ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មិនថាការសិក្សា ឬក៏ភារកិច្ចប្រភេទណានោះទេ! ការចាប់ផ្តើមដំបូងៗ គឺជៀសពុំរួចពីការបង្កើតកំហុស ការដើរយឺត ហើយក៏ពុំមានការចាប់ផ្តើមទាំងអស់ ដែលសុទ្ធតែមានផែនការសម្រាប់វាស់វែងលទ្ធផលនីមួយៗនោះដែរ។ ប៉ុន្តែរាល់កិច្ចការទាំងអស់ សុទ្ធតែត្រូវការភាពម្ចាស់ការ ទំនួលខុសត្រូវ ភាពជាអ្នកដឹកនាំ ក៏ដូចជាការរៀបចំពេលវេលាជាដើម ហើយជាពិសេសនោះគឺការតម្រង់ទិស និងទទួលបានការណែនាំ។
តាមរយៈគេហទំព័រ Chevening បានឱ្យដឹងថា ក្រៅពីការគ្រប់គ្រងភារកិច្ចក្នុងនាមជាសិស្ស និងសម្រួលដល់កិច្ចការក្រុម ឬមិនថាក្នុងតួនាទីដែលដឹកនាំ ចាំបាច់ត្រូវការវិធីសាស្រ្តបន្ថែម និងការណែនាំ ឬភាពក្លាហាន ដើម្បីធានាឱ្យបាននូវផលិតភាពកិច្ចការ មិនថា ការងារ ការសិក្សា ឬក៏កិច្ចការសហគមន៍នោះទេ។
ពន្លឿនភាពរីកចម្រើនតាមរយៈទទួលការណែនាំបន្ថែម ៖ ការសិក្សានៅសាលារៀនក្ដី ការចាប់ផ្តើមការងារក្ដី លោកអ្នកនឹងប្រទះនូវស្ថានភាពមួយចំនួនដូចជា ភាពឯកោ ការកប់ចោលនូវទេពកោសល្យជាច្រើនទាំងនៅវ័យក្មេង ឬទទួលរងការមិនអើពើ ជាពិសេសកើតមានចំពោះមនុស្សដែលមានវ័យកំពុងលូតលាស់ ឬហៅថា ក្រុមវ័យជំទង់ ដោយចំណោទបញ្ហាមួយនេះ មិនត្រឹមតែត្រូវការភាពក្លាហាន ឬក៏វិធីសាស្រ្តដែលបានពីការស្វែងយល់ដោយខ្លួនឯងនោះទេ ប៉ុន្តែត្រូវការជ្រោមជ្រែងពីមជ្ឈដ្ឋានដទៃទៀត ដូចជា រៀមច្បង អ្នកប្រឹក្សា អ្នកមានបទពិសោធន៍ ឬអ្នកពាក់ព័ន្ធនានាលើជំនាញនីមួយៗ រួមទាំងមិត្តភ័ក្តិ និងអ្នកណែនាំអាជីពជាដើម ដើម្បីទទួលបាន ការតម្រង់ទិសបន្ថែមក្នុងការជួយបំបែកកិច្ចការលំបាកៗ ឱ្យមានភាពងាយស្រួល ឬជាការទទួលយកយោបល់បន្ថែមក្នុងការដោះស្រាយបញ្ហាចំពោះមុខឱ្យមានភាពសម្បូរបែបជាងមុន ឬមានភាពបត់បែនជាងមុន។
របៀបនៃការជ្រើសរើសអ្នកណែនាំ ឬអ្នកតម្រង់ទិស ៖ អ្នកតម្រង់ទិសដែលជួយជំរុញឱ្យទទួលបាននូវភាពជោគជ័យពុំមែនផ្តោតលើ អ្នកដែលមានគោរម្យងារ ឬតួនាទីខ្ពស់ ឬអ្នកមានឥទ្ធិពលក្នុងសង្គមនោះទេ ប៉ុន្តែជាបុគ្គលដែលស្គាល់នូវគុណតម្លៃនៃមុខជំនាញនីមួយៗ ឬជាបុគ្គលដែលយល់កាលៈទេសៈ និងមានទឹកចិត្តក្នុងការផ្តល់យោបល់ដែលឆ្លើយតបអំពីអ្វីដែលសិស្ស ឬក៏អ្នកធ្វើការត្រូវការ។ ឬអាចនិយាយបានថា ជាមនុស្សមានបទពិសោធន៍ឆ្លងកាត់នូវអ្វីដែលលោកអ្នកកំពុងធ្វើ ឬជាមិត្តដែលកំពុងធ្វើដំណើរទៅកាន់គោលដៅស្រដៀងៗគ្នា។
ផ្តល់តម្លៃលើការប្តេជ្ញាចិត្ត ឱ្យច្រើនជាងភាពល្អឥតខ្ចោះ ៖ សិស្សដែលពូកែបានយូរ មិនមែនដោយសារពួកគេមានទម្លាប់រៀន និងឆ្លាតពីកំណើតទាំងអស់នោះទេ ប៉ុន្តែបានមកពីការបណ្តុះភាពស្មោះត្រង់ ការរក្សាទម្លាប់ជាប់លាប់ក្នុងដំណើរការសិក្សា ការបន្តសួរសំណួរទោះបីដឹងថា មិនសូវជាល្អដូចអ្នកដទៃ។ ជារួមគឺជាក្រុមមនុស្ស ដែលផ្តោតលើដំណើរការជាងការរំពឹងទុកតែលទ្ធផលមួយមុខ។ ហើយក្នុងនាមជាសិស្ស ឬអ្នកចាប់ផ្តើមការងារ ការជ្រើសរើសអ្នកណែនាំក៏ដូចគ្នា គួរសម្លឹងមើលអ្នកណាដែលផ្តោតទៅលើដំណើរឆ្ពោះទៅមុខ ជាជាងផ្តោតលើភាពល្អឥតខ្ចោះ៕
