ការរស់នៅម្នាក់ឯងជាលើកដំបូងមានច្រើនប្រភេទ អ្នកខ្លះមានចិត្តចង់សាកល្បង ឬក៏តម្រូវការចាំបាច់ និងការដល់ពេលដែលចាកចេញពីគ្រួសារ? មិនថាកត្តាអ្វីក៏ដោយ ការស្វែងយល់ពីអត្ថប្រយោជន៍នៃការរស់នៅម្នាក់ឯង អាចកាត់បន្ថយហានិភ័យ ឬក៏ភាពឯកោ។ ដោយសារតែមនុស្សជាច្រើនរស់នៅម្នាក់ឯង តាមរយៈបរិបទផ្សេងៗគ្នា យ៉ាងណា ការរស់នៅម្នាក់ឯងអាចនាំមកនូវបញ្ហាប្រឈមផង និងឱកាសផង។ បន្ថែមពីនោះការនៅម្នាក់ឯងត្រូវការជំនាញជាច្រើន ដូចជាធ្វើការងារផ្ទះប្រចាំថ្ងៃ ការជួសជុលសម្ភារក្នុងផ្ទះ និងការរៀបចំហិរញ្ញវត្ថុ ក៏ដូចជាធានាបាននូវសុខុមាលភាពផ្លូវចិត្តផ្ទាល់ខ្លួន។

ជារួមអ្វីដែលចាំបាច់ក្នុងការរៀនរស់នៅតែម្នាក់ឯង គឺត្រូវមានភាពឯករាជ្យក្នុងការចាត់ចែងហិរញ្ញវត្ថុ ចេះប្រើប្រាស់អារម្មណ៍ដោយភាពឈ្លាសវៃ រក្សាសុខភាពផ្លូវកាយនិងចិត្ត រួមទាំងព្យាយាមសម្របខ្លួនជាមួយនឹងស្ថានភាព ក៏ដូចជាបរិបទថ្មីៗ។ ត្បិតថាការចេញមករស់នៅម្នាក់ឯងមានការប្រកួតប្រជែង ប៉ុន្តែបានផ្តល់នូវបទពិសោធន៍បន្ថែមដូចជា ឯករាជ្យភាព ភាពចាស់ទុំនៃការសម្រេចចិត្ត និងមានទីតាំងផ្ទាល់ខ្លួនដែលអាចរៀបចំទៅតាមរបៀបដែលខ្លួនចង់បាន។ ខាងក្រោមជាការអធិប្បាយ៨ចំណុច អំពីរបៀបនៃការចាប់ផ្តើមរស់នៅដាច់ដោយឡែកពីសមាជិកគ្រួសារ ឬការត្រូវរស់នៅម្នាក់ឯង។

១. ពង្រឹងបណ្តាញទំនាក់ទំនងក្នុងសង្គម ៖ ស្ថិតក្នុងដំណាក់កាលដែលត្រូវរស់នៅម្នាក់ឯង ការរក្សា និងពង្រីកទំនាក់ទំនងសង្គមជាមួយមនុស្សជុំវិញខ្លួន មិនថាជាមួយមិត្តភ័ក្តិ គ្រួសារ និងមិត្តរួមការងារ គឺជាការផ្តល់ឱកាសឱ្យខ្លួនឯងទទួលបាននូវការគាំទ្រផ្នែកផ្លូវចិត្ត និងកាត់បន្ថយអារម្មណ៍នៃភាពឯកោបានមួយកម្រិតដែរ។ ហើយវិធីសាស្រ្តនៃការបង្កើតទំនាក់ទំនងគឺការចូលរួមក្នុងសកម្មភាពសង្គម ចូលរួមក្លឹបសិក្សា ឬក្រុមដែលមានចំណូលចិត្តស្រដៀងគ្នាជាដើម។

២. កែប្រែទម្លាប់មិនល្អពីមុន ៖ ការរស់នៅតែម្នាក់ឯង គឺជាសេរីភាពមួយដែលអាចធ្វើអ្វីក៏បាន ទៅណាក៏បាន ប៉ុន្តែបើគ្មានការរំឭកដាស់តឿន វាក៏បានរួមចំណែកដល់ការភ្លេចភ្លាំងថែទាំខ្លួនឯងដែរ ដូច្នេះត្រូវបង្កើតទម្លាប់ណាដែលជួយគាំទ្រ ទៅកាន់សុខុមាលភាព ដូចជាការបរិភោគអាហារល្អ ការធ្វើលំហាត់ប្រាណ ការអានសៀវភៅ និងកិច្ចការផ្សេងៗទៀតដែលស្របជាមួយនឹងចំណូលចិត្ត និងគោលដៅ។

៣. សាកល្បងសកម្មភាពថ្មី ៖ ប្រើប្រាស់វិថីជីវិតដែលរស់នៅតែម្នាក់ឯងដើម្បីសាកល្បងសកម្មភាពថ្មីៗ ដើរលេងកន្លែងឆ្ងាយៗ រៀនជំនាញថ្មី រៀនតន្រ្តី ទៅកម្មវិធីសហគមន៍ ឬការដើរផ្សងព្រេងទៅខេត្ត ឬតំបន់ដែលពុំធ្លាប់ទៅពីមុន។ តាមរយៈការសាកល្បងសកម្មភាពទាំងនេះ គឺបានជំរុញឱ្យមានការអភិវឌ្ឍន៍សមត្ថភាពផ្ទាល់ខ្លួន កាត់បន្ថយស្រ្តេស បង្កើនទំនាក់ទំនង និងការកម្សាន្តរីករាយផងដែរ។

៤. កែច្នៃបរិយាកាសឱ្យទៅជាប្រភពនៃគំនិត ៖ ផ្ទះជាកន្លែងសម្រាក និងជាទីស្ងប់មួយសម្រាប់បំផុសការគិត ឬការផ្តោត ដូច្នេះបរិយាកាសផ្ទះ គួរតែមានការរៀបចំតុបតែង ឬកែលម្អឱ្យមានសោភ័ណភាពដើម្បីបង្កើនសុភមង្គល និងការបំផុសលើកទឹកចិត្តខ្លួនឯង។

៥. បន្សាំទម្លាប់នៅម្នាក់ឯង ៖ រៀនរីករាយជាមួយនឹងបរិយាកាសរបស់ខ្លួនឯង ដោយផ្តោតលើភាពស្ងប់ស្ងាត់ និងការរីកចម្រើនផ្ទាល់ខ្លួន រួមទាំងព្យាយាមស្គាល់ខ្លួនឯងឱ្យកាន់តែច្បាស់ តាមរយៈចំណូលចិត្ត និងការតាំងចិត្ត។

៦. មានភាពសកម្មជានិច្ច ៖ ការរក្សាខ្លួនឯងឱ្យមានភាពសកម្ម ទៅកាន់ផ្នែករាងកាយ មិនត្រឹមតែផ្តល់អត្ថប្រយោជន៍ដល់សុខភាពរាងកាយទេ ប៉ុន្តែបានសម្រួលដល់សុខភាពផ្លូវចិត្ត និងការទាញយកថាមពលត្រឡប់មកវិញ។ សកម្មភាពរាងកាយ មានដូចជា ការហាត់ប្រាណនៅផ្ទះ រត់ប្រណាំង ជិះកង់ ឬក៏ប្រើប្រាស់ទម្រង់នៃការហាត់ប្រាណមួយណាក៏បាន ដែលខ្លួនពេញចិត្ត។

៧. ការនៅជាមួយខ្លួនឯង ៖ ទុកចន្លោះខ្លះ ដើម្បីឆ្លុះបញ្ចាំងជាមួយខ្លួនឯង ទទួលយករឿងរ៉ាវដែលមិនសមបំណង ហើយធ្វើល្អជាមួយខ្លួនឯង ដូចដែរយើងបានធ្វើជាមួយអ្នកដទៃដែរ។

៨. ចូលរួមជាមួយសហគមន៍ ៖ ទោះបីជាចូលចិត្តបរិយាកាសម្នាក់ឯង តែក៏មិនគួរកាត់ផ្តាច់ពីសហគមន៍នោះដែរ ដើម្បីឱ្យខ្លួនឯងមានឱកាសសិក្សាពីចំណាប់អារម្មណ៍ ទម្លាប់ប្រចាំថ្ងៃ និងការសិក្សារៀនសូត្រពីគ្នាទៅវិញទៅមក និងការតភា្ជប់បណ្តាញទំនាក់ទំនងឱ្យមានវិសាលភាព ដែលអាចរួមចំណែកដល់ការជួយជ្រោមជ្រែងគ្នា ពេលមានបញ្ហាណាមួយកើឡើង៕