ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គ្រឿងស្រវឹង (Alcohol) និងសុខភាពផ្លូវចិត្ត (Mental Health) មានទំនាក់ទំនងយ៉ាងជិតស្និទ្ធ ។ ការស្រាវជ្រាវរបស់មូលនិធិសុខភាពផ្លូវចិត្ត (Mental Health Foundation) មានមូលដ្ឋាននៅប្រទេសអង់គ្លេសបានបង្ហាញថា ផឹកស្រាច្រើនរហូតដល់គ្រប់គ្រងខ្លួនឯងលែងបានអាចប៉ះពាល់ធ្ងន់ធ្ងរដល់សុខភាព ។ មនុស្សមួយចំនួនបានជ្រើសរើសយកសុរាជាមិត្ត ផឹកដើម្បីព្យាយាមបន្ថយអាការៈតានតឹងចិត្ត ឬសញ្ញានៃជំងឺផ្លូវចិត្តផ្សេងៗ ។ ផ្ទុកទៅវិញការជ្រើសរើសយកគ្រឿងស្រវឹងដំណាក់កាលនេះ នឹងធ្វើឱ្យមនុស្សមានវិបត្តិផ្លូវចិត្តកាន់តែខ្លាំង ។
អ្នកជំនាញសុខភាពសាធារណៈនៃមូលនិធិសុខភាពផ្លូវចិត្ត បានបញ្ជាក់បន្ថែមថា ថ្វីត្បិតឥទ្ធិពលជាតិអាល់កុលចូលជ្រកក្នុងខ្លួនគ្រាន់តែជារូបភាពបណ្តោះអាសន្នក៏ពិតមែន ប៉ុន្តែគ្រឿងស្រវឹងចូលញឹកញយពេក នោះសុខភាពរាងកាយនិងសុខភាពខួរក្បាលកាន់តែចុះខ្សោយបន្តិចម្តងៗ ។ អ្នកប្រើប្រាស់គ្រឿងស្រវឹងអាចកត់សម្គាល់ពីអាការៈចុះខ្សោយសុខភាពរបស់ខ្លួនដោយងាយបំផុត នៅពេលថាមពលរាងកាយ ឬការចងចាំចុះចាប់ផ្តើមខុសប្រក្រតីបន្ទាប់ទទួលគ្រឿងស្រវឹង ។
ឥទ្ធិពលគ្រឿងស្រវឹងបង្ករផលប៉ះពាល់ខ្លាំងដល់សុខភាពរាងកាយ ។ ចំណុចនេះបណ្តាលឱ្យមនុស្សមានអាកប្បកិរិយាខុសប្រក្រតី គ្មានបម្រុងប្រយ័ត្ន ឆេវឆាវ បង្ករគ្រោះថ្នាក់ ឬក៏អាចក្លាយជាជនរងគ្រោះពីអំពើហិង្សាទម្រង់ណាមួយក៏មាន ។ ឥទ្ធិពលរយៈពេលខ្លី ផឹកគ្រឿងស្រវឹងច្រើនពេកអាចនាំឱ្យមនុស្សឆាប់មានបញ្ហាងងុយដេក បញ្ហាវិបត្តិដំណេក ឈឺក្រពះ ហើមពោះ និងឈឺក្បាលប្រកាំងជាដើម ។ ចំណែកការប្រើប្រាស់គ្រឿងស្រវឹងរយៈពេលវែង បង្កើនហានិភ័យដល់ស្ថានភាពសុខភាពធ្ងន់ធ្ងរ រួមទាំងជំងឺបេះដូង ជំងឺដាច់សរសៃឈាមខួរក្បាល ជំងឺលើសឈាម ជំងឺថ្លើម និងជំងឺមហារីក ។
ចំណែកឥទ្ធិពលផ្លូវចិត្តវិញ ជាតិអាល់កុលអាចធ្វើឱ្យមនុស្សមានបញ្ហាធ្លាក់ទឹកចិត្តកាន់តែធ្ងន់ធ្ងរ និងបង្កើនផលប៉ះពាល់ប្រឆាំងនឹងឱសថព្យាបាលជំងឺធ្លាក់ទឹកចិត្តមួយចំនួន (កំពុងព្យាបាល) ។ សុរាមិនមែនជាវិធីដោះស្រាយជំងឺធ្លាក់ទឹកចិត្ត ស្ត្រេស ការថប់បារម្ភ ឬអារម្មណ៍ពិបាកផ្សេងទៀតនោះទេ ។ ផឹកកាន់តែច្រើនជីវិតកាន់តែស្មុកស្មាញ ហើយដំណោះស្រាយល្អដល់គុណភាពជីវិតកាន់តែមានតិច ។
គួររំលឹកថា គ្រឿងស្រវឹងរំខានដល់ផ្លូវទំនាក់ទំនងខួរក្បាល និងសកម្មភាពរាងកាយ ។ ជាតិអាល់កុលធ្វើឱ្យខួរក្បាលមិនអាចគ្រប់គ្រងតុល្យភាព ខ្សោយចងចាំ ព្រមទាំងការវិនិច្ឆ័យធ្លាក់ចុះជាលំដាប់ ។ ផឹកគ្រឿងច្រើននិងរយៈពេលយូរបណ្តាលឱ្យមានការប្រែប្រួលនៃសរសៃប្រសាទ ពិសេសគ្រោះថ្នាក់ខ្លាំងបំផុតក្នុងដំណើរជីវិតយុវជន ប្រសិនបើសេពគប់គ្រឿងស្រវឹង ៕
