ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការកត់ត្រា គឺជាជំនាញមួយដែលជួយជំរុញការសិក្សា និងលទ្ធផលកិច្ចការសាលា ដោយសារសិស្សត្រូវចំណាយពេលច្រើនម៉ោងនៅក្នុងថ្នាក់រៀន រួមទាំងមានចំណុចជាច្រើន ដែលផ្តល់ការណែនាំពីសំណាក់សាស្រ្តាចារ្យ ឬលោកគ្រូ អ្នកគ្រូ។ ដូច្នេះ តើត្រូវធ្វើយ៉ាងដូចម្តេច ដើម្បីជួយដល់ការកត់ត្រា ឱ្យកាន់តែមានភាពងាយស្រួល និងមានប្រសិទ្ធភាពជាងមុន។ តាមរយៈ Kids Health បានបង្ហាញគន្លឹះ៦ចំណុចសម្រាប់ក្មេង និងមនុស្សវ័យជំទង ក្នុងការពង្រឹងជំនាញកត់ត្រា ដោយមានដូចជា សរសេរតែពាក្យគោលៗ សំខាន់ៗ, មិនមែនសរសេរគ្រប់ពាក្យ, សួរបន្ថែមនូវចំណុចខ្វះខាត, ប្រៀបធៀបជាមួយអ្វីដែលបានកត់ និងមេរៀនដែលបានអាន និងការរៀបចំទៅតាមផ្នែកនីមួយៗ ដោយវិធីទាំងនោះ ក៏មានរៀបរាប់នៅខាងក្រោមបន្ថែម ៖
១. កត់ចំណុចសំខាន់ៗ ៖ នៅក្នុងដំណាក់កាលវិទ្យាល័យ ការសរសេរកត់ត្រាទុក ជាចំណុចដ៏សំខាន់មួយ ប្រសិនបើនៅលើក្តារខៀន មានគ្រូដែលសរសេរមេរៀនឱ្យស្រាប់ៗ នេះជាភាពងាយស្រួលមួយហើយ ដោយសារតែវាងាយក្នុងការចម្លងដាក់ក្នុងសៀវភៅ។ ស្វែងរកចំណុចដែលសំខាន់ ព្រោះគ្រូខ្លះអាចនឹងលើកឡើងអំពីចំណុចសំខាន់ៗ ឬប្រាប់ដោយផ្ទាល់មាត់ ប៉ុន្តែបែរជាមានចំនួនតិចតួចដែលសរសេរចុះក្នុងក្រដាសសៀវភៅ។
២. កុំកត់ច្រើនពេក ៖ ប្រសិនបើមានជំនាញកត់លឿនៗ ជាចំណុចវិជ្ជមានមួយហើយៗ តែយ៉ាងណាមិញ ការដែលកត់ច្រើនលើសលុបពេក កត់គ្រប់ពាក្យ កត់គ្រប់ម៉ាត់ គឺនឹងនាំឱ្យពិបាកក្នុងការជ្រើសយកចំណុចសំខាន់ៗដើម្បីរំលឹកបន្ថែម។ ប្រសិនបើផ្តោតតែទៅលើការកត់គ្រប់ពាក្យ នោះនឹងធ្វើឱ្យជំនាញស្តាប់ត្រូវបានកាត់បន្ថយ។
៣. សួរសំណួរ ៖ ការសួរបញ្ជាក់បន្ថែម ក៏បានរួមចំណែកដល់ការកត់ត្រាឱ្យកាន់តែមានប្រសិទ្ធភាពជាងមុនដែរ សិស្សមិនគួរខ្មាស់អំពីការចោទសួរជាសំណួរនោះទេ! ជាពិសេសនៅពេលដែលមានភាពមិនច្បាស់លាស់នៅត្រង់ចំណុចណាមួយ។ ការសួរ មិនត្រឹមតែបង្កើនភាពច្បាស់លាល់ទៅលើការកត់សម្គាល់ប៉ុណ្ណោះទេ ប៉ុន្តែក៏ជួយឱ្យមិត្តរួមថ្នាក់មានឱកាសបានស្តាប់នៅអ្វីដែលជាភាពខ្វះចន្លោះដូចគ្នា។ មួយវិញទៀត បើមិនហ៊ានសួរនៅក្នុងថ្នាក់ ការសាកសួរក្រៅថ្នាក់រៀន ឬម៉ោងសម្រាក ក៏ជាការបញ្ជាក់បន្ថែមបានមួយផ្នែកដែរ។ ការទទួលបាននូវកំណត់ត្រា ច្បាស់លាល់ ផ្តល់អត្ថប្រយោជន៍ជាងការរក្សានូវភាពមន្ទិល។
៤. ការប្រៀបធៀប ៖ ប្រៀបធៀបការស្វ័យសិក្សា ដោយខ្លួនឯងដូចជា ការអាន និងការស្តាប់គ្រូពន្យល់ ហើយយកសាច់រឿងទាំងពីរនោះមកប្រៀបធៀបគ្នា ដាក់នៅក្នុងសៀវភៅតែមួយក្បាល។ មួយវិញទៀត យកការកត់ត្រារបស់ខ្លួនឯង ទៅប្រៀបធៀបជាមួយនឹងមិត្តភ័ក្រ។ ការធ្វើបែបនេះយូរៗ មិនត្រឹមតែទទួលបានប្រសិទ្ធភាព នៃការកត់ត្រាប៉ុណ្ណោះទេ ប៉ុន្តែក៏បង្កើនបាននូវភាពចងចាំ ការឆ្លុះបញ្ចាំងស្វែងរកកំហុស និងជាឱកាសនៃការយកពិន្ទុនៅពេលប្រឡងធ្វើត្តេសផងដែរ។
៥. ការចម្លងឡើងវិញ ៖ ស្ថិតនៅក្នុងដំណាក់កាលដែលបន្ទាន់ៗ គឺមិនអាចចម្លងបានគ្រប់ពាក្យទាំងស្រុងនោះទេ ទោះសំខាន់ក៏ដោយ ពេលខ្លះអាចគូសវាសជាសញ្ញា ហើយរៀបរៀងនិងចម្លងតាមក្រោយ។ ការចម្លងមេរៀនឡើងវិញ ឬការកែសម្រួលឡើងវិញ បានសម្រួចដល់ជំនាញសរសេរ ការចងចាំពាក្យ និងភាពច្បាស់លាស់នៃការសិក្សាផងដែរ។
៦. ការរៀបចំ ៖ បន្ទាប់ពីអនុវត្តន៍ វិធីសាស្រ្តនៃការកត់ត្រា ដោយមានប្រសិទ្ធភាពរួចហើយ អ្វីដែលគួរអនុវត្តន៍បន្ទាប់ គឺការរៀបចំ បើអាចការរៀបចំនេះ គួរមានការបែងចែកឱ្យហើយតាំងតែពីដំបូងៗមកម្ល៉េះ ដូចជាបែងចែកជាប្រភេទមេរៀន ប្រភេទជំពូក និងការកំណត់ភាពសំខាន់នៃមេរៀននីមួយៗ ដោយប្រើប្រាស់ខូល័រ ប៊ិក ឬក៏ខ្មៅដៃជាដើម។ កាលដែលពុំបានរៀបចំ រឹងរឹតតែធ្វើឱ្យមានភាពជិនណាយជាមួយនឹងមេរៀន ហើយធុញទ្រាន់ពុំចង់កត់ត្រាបន្តទៅមុខទៀត។ ជារួម វិធីសាស្រ្ត នៃការកត់ត្រា នៅតែសំខាន់ជាពិសេសសម្រាប់សិស្សវិទ្យាល័យ ប្រសិនបើពុំបានយកចិត្តទុកដាក់ គឺនាំឱ្យប៉ះពាល់ទៅកាន់ផលិតភាពនៃការសិក្សាក្នុងរយៈពេលវែង៕
