ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រសិនបើពេលខ្លះមានអារម្មណ៍ថា មិនពេញចិត្តនឹងលទ្ធផល ឬផលិតភាពអំឡុងពេលធ្វើការ អាចថា ជាសកម្មភាពមួយដែលមនុស្សជាច្រើនធ្លាប់ជួប គ្រាន់តែតិច ឬច្រើនប៉ុណ្ណោះ។ តាមរយៈ គេហទំព័រ Harvard Business Review បានបង្ហាញពីសកម្មភាពប្រចាំថ្ងៃមួយចំនួន ដែលជំរុញឱ្យសុខភាពផ្លូវចិត្តមិនល្អ និងជំរុញឱ្យបាត់បង់ផលិតភាពពីមួយពេលទៅមួយពេល។
១. មិនកំណត់រយៈពេលជាក់លាក់ណាមួយដើម្បីផ្តោត ៖ ដោយសារការងារនីមួយៗ ត្រូវការថាមពល និងរបៀបនៃការឆ្លើយតបខុសៗគ្នា ហើយកម្រិតនៃការផ្តោតក៏មានភាពខុសគ្នាដែរ! ជាមួយគ្នានោះ មានផលរំខានជាច្រើនពីអាជីពវិជ្ជាជីវៈផង និងរឿងរ៉ាវផ្ទាល់ខ្លួនផង តើត្រូវផ្តោតបានគ្រប់ពេលយ៉ាងដូចម្តេច? ការពិតទៅ ការផ្តោតមិនតម្រូវឱ្យធ្វើក្នុងរយៈពេលវែងពេក ឬផ្តោតពេញមួយថ្ងៃនោះទេ ជាប្រសិទ្ធភាពនៃការផ្តោតគឺក្នុងរយៈពេលសមល្មម ត្រឹមតែ២៥នាទីសម្រាកម្តងក៏បាន ឬ៦០ទៅ៩០នាទី! តែអ្វីដែលសំខាន់ គឺការកំណត់ឱ្យជាក់លាក់ ថា តើមួយថ្ងៃត្រូវផ្តោតប៉ុន្មាននាទី ឬប៉ុន្មានម៉ោងសម្រាប់ការងារសំខាន់នីមួយៗ។
២. ភ្លេចធ្វើទម្លាប់ប្រចាំថ្ងៃ ឬធ្វើមិនទៀងទាត់ ៖ កាលដែលធ្វើសកម្មភាពប្រចាំថ្ងៃដដែលៗ អាចនឹងនាំឱ្យមានអារម្មណ៍ហាក់មិនសូវជាស្រួលខ្លួនប៉ុន្មានទេ រួមទាំងជំរុញឱ្យមានភាពធុញទ្រាន់ ហើយនឹងមើលមិនឃើញនូវលទ្ធផលធំៗ តែសូមកុំភ្លេចថា ការរក្សាសកម្មភាពតូចៗ ប្រចាំថ្ងៃ ជាកត្តានាំទៅរកលទ្ធផលធំៗបាន។ ឧទាហរណ៍ដើម្បីឱ្យមានភាពស្ទាត់ជំនាញទៅលើការរៀននិយាយភាសាថ្មីៗ ការហ្វឹកហាត់និយាយដដែលៗរាល់ថ្ងៃ អាចនឹងនាំឱ្យកើតអាការធុញថប់បន្តិចមែន ប៉ុន្តែសកម្មភាពនេះជំរុញបាននូវភាពស្ទាត់ជំនាញ នៅគ្រាខាងមុខ ដែលនេះហើយបញ្ជាក់បានថា កាលដែលភ្លេចធ្វើទម្លាប់ប្រចាំថ្ងៃ ឬធ្វើមិនទៀងទាត់ នាំឱ្យផលិភាពធ្លាក់ចុះ និងប៉ះពាល់ទៅកាន់សុខភាពផ្លូវចិត្ត។
៣. ចង់ប្តូរភ្លាមៗ ឬប្តូរម្តងទាំងអស់ ៖ មនុស្សភាគច្រើនបានដឹងអំពីសុភាសិតចិនមួយ និយាយថា ចង់ដើរឱ្យបានមួយពាន់ជំហាន ចាំបាច់ត្រូវចាប់ផ្តើមពីមួយជំហាន វាមិនខុសគ្នាពីការបង្កើនផលិតភាព និងការបណ្តុះទម្លាប់ល្អៗនោះទេ ការគិតអំពីគោលដៅធំ ជាចាំបាច់ត្រូវតែមានហើយ ប៉ុន្តែការចាប់ផ្តើមពីចំណុចតូចៗទៅរឹងរឹតតែខ្វះពុំបាន។ យ៉ាងណាមិញ ដើម្បីជៀសវាង ទម្លាប់ដែលជំរុញឱ្យបាត់បង់ផលិតភាព គួរចាប់ផ្តើមផ្លាស់ប្តូរមួយៗ បន្តិចម្តងៗ ព្រោះការចង់ប្តូរភ្លាមៗ ឬប្តូរទាំងអស់ បានប៉ះពាល់ទៅដល់សុខភាពផ្លូវចិត្តផង និងធ្វើឱ្យផលិតភាពធ្លាក់ចុះផង៕
