ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រព័ន្ធភាពស៊ាំ មានតួនាទីការពាររាងកាយរបស់អ្នកពីការវាយប្រហារពីវីរុស មេរោគ និងបាក់តេរីផ្សេងៗ ដែលជាភ្នាក់ងារបង្ករជំងឺ និងធ្វើឱ្យរាងកាយចុះខ្សោយ។ នៅពេលដែលប្រព័ន្ធភាពស៊ាំដំណើរការបានល្អ មានន័យថា រាងកាយរបស់អ្នកនឹងមិនងាយរងការវាយប្រហារពីភ្នាក់ងារបង្ករជំងឺនោះទេ។ យោងតាមគេហទំព័រ BetterUp ដើម្បីពង្រឹងប្រព័ន្ធភាពស៊ាំ អ្នកគួរអនុវត្តទម្លាប់សាមញ្ញចំនួន ៥ ជារៀងរាល់ថ្ងៃ។
១. ចំណាយពេលស្រូបខ្យល់អាកាស ៖ រាងកាយរបស់យើងត្រូវការពេលវេលាខ្លះ ដើម្បីស្រូបខ្យល់អាកាសបរិសុទ្ធ និងភ្ជាប់ទំនាក់ទំនងជាមួយធម្មជាតិ។ យោងតាមការស្រាវជ្រាវរបស់ Everyday Health បានបង្ហាញថា ការស្រូបយកពន្លឺព្រះអាទិត្យ អាចជួយបង្កើនកម្រិតវីតាមីន D ក្នុងរាងកាយរបស់អ្នក។ លើសពីនេះ វីតាមីន D អាចជួយការពារជំងឺរ៉ាំរ៉ៃ ធ្វើឱ្យឆ្អឹងរឹងមាំ និងកាត់បន្ថយហានិភ័យនៃជំងឺធ្លាក់ទឹកចិត្ត។
២. គេងគ្រប់គ្រាន់ ៖ ទម្លាប់នៃការគេង មានឥទ្ធិពលយ៉ាងខ្លាំងទៅលើប្រព័ន្ធភាពស៊ាំ។ យោងតាមការសិក្សារបស់ MAYO CLINIC បានបង្ហាញថា ការគេងមិនគ្រប់គ្រាន់ គឺជាមូលហេតុមួយ ដែលនាំឱ្យអ្នកធ្លាក់ខ្លួនឈឺ ហើយការធ្លាក់ខ្លួនឈឺនេះ គឺបណ្ដាលមកពីប្រព័ន្ធភាពស៊ាំចុះខ្សោយ និងងាយរងការវាយប្រហារពីមេរោគ។ ហេតុនេះ អ្នកគួរមានកាលវិភាគគេងឱ្យបានទៀងទាត់ និងគេងឱ្យបាន ៧ ទៅ ៨ ម៉ោង ។
៣. គ្រប់គ្រងភាពតានតឹង ៖ ការគ្រប់គ្រងអារម្មណ៍តានតឹងបានល្អ ជាចំណែកមួយ ដែលធ្វើឱ្យប្រព័ន្ធភាពស៊ាំរបស់អ្នករឹងមាំ។ នៅពេលដែលអ្នកមានអារម្មណ៍តានតឹងខ្លាំង មានន័យថា រាងកាយរបស់អ្នកត្រូវការសកម្មភាពឆ្លើយតបមួយ ដែលអាចកាត់បន្ថយអារម្មណ៍នេះ។ ដូច្នេះ អ្នកគួរចំណាយពេល ដើម្បីសម្រាក សម្មាធិ ដកដង្ហើមវែងៗ ឬធ្វើសកម្មភាពផ្សេងៗដែលធ្វើឱ្យអ្នកអាចគ្រប់គ្រងភាពតានតឹងបាន។
៤. មានរបបអាហារល្អ ៖ របៀបដែលអ្នកញ៉ាំ និងអាហារដែលអ្នកញ៉ាំ មានឥទ្ធិពលយ៉ាងខ្លាំងដល់សុខភាពទូទៅរបស់អ្នក។ ការទទួលទានអាហារបានត្រឹមត្រូវ និងមានជីវជាតិគ្រប់គ្រាន់ អាចជួយឱ្យអ្នកគេងលក់ស្កប់ស្កល់ ផ្ដោតអារម្មណ៍បានល្អ និងមានកម្លាំងមាំមួន។ ជម្រើសដ៏ល្អបំផុត អ្នកអាចពិគ្រោះជាមួយអ្នកជំនាញផ្នែកអាហារូបត្ថម្ភ អំពីទម្លាប់នៃការទទួលទានអាហារ និងរបបអាហារដែលសក្តិសមសម្រាប់អ្នក។
៥. ការធ្វើលំហាត់ប្រាណទៀងទាត់ ៖ ការធ្វើលំហាត់ប្រាណជាទៀងទាត់អាចជួយការពារប្រព័ន្ធភាពស៊ាំរបស់អ្នកពីភាពសកម្មខ្លាំង ដែលកាត់បន្ថយកូលេស្តេរ៉ុល សម្ពាធឈាម និងហានិភ័យនៃជំងឺបេះដូង។ ជាពិសេស ការធ្វើលំហាត់ប្រាណ អាចប្រឆាំងនឹងការរលាក បញ្ហាតានតឹង និងជួយឱ្យគេងលក់ស្រួល៕
