ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការរក្សាទម្លាប់ប្រចាំថ្ងៃដែលផ្តល់គុណប្រយោជន៍ នៃការរស់នៅ បានរួមចំណែកបង្ខិតខ្លួនទៅកាន់ភាពជោគជ័យ ឬក៏ការកំណត់គោលដៅជីវិតដែលបានរំពឹងទុកណាមួយ មិនថា ធំ ឬតូច។ ទម្លាប់ទាំងនោះមានដូចជា ការពង្រឹងទំនាក់ទំនង បង្កើនភាពប្រកួតប្រជែង ចេះកំណត់ពេល ឆ្លុះបញ្ចាំង និងផ្ទៀងផ្ទាត់ឡើងវិញរាល់សកម្មភាពកន្លង ការអប់រំចិត្ត ការដឹងគុណ បន្តរៀនសូត្រជាប្រចាំ និងក្រោកពីគេងរៀងរាល់ព្រឹកព្រលឹម។ តាមរយៈគេហទំព័រ Inc. បានបង្ហាញលម្អិតអំពីទម្លាប់ប្រចាំថ្ងៃ ទាំង១០ដែលអាចបង្ខិតខ្លួនទៅកាន់ការសម្រេចគោលដៅ។
១.ក្រោកពីដំណេកលឿនរហ័ស ៖ សម្លេងម៉ោងរោទ៍ដែលលាន់ឮនៅពេលព្រឹកព្រលឹមក្លាយជាវិធីមួយ ជួយរុញច្រានឱ្យចាប់ផ្តើមអនុវត្តន៍សកម្មភាពថ្មីៗ និងការចាប់ផ្តើមទទួលយកផ្នត់គំនិតវិជ្ជមានក្នុងការបន្តភារកិច្ច។ បុគ្គលដែលមានភាពជោគជ័យចំពោះការរស់នៅ ភាគច្រើនពួកគេក្រោកពីគេងនៅម៉ោងប្រាំមួយព្រឹក ដើម្បីបញ្ចប់កិច្ចការដែលត្រូវការគិតច្រើន ព្រោះពេលព្រឹក ពុំសូវមានការរំខាន់ពីមជ្ឈដ្ឋានខាងក្រៅ។ ទម្លាប់មួយនេះមានឥទ្ធិពលពង្រឹងស្មារតីខ្លួនឯងឱ្យចេះមានមោទនភាពរាល់សមិទ្ធផលដែលទទួលបាន។
២.បន្តរៀនជានិច្ច ៖ បុគ្គលដែលមានសមិទ្ធិផលធំៗ សុទ្ធសឹងតែជាបុគ្គលមានទម្លាប់រៀនសូត្រជាប្រចាំ ជារៀងរាល់ថ្ងៃពួកគេ បានវិនិយោគពេលវេលាទៅក្នុងការអាន ស្តាប់ខ្លឹមសារសំខាន់ៗ តាមរយៈផតខាស និងការដុសខាត់ជំនាញ ឬរៀនជំនាញថ្មី ហើយទម្លាប់មួយនេះបានជំរុញឱ្យពួកគាត់មានភាពបត់បែនចំពោះការសម្រេចចិត្ត។
៣.មានគោលដៅជាក់លាក់មួយ ៖ កំណត់គោលដៅ ជាវិថីដ៏សំខាន់ក្នុងការទាញយកនូវភាពជោគជ័យ ហើយការកំណត់ទៀតសោត គេគិតទាំងលទ្ធផលរយៈពេលវែង និងរយៈពេលខ្លី ក៏ដូចជាភាពសមល្មមដែលអាចទៅរួច រួមទាំងផ្ទៀងផ្ទាត់ទៅនឹងសកម្មភាពប្រចាំថ្ងៃ ដើម្បីបញ្ជាក់ថា តើពិតជាបានអនុវត្តន៍ឆ្លើយតបទៅនឹងអ្វីដែលបានកំណត់ដែរ ឬយ៉ាងណា? ហើយការកំណត់ត្រូវប្រាកដថា អាចទៅរួចជាមួយនឹងធនធាន សមត្ថភាព ថាមពល រួមទាំងលទ្ធភាព។
៤.បង្កើតទំនាក់ទំនង ៖ ការបង្កើត និងការរក្សាទំនាក់ទំនងបែបផ្លូវការមានវិជ្ជាជីវៈគឺជាឥរិយាបថសំខាន់មួយជួយឱ្យប្រសិទ្ធភាព នៃការងារមានភាពរីកចម្រើន។ តាមរយៈការបែងចែកពេលវេលា ដើម្បីជជែក ស្វែងយល់ពីគ្នាទៅវិញទៅមក ក៏ដូចជាធ្វើបច្ចុប្បន្នភាពអំពីការងារ និងភាពខុសប្លែកគ្នា ភាពប្រកួតប្រជែងនៅក្នុងវិស័យនីមួយៗ។
៥.បំបែកភាពភ័យខ្លាច ៖ ភាពភ័យខ្លាចបណ្តាលមកពីខ្វះនូវភាពប្រកួតប្រជែង ក៏ដូចជាការរក្សាទម្លាប់ ធ្វើនៅកិច្ចការដដែលៗពីមួយពេលទៅមួយពេល ចំណុចមួយដែលគួរ តតាំងនឹងការហ៊ានប្រឈមជាមួយបញ្ហាថ្មីៗ គឺហ៊ានឈានជើងចេញពីសកម្មភាពដែលមិននាំទៅរកភាពរីកចម្រើន ឬភាពក្លាហាន ជំនួសមកវិញនូវការបើកឱកាសឱ្យខ្លួនឯង ក្នុងការទទួលយកភារកិច្ចដែលមិនធ្លាប់ធ្វើ ឬការងារមានទំហំទំនួលខុសត្រូវធំជាងមុន ក៏ដូចជាឱកាសក្នុងការប្រកួតប្រជែង។
៦.ធ្វើផែនការសកម្មភាពប្រចាំថ្ងៃ ៖ ចំណុចដែលនាំឱ្យអ្នកធ្វើអាជីវកម្ម មានការរៀបចំល្អ និងភាពរឹងមាំនៃការរក្សាកម្លាំងជំរុញចិត្ត គឺការធ្វើផែនការសកម្មភាពប្រចាំថ្ងៃ ដោយមានរបៀបវារៈនៃការកំណត់មួយ។ មានន័យថា ការកំណត់រយៈពេលនៃកិច្ចការនីមួយៗ ឬក៏ការជជែក និងប្រជុំគ្នាប្រកបដោយភាពជាក់លាក់ ដែលសកម្មភាពនេះ នាំមកនូវការផ្តោត និងសម្រេចជាលទ្ធផល។ សិល្បៈនៃការវិនិយោគពេលវេលាក៏បានជំរុញផលិតភាពតាមរយៈការកំណត់អ្វីទៅជាកិច្ចការអាទិភាព មុននឹងសម្រេចិត្តអនុវត្តន៍សកម្មភាព។
៧.ឆ្លុះបញ្ចាំង ៖ ភាគច្រើនបុគ្គលដែលមានប្រវត្តិសម្រេចលទ្ធផលល្អៗ ពួកគាត់សុទ្ធសឹងតែមានទម្លាប់ក្រឡេកមើលក្រោយបន្តិច តាមដានសកម្មភាព និងលទ្ធផលកន្លងមក បន្ទាប់មក វិភាគឆ្លុះបញ្ចាំងរាល់អ្វីដែលបានធ្វើ រួមទាំងរកឱ្យឃើញចំណុចខ្លាំង និងចំណុចខ្សោយ រួចធ្វើផែនការ កែលម្អឡើងវិញ។ ការឆ្លុះបញ្ចាំង និងផ្ទៀងផ្ទាត់ឡើងវិញ មានច្រើនរូបភាពដូចជា ការសរសេរកំណត់ហេតុបានរៀងរាល់ថ្ងៃ ជាពិសេសពេលល្ងាចៗ ឬក៏សរសេរគោលដៅប្រចាំសប្តាហ៍ និងការតាមដានសមិទ្ធផល។ ទម្លាប់មួយនេះ ជំរុញឱ្យពួកគាត់ អាចបំពេញចន្លោះខ្វះខាត និងរក្សាលំនឹងទំនួលខុសត្រូវ បង្កើតឱកាសវិវឌ្ឍន៍ខ្លួន និងជាវិធីសាស្រ្តក្នុងការកត់សម្គាល់រាល់ភាពជោគជ័យ មិនថាសមិទ្ធផលនោះមានរូបភាពតូចយ៉ាងណានោះទេ។
៨.ផ្តល់អាទិភាពចំពោះការថែទាំខ្លួនឯង ៖ ជាទូទៅគេបានដឹងហើយថា ការថែទាំ ឬយកចិត្តទុកដាក់ចំពោះខ្លួនឯង គឺការឆ្លើយតប នឹងភាពរីកចម្រើនក្នុងរយៈពេលវែង។ ការថែទាំទៀតសោត មានន័យថា ការទទួលទានដំណេកបានគ្រប់គ្រាន់ មានតុល្យភាពចំពោះរបបអាហារ និងហាត់ប្រាណបានទៀងទាត់ ។ បន្ថែមពីនោះ គឺរក្សាភាពធន់ នៃសុខភាពរាងកាយ ក៏ដូចជា សុខុមាលភាព ដើម្បីឱ្យខ្លួនឯងមានភាពរឹងមាំគ្រប់គ្រាន់ក្នុងការសម្រេចចិត្តចាប់យកនៅក្ដីស្រមៃ។
៩.អប់រំចិត្ត ៖ ការអនុវត្តន៍ សកម្មភាពទាំងឡាយណាដែលផ្តល់ការអប់រំចិត្តជាប្រចាំ គឺជាថ្នាលបង្ហាញឱ្យឃើញថា ភាពរីកចម្រើនក៏កាន់តែខិតជិតមកដល់ដូចគ្នា។ សកម្មភាពអប់រំចិត្តមានដូចជា ការសមាធិ និងការសរសេរ សាច់រឿងដែលកើតមានជាប្រចាំ។ ដោយហេតុថា វិធីសាស្រ្តមួយនេះជំរុញឱ្យកាត់បន្ថយស្រ្តេស បង្កើនសមត្ថភាព នៃការសម្រេចចិត្ត និងពង្រឹងសុខភាពផ្លូវចិត្ត។
១០.ការដឹងគុណ ៖ ថ្លែងអំណរគុណទៅកាន់មនុស្សជុំវិញខ្លួន អ្វីដែលមានស្រាប់នៅក្នុងដៃ និងអរគុណ ការខិតខំរបស់ខ្លួនឯង ជាចំណែកដែលមិនគួរមើលរំលង នៅក្នុងវិថីនៃការបង្កើនភាពជឿជាក់ និងការដុសខាត់សមត្ថភាពផ្ទាល់ខ្លួន។ ការមានសេចក្ដីដឹងគុណ មិនត្រូវការចំណាយនោះទេ ប៉ុន្តែបានផ្តល់នូវផលចំណេញត្រឡប់មកវិញយ៉ាងអនេក។ ការដឹងគុណជាប្រចាំ ជាទម្លាប់មួយដែលផ្តល់នូវស្មារតីនៃការពេញចិត្ត និងការហ៊ានប្រឈមនឹងការពិតដែលបានកើតឡើង៕
