ម។

៤.​ កាត់ចោលភាពឯកោប្រកបដោយភាពច្នៃប្រតិដ្ឋ ៖ ភាពឯកោ ជាចំណែកមួយជំរុញឱ្យអ្នកមានបញ្ហាសុខភាពផ្លូវចិត្តរួមទាំងបង្កើតឱកាសឱ្យមានជំងឺគាំងបេះដូង និងមហារីក។ បច្ចុប្បន្ននេះ មានមនុស្សជាច្រើនប្រឈមនឹងភាពឯកោដោយកត្តាផ្សេងៗគ្នា ប៉ុន្តែការសិក្សាមួយបានបង្ហាញថា ការផ្សារភ្ជាប់ខ្លួនឯងទៅនឹងរូបភាព ឬសិល្បៈ រួមទាំងសកម្មភាពដែលជំរុញនៅភាពច្នៃប្រតិដ្ឋទាំងឡាយ គឺអាចជួយកាត់បន្ថយបញ្ហាស្រ្តេស និងអារម្មណ៍ដែលឯកា។

៥. ជៀសចាកអាហារកែច្នៃហើយចាប់យកអាហារមានសារធាតុចិញ្ចឹម ៖  ភាពមមាញឹកបណ្តាលឱ្យមនុស្សសម័យថ្មី ជ្រើសយកអាហារដែលងាយៗ និងអាហារដែលចម្អិនរួចស្រាប់ ដែលចំណីអាហារទាំងនោះ ពេលខ្លះក៏មានមានជាតិខ្លាញ់ច្រើន ឬមានសារធាតុផ្ទុកគុណភាពដើម្បីឱ្យលក់បានក្នុងរយៈពេលវែង បន្ទាប់​មកវាបានបង្កនូវផលប៉ះពាល់ទៅកាន់សុខភាព និងផលរំខានដល់ការរស់នៅប្រចាំថ្ងៃ ក៏ដូចជាបង្អាក់ក្នុងការបង្កើនផលិតភាព និងជាដើមចមនាំឱ្យមនុស្សមិនទទួលបានសុខភាពល្អ។ ដូច្នេះការជ្រើសយកអាហារដែលមានសារធាតុចិញ្ចឹម និងមានជីវជាតិគ្រប់គ្រាន់ គឺជាការរួមចំណែកក្នុងការពង្រឹងបាននៅសុខភាពល្អទាំងចិត្តនិងកាយ៕