ភ្នំពេញ – មហាជនមិនគួរប្រើប្រាស់បណ្ដាញសង្គមជាន់ពន្លិចបុគ្គលណាម្នាក់រហូតគ្មានឱកាសកសាងកិត្តិយសល្អទៅថ្ងៃក្រោយឡើយ ដោយសារជីវិតមនុស្សមិនអាចចប់ព្រោះកំហុសដោយគ្មានការអប់រំឱ្យដើរផ្លូវល្អ ដើម្បីអាចចូលរួមជួយសង្គមនៅថ្ងៃអនាគតក្រោយទទួលទោសទណ្ឌតាមផ្លូវច្បាប់នោះឡើយ ។ នេះបើតាមការលើកឡើងរបស់ លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិតសភាកម្ពុជា ។

លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិត្យសភាកម្ពុជា បញ្ជាក់បន្ថែមថា ការអប់រំដើរតួនាទីសំខាន់ណាស់ទាំងក្នុងសាលារៀន គ្រួសារ និងសហគមន៍ ។ ទន្ទឹមគ្នានេះ ជំនួសឱ្យការជេរប្រទិចយុវជនដែលប្រព្រឹត្តខុស គប្បីធ្វើយ៉ាងណាចូលរួមជួយអប់រំយុវជនឱ្យរឹងមាំទាំងផ្លូវកាយ ផ្លូវចិត្ត និងស្មារតី គឺផ្ដើមចេញពីយើងទាំងអស់គ្នានៅក្នុងគ្រួសារ នៅក្នុងសាលារៀន និងនៅក្នុងសហគមន៍ ។

លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិត្យសភាកម្ពុជា

“យើងត្រូវប្រឹងប្រែងទាំងអស់គ្នា ដើម្បីអប់រំយុវជនយើង អប់រំកុមារយើងកុំឱ្យគាត់ប្រព្រឹត្តខុស ហើយកុំចេះតែបញ្ជាន់ថែមដោយមិនបានមើលថា យើងបានជួយអ្វីដល់ពួកគាត់ និងបានអប់រំគាត់កម្រិតណាហើយ”

អគ្គលេខាធិការនៃរាជបណ្ឌិត្យសភាកម្ពុជា ក៏បានស្នើដល់អ្នកប្រើប្រាស់បណ្ដាញសង្គមជាព័ត៌មានក្តី ឬអ្នកសារព័ត៌មានអាជីពក្ដី ត្រូវគិតពីក្រមសីលធម៌នៃការប្រើប្រាស់បណ្ដាញសង្គម និងក្រមសីលធម៌វិជ្ជាជីវៈរបស់ខ្លួន មុននឹងបង្ហាញរូបភាពឯកជនភាពរបស់បុគ្គលណាម្នាក់ ឬរិះគន់បុគ្គលណាម្នាក់ជាសាធារណៈ ដោយ​ត្រូវគិតពីផលប៉ះពាល់ទៅថ្ងៃក្រោយ។

តាមក្រមសីលធម៌សម្រាប់អ្នកសារព័ត៌មាន និង​ការ​ផ្សព្វផ្សាយ រាល់សេចក្តីរាយការណ៏ព័ត៌មានអំពីបទឧក្រិដ្ឋដែលកំពុងស្ថិតក្រោមការស៊ើបអង្កេត ឬ តុលាការមិន ទាន់វិនិច្ឆ័យ ត្រូវបានហាមឃាត់មិនឱ្យ​អ្នកសារព័ត៌មានបញ្ចេញមតិយោបល់នៅក្នុងអត្ថបទនោះទេ។ អ្នកសារព័ត៌មានត្រូវគោរពសិទ្ធិរបស់ជនសង្ស័យ ដែលជាប់ពាក់ព័ន្ធទៅនឹងអំពើឧក្រិដ្ឋ និងមិនត្រូវថតរូប និងមិនត្រូវចោទប្រកាន់ជនណាម្នាក់ថាជាឧក្រិដ្ឋជន នៅពេលដែលតុលាការមិនទាន់បានវិនិច្ឆ័យទោសនោះឡើយ។ អ្នកសារព័ត៌មានមិនត្រូវផ្សព្វផ្សាយព័ត៌មាន ដែលមានលក្ខណ:មិនសមរម្យ ឃោឃៅ ឬ អំពើ ហិង្សាលើរាង្គកាយនោះទេ។

យោង​តាមមាត្រា៧ នៃច្បាប់ស្តីពីរបបសារព័ត៌មាន បានចែងថា អ្នកសារ​ព័ត៌មាន​ត្រូវ​មានកាតព្វកិច្ច​គោរព​គោល​ការណ៍​ចាំបាច់ជា​អាទិ៍​ដូចជា គោរពសច្ចធម៌ និង​គោរព​សិទ្ធយល់ដឹងនូវសច្ចធម៌​របស់សាធារណជន, ត្រូវផ្សាយ​នូវ​ដំណឹង​ទាំងឡាយ​ដោយសុចរិត ព្រមទាំងធ្វើអត្ថាធិប្បាយ ឬរិះគន់​ឱ្យ​ត្រឹម​ត្រូវ និង​សមស្រប​តាមគតិយុត្តិធម៌, ត្រូវរាយការណ៍​តែតាមហេតុការណ៍​ដែលខ្លួនដឹង​ពីប្រភព​ដើមតែប៉ុណ្ណោះ អ្នក​សារ​ព័ត៌មាន​មិន​ត្រូវ​បំបាត់ចោល​នូវ​ព័ត៌មានសំខាន់ៗ ឬកែបន្លំឯកសារ​ផ្សេងៗ​ឡើយ, ប្រើវិធីសុចរិត​ត្រឹមត្រូវ​ដើម្បីស្វែង​រក​ដំណឹង រូបថត និង​ឯកសារផ្សេងៗ, ត្រូវចៀសវាង​ការផ្សព្វផ្សាយ​ព័ត៌មាន​ដែលញុះញង់​ឱ្យ​មានការ​ប្រកាន់ពូជសាសន៍ ពណ៌សម្បុរ ភេទ ភាសា ជំនឿ សាសនា មតិ ឬនិន្នការ​នយោបាយ ដើម​កំណើតជាតិ ឋានៈសង្គម ធនធាន ឬស្ថានភាពដទៃ​ទៀត ក៏ដូចជាត្រូវគោរពសិទ្ធិ និង​សេរីភាព​រស់នៅ​ក្នុង​ជីវភាព​ឯកជនរបស់បុគ្គល៕