ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងបរិបទដ៏មមាញឹក និងភាពជឿនលឿន ធ្វើឱ្យមនុស្សមានការផ្លាស់ប្ដូរទៅមុខឥតឈប់ឈរ តែយ៉ាងណា ក៏នៅមានកត្តាមួយចំនួនបានរារាំងដំណើរឆ្ពោះទៅមុខ តួយ៉ាង ស្ថានភាពផ្លូវចិត្ត ការសម្រេចចិត្ត ការជ្រើសរបៀបរស់នៅ និងការមិនដោះលែងអតីតកាល ក្លាយជាចំណែកមួយ បង្កភាពស្មុគស្មាញ ចំពោះការពន្លឿនដំណើរជីវិតឱ្យឆ្ពោះទៅមុខ។ តាមរយៈ គេហទំព័រ Theheartysoul បានបង្ហាញអំពីកត្តាចំនួន៦ ដែលលោកអ្នកអាចមើលរំលង ហើយវាគឺជារារាំងដំណើរឆ្ពោះទៅមុខ។
១.មិនដោះស្រាយបញ្ហារបួសផ្លូវចិត្ត ៖ តិច ឬច្រើន មនុស្សអាចមានបទពិសោធន៍របួសផ្លូវចិត្តកាលពីកុមារភាព ហើយបញ្ហានេះងាយជំរុញឱ្យតានតឹង ប៉ះពាល់អាកប្បកិរិយា រារាំងក្នុងការសាកល្បង និងសម្ពាធផ្លូវចិត្តរីកដុះដាល ដែលជាហេតុបង្ហាញឱ្យដឹងថា គួររិះរកវិធីក្នុងការព្យាបាល និងដោះស្រាយឱ្យបានទាន់ពេលវេលា ដើម្បីបញ្ចៀសបញ្ហាធ្ងន់ធ្ងរ ជំនួសឱ្យការប្រើប្រាស់ភាពលំបាកផ្ទាល់ខ្លួនមកបង្អាក់ភាពលូតលាស់ទៅមុខ។
២.សម្ភារៈលើសតម្រូវការ ៖ ទោះចង់ ឬមិនចង់ បច្ចេកវិទ្យាដែលចេញក្រោយគេបង្អស់ មិនថាទូរស័ព្ទ ឬរថយន្ត វានឹងក្លាយជាឥទ្ធិពលទាក់ទាញចិត្តឱ្យមនុស្សមានការចាប់អារម្មណ៍ចង់បាន ខណៈស្ថានភាព និងលទ្ធភាពរបស់មនុស្សជាទូទៅមិនដូចគ្នា ប៉ុន្តែចង់បានដូចគ្នា។ ការកាត់បន្ថយសម្ភារៈលើសតម្រូវការ និងការចំណាយដែលមិនចាំបាច់ជាកត្តារំងាប់ចិត្តឱ្យទទួលស្គាល់ស្ថានភាពជាក់ស្ដែង និងការជៀសចាកពីការដេញតាមសម្ភារៈនិយម គួរងាកមកផ្ដោតលើភាពសាមញ្ញៗ និងអ្វីៗដែលមាននៅជុំវិញខ្លួន តួយ៉ាងដូចជា ការកម្សាន្តក្បែរៗផ្ទះ ស្រូបខ្យល់ធម្មជាតិ និងទៅទីកន្លែងដែលមិនចាំបាច់ត្រូវចំណាយថ្លៃៗ។
៣. មន្ទិលលើសមត្ថភាពខ្លួនឯង ៖ ជាទូទៅ យើងបានដឹងហើយថា មានតែយើងម្នាក់គត់ ដែលមានសមត្ថភាពគូសវាសវាសនាឱ្យខ្លួនឯងបាន។ ហើយការសង្ស័យលើសមត្ថភាពខ្លួនឯង ពុំចំណេញអ្វីដល់ការធ្វើដំណើរឆ្ពោះទៅមុខសោះឡើយ ព្រោះកាលដែលមិនទុកចិត្តលើសមត្ថភាពខ្លួនឯង ក្លាយជាចំណោទបញ្ហាមួយរារាំងភាពជោគជ័យ និងសុភមង្គល។ នៅពេលដែលភាពមន្ទិលចំពោះខ្លួនឯងចូលមកគ្រប់គ្រងក្នុងខ្លួនបាន នាំឱ្យមនុស្សបាត់បង់ឱកាសភាពរីករាយ ការអភិវឌ្ឍសមត្ថភាព និងការបំពេញន័យឱ្យជីវិត។
៤.បោះចោលការផ្ដោត ៖ ផ្នត់គំនិតដែលមានទំនោរផ្ដោតលើភាពខ្វះខាតនៃការរស់នៅប្រចាំថ្ងៃ ដូចជា ថវិកាមិនគ្រប់គ្រាន់ ពេលវេលាមិនអំណោយផល បាត់បង់ឱកាសល្អៗ ដែលសុទ្ធសឹងតែជាកត្តានាំឱ្យការរស់នៅប្រចាំថ្ងៃមានភាពសោកសៅបន្តិចម្តងៗ បង្កើតទៅជាអាការអស់កម្លាំង និងភាពភ័យខ្លាច។ ដូច្នេះការបញ្ចៀស ភាពអវិជ្ជមាន រក្សាស្ថានភាពផ្លូវចិត្ត និងថាមពលបន្តឆ្ពោះទៅមុខទាមទារឱ្យបោះចោលនូវការផ្តោតលើផ្នត់គំនិតខ្វះចន្លោះ។
៥.មិនលើកលែងទោសឱ្យខ្លួនឯង និងអ្នកដទៃ ៖ ការលើកលែងទោសផ្ដល់ផលទាំងសុខភាពផ្លូវកាយ និងផ្លូវចិត្ត។ ស្វែងយល់ពីបញ្ហាដែលបានកើតមាន ប្រមូលទុកម្តុំនូវអារម្មណ៍ខ្មាសអៀន មិនស្រណុកចិត្ត ឬបន្ទុកនៃសម្ពាធផ្លូវចិត្ត។ ហើយការលើកលែងទោសឱ្យខ្លួនឯង និងអ្នកដទៃ ជាកត្តាជួយជម្រះចិត្តឱ្យស្រឡះ បើកឱកាសទទួលបទពិសោធន៍ថ្មីៗ និងបន្តឆ្ពោះទៅមុខ ។
៦.ទំនាក់ទំនងគ្មានផាសុកភាព ៖ ត្បិតថា ការមានទំនាក់ទំនងជាតម្រូវការមួយ នៃការរស់នៅ ប៉ុន្តែមិនមែនមានន័យថា ត្រូវរក្សារាល់គ្រប់មនុស្សទាំងអស់ដែលចូលមកក្នុងដំណើរជីវិតនោះទេ ជាពិសេសទំនាក់ទំនងដែលគ្មានផាសុកភាព បាត់បង់ភាពរីករាយ និងបង្កទំនាស់ជាជាងដំណោះស្រាយ គួរមានការដោះលែងចោល ព្រោះធ្វើឱ្យប៉ះពាល់ ដល់សុខភាពផ្លូវចិត្ត និងសុខុមាលភាពទាំងគ្រប់ទ្វេភាគី ។ គួររក្សាទំនាក់ទំនង ដែលនាំនូវសេចក្ដីសុខ ភាពរីករាយ មានថាមពលផ្លូវចិត្ត រួមទាំងស្មារតីស្វាហាប់ក្នុងការអភិវឌ្ឍទៅមុខ៕
