យោង​តាមទិន្នន័យ​ស្រាវជ្រាវ​ចេញ​ផ្សាយ​ដោយ World Population Review នៅ​ឆ្នាំ​២០២៣នេះ​បានបង្ហាញថា ប្រជាជន​កម្ពុជា​មានបញ្ញា ឬ IQ ក្នុង​លំដាប់ថ្នាក់លេខ១៥ ក្នុង​ចំណោម​ប្រទេស១៩៩ នៅ​លើពិភពលោក។

បើ​តាមតារាងទិន្នន័យ ប្រទេស​ដែលមាន​ប្រជាជន IQ ខ្ពស់ជាងគេ ជប៉ុន គឺជាជនជាតិដែលមានពិ​ន្ទុ IQ ខ្ពស់បំផុតក្នុងលោក ហើយ តៃវ៉ាន់ នៅលំដាប់ទី២ ឯសិង្ហបុរី នៅលំដាប់ទី៣ ដោយប្រទេសទាំងពីរនេះ មានពិន្ទុប្រគៀកប្រកិតនឹងជប៉ុន។

ខាងក្រោមនេះ ជាចំណាត់ថ្នាក់ប្រទេសដែលមានពិន្ទុ IQ ខ្ពស់បំផុតទាំង ១៥ក្នុងលោក ផ្អែកលើទិន្នន័យរបស់វិទ្យាស្ថានអ៊ុលស្ទ័រ (Ulster Institute) ក្នុងឆ្នាំ ២០២៣ និង​ត្រូវ​បានចុះផ្សាយ​ដោយ World Population Review ៖

១. ជប៉ុន – ១០៦,៤៩ពិន្ទុ

២. តៃវ៉ាន់ (ចិន) – ១០៦,៤៧ពិន្ទុ

៣. សិង្ហបុរី – ១០៥,៨៩ពិន្ទុ

៤. ហុងកុង (ចិន) – ១០៥,៣៧ពិន្ទុ

៥. ចិន – ១០៤,១០ពិន្ទុ

៦. កូរ៉េខាងត្បូង – ១០២,៣៥ពិន្ទុ

៧. បេឡារុស – ១០១,៦០ពិន្ទុ

៨. ហ្វាំងឡង់ – ១០១,២០ពិន្ទុ

៩. លិចតិចស្ដាញ – ១០១,០៧ពិន្ទុ

១០. ហូឡង់ និងអាល្លឺម៉ង់ – ១០០.៧៤ពិន្ទុ

១២. អេស្ដូនី – ១០០,៧២ ពិន្ទុ

១៣. លុចលំបួ – ៩៩,៩៧ ពិន្ទុ

១៤. ម៉ាកាវ – ៩៩,៨២ ពិន្ទុ

១៥. កម្ពុជា – ៩៩,៧៥ ពិន្ទុ

សូម​បញ្ជាក់ថា IQ (Intelligence quotient)  គឺជារង្វាស់បញ្ញារបស់មនុស្ស ដែល​ត្រូវការវាយ៉ាងចាំបាច់បំផុត ដើម្បីដោះស្រាយលំហាត់គណិតវិទ្យា ទន្ទិញមេរៀន និងរំលឹកមេរៀនជាដើម។ បុគ្គលដែលចង់ដឹងពីកម្រិត IQ ខ្លួនឯង ចាំបាច់ត្រូវធ្វើតេស្តដែលមានលក្ខណៈស្ដង់ដា ប្រសិនបើគេទទួលបានពិន្ទុ IQ កាន់តែខ្ពស់ មានន័យថា ជននោះក៏មានបញ្ញាខ្ពស់ផងដែរ។

ជាទូទៅពិន្ទុ IQ បានឆ្លុះបញ្ចាំងពីគុណភាពអប់រំ ធនធានមនុស្សដែលមាននៅក្នុងប្រទេសនោះតែម្ដង។ ប្រទេស ដែលមានពិន្ទុ IQ ទាប ភាគច្រើនប្រជាជននៅទីនោះ មានជីវភាពក្រីក្រ ហើយប្រទេសពុំសូវមានការអភិវឌ្ឍនោះទេ បើធៀបទៅនឹងប្រទេសដែលមានពិន្ទុ IQ ខ្ពស់។ ហេតុនេះហើយ ទើបអ្នកស្រាវជ្រាវមួយចំនួន បានប្រើពិន្ទុ IQ ដើម្បីកំណត់ថា តើប្រទេសណាសម្បូរប្រជាជនវៃឆ្លាតបំផុតក្នុងពិភពលោក។

ទន្ទឹមនេះ រឿងដែលគួរឱ្យចាប់អារម្មណ៍ និងមានមោទកភាពបំផុតសម្រាប់ប្រជាជនកម្ពុជានោះគឺ នៅក្នុងចំណោមប្រទេស ដែលមានពិន្ទុ IQ ខ្ពស់បំផុតទាំង ១៥ក្នុងលោក ក៏មានវត្តមានប្រទេសកម្ពុជាក្នុងនោះផងដែរ ដោយទទួលបានពិន្ទុ IQ រហូតដល់ ៩៩,៧៥ ពិន្ទុឯណោះ ។ ការទទួលបានពិន្ទុជាខ្ពស់ គួរជាទីមោទនកនេះ បានបង្ហាញឱ្យឃើញថា ប្រព័ន្ធអប់រំ និងកម្រិតជីវភាពរបស់ប្រជាជនកម្ពុជាមានការរីកចម្រើនគួរឱ្យកត់សម្គាល់៕