ការសម្អាតផ្ទះមិនគ្រាន់តែជួយឱ្យផ្ទះរបស់អ្នកមើលទៅមានរបៀបរៀបរយ និងសោភណ្ឌភាពស្រស់ស្អាតនោះទេ។ សកម្មភាពនេះក៏ជាមធ្យោបាយមួយ ពង្រឹងសមត្ថភាពគិត និងជួយឱ្យសុខុមាលភាពប្រសើរឡើងផងដែរ។ នេះបើតាមសង្ឃដីការរបស់ព្រះសង្ឃ Zen ជនជាតិជប៉ុន Andy Matsumoto និងជាអ្នកនិពន្ធ «A Monk’s Guide to a Clean House and Mind»។

ព្រះតេជគុណ Matsumoto បានបន្តមានសង្ឃដីកាថា ការសម្អាតផ្ទះ បានផ្ដល់អត្ថប្រយោជន៍សំខាន់ៗចំនួន ៤ ដល់ស្មារតី និងការគិតរបស់មនុស្ស។

១. ការផ្ដោតទៅលើបច្ចុប្បន្នភាព ៖ នៅពេលដែលអ្នកសម្អាតផ្ទះ រឿងដែលសំខាន់បំផុត គឺត្រូវផ្ដោតអារម្មណ៍លើកិច្ចការចំពោះមុខ និងធ្វើយ៉ាងណាគ្រប់គ្រងខ្លួនឯងមិនឱ្យបែកអារម្មណ៍។ សកម្មភាពនេះ អាចជួយឱ្យអ្នកមានចិត្តស្ងប់ ជាពិសេសអាចពង្រឹងការយកចិត្តទុកដាក់ និងផ្ដោតអារម្មណ៍ចំពោះការរស់នៅក្នុងពេលបច្ចប្បន្នបានល្អ។

២. បោះបង់ការគិត និងអារម្មណ៍អវិជ្ជមាន ៖ ខណៈពេលដែលអ្នកសម្អាត អ្នកអាចនឹងកត់សម្គាល់ដឹងថា អ្នកចាប់ផ្ដើមគិតអំពីរឿងរ៉ាវផ្សេងៗ ដែលរំខានការគិតរបស់អ្នក។ យ៉ាងណាមិញ ជំនួសឱ្យការនឹកដល់រឿងរ៉ាវទាំងនោះ អ្នកអាចហ្វឹកហ្វាត់ធ្វើជាមិនខ្វល់ពីរឿងរ៉ាវទាំងនោះ ដោយងាកមកផ្ដោតលើការងារចំពោះមុខ។ ការធ្វើបែបនេះ នឹងនាំឱ្យការគិតរបស់អ្នកមានភាពជ្រះស្រឡះ និងអារម្មណ៍ល្អ។

៣. កសាងទំនុកចិត្តលើខ្លួន​ឯង ៖ នៅពេលដែលអ្នកបញ្ចប់ការងារសម្អាត វាអាចធ្វើឱ្យអ្នកមានអារម្មណ៍ថា អ្នកបានសម្រេចកិច្ចការអ្វីមួយដោយជោគជ័យ ហើយអារម្មណ៍នេះនឹងជួយអ្នកបង្កើនទំនុកចិត្តលើខ្លួនឯង។ សកម្មភាពនេះសាមញ្ញ ប៉ុន្តែផ្ដល់ផលវិជ្ជមានច្រើនសម្រាប់ផ្លូវចិត្ត ជាពិសេសនៅពេលដែលអ្នកមានអារម្មណ៍ស្ត្រេស ឬនឿយហត់ខ្លាំង។

៤. ភ្ជាប់ទំនាក់ទំនងជាមួយបរិយាកាសជុំវិញខ្លួន ៖ ខណៈពេលដែលអ្នកសម្អាតផ្ទះ អ្នកអាចចំណាយពេលខ្លះ ដើម្បីភ្ជាប់ទំនាក់ទំនងជាមួយបរិយាកាសជុំវិញខ្លួន និងបង្ហាញការពេញចិត្តចំពោះសណ្ដាប់ធ្នាប់ និងអនាម័យដែលខ្លួនបានសម្អាត។ ចំណុចនេះ ជួយឱ្យអ្នកមានអារម្មណ៍ថា ខ្លួនឯងបានភ្ជាប់ខ្លួនទៅនឹងបច្ចុប្បន្នភាព និងភាពវិជ្ជមានបានច្រើន។

ប្រសិនបើអ្នកជាចង់ចាប់ផ្ដើមសម្អាតផ្ទះ ជាទម្រង់នៃការសមាធិ ព្រះតេជគុណ Matsumoto បានផ្ដល់អនុសាសន៍ថា គួរចាប់ផ្ដើមពីការងារតូចៗ និងសាមញ្ញបំផុតដូចជា លាងចាន រៀបចំតុ ឬបោសផ្ទះជាដើម។ ក្រោយពីបំពេញកិច្ចការទាំងនេះបានជោគជ័យហើយ អ្នកអាចបន្ថែមកិច្ចការម្ដងបន្តិចៗរហូតដល់អាចសម្អាតផ្ទះទាំងមូលតែម្ដង៕