យោងតាមរបាយការណ៍ ចេញផ្សាយដោយ DATAREPORTAL បានឱ្យដឹងថា មនុស្សម្នាក់ចំណាយពេលជាមធ្យម ៧ម៉ោងក្នុងមួយថ្ងៃជាមួយអេក្រង់ ហើយតួលេខ អាចនឹងខ្ពស់ជាងនេះ ប្រសិនបើគេត្រូវធ្វើការនៅមុខកុំព្យូទ័រជាប្រចាំ។ លើសពីនេះ ភាគច្រើន នៃមនុស្សសម័យថ្មី ចំណាយពេលជាមួយឧបករណ៍​ឌីជីថលច្រើនលើសលុប រហូតដល់មានមនុស្សមួយចំនួន ញៀននឹងទូរស័ព្ទ ថេបប្លេត និងកុំព្យូទ័រ ដល់កម្រិតគ្រោះថ្នាក់ចំពោះសុខភាពផ្លូវកាយ និងផ្លូវចិត្ត។ ដូច្នេះ WE Forum បានបង្ហាញពីទិចនិច ៦ ដើម្បីគ្រប់គ្រងការប្រើប្រាស់ឧបករណ៍ឌីជីថល​ឱ្យមានប្រសិទ្ធភាព។

១. មិនយកឧបករណ៍ឌីជីថលតាមខ្លួនគ្រប់ពេល ៖ ការរក្សាទុកឧបករណ៍ផ្សេងៗនៅឆ្ងាយពីភ្នែក នៅពេលដែលអ្នកមិនត្រូវការប្រើវា ជាផ្នែកមួយធ្វើឱ្យអ្នកអាចផ្ដោតអារម្មណ៍ធ្វើកិច្ចការសំខាន់ៗបានល្អ។ ប្រសិនបើអាច អ្នកគួរតែកុំទុកក្បែរកន្លែងគេង ហើយប្រើនាឡិការោទិ៍ជំនួសឱ្យទូរស័ព្ទវិញ។ ការអនុវត្តទម្លាប់បែបនេះ នាំឱ្យអ្នកអាចគេងលក់ស្កប់ស្កល់ និងជៀសវាងការលេងទូរស័ព្ទរហូតដល់យប់ជ្រៅ។

២. កំណត់ពេលវេលាមើលអេក្រង់ឧបករណ៍ឌីជីថល ៖ ការមើលអេក្រង់គ្រឿងអេឡិចត្រូនិចយូរពេក អាចបណ្ដាលឱ្យអ្នកឈឺក្បាល និងគេងមិនស្កប់។ ដូច្នេះ អ្នកគួរកំណត់ពេលវេលាដ៏សមស្របមួយ សម្រាប់ចំណាយពេលជាមួយអេក្រង់ និងបច្ចេកវិទ្យាផ្សេងៗ។ ប្រសិនបើអ្នកមិនអាចគ្រប់គ្រងដោយខ្លួន​​ឯងបាន អ្នកអាចប្រើកម្មវិធីទូរស័ព្ទ (Mobile App) ផ្សេងៗ ដើម្បីជំនួយការគ្រប់គ្រងនេះ។

៣. បិទសំឡេង Notification ៖ យោងតាមការចេញផ្សាយរបស់ ACM DL DIGITAL LIBRARY បានបង្ហាញថា សំឡេងរំខានជាប្រចាំរបស់ Notification អាចបង្ករឱ្យមានភាពតានតឹងទាំងផ្លូវកាយ និងផ្លូវចិត្ត។ ដូច្នេះ មធ្យោបាយល្អបំផុត ដើម្បីថែសុខភាព និងបង្កើនការផ្ចង់អារម្មណ៍ អ្នកគួរបិទសំឡេងរំខានគ្រប់ប្រភេទ ខណៈពេលកំពុងធ្វើការ។

៤. ចំណាយពេលខ្លះផ្ដាច់ខ្លួនពីបណ្ដាញឌីជីថល ៖ យោងតាមការសិក្សា បានបង្ហាញថា ការចំណាយជាមួយឧបករណ៍ និងបណ្ដាញឌីជីថល ច្រើនលើសលប់ មូលហេតុមួយ ដែលបណ្ដាលឱ្យមានជំងឺបាក់ទឹកចិត្ត និងវិបត្តិថប់បារម្ភ។ ដូច្នេះ ការចំណាយពេលខ្លះ ដើម្បីរស់នៅដោយមិនភ្ជាប់ខ្លួនទៅនឹងប្រព័ន្ធឌីជីថលពិតជាសំខាន់ណាស់។ ជំនួសឱ្យការប្រើឧបករណ៍អេឡិចត្រូនិចនៅពេលទំនេរ អ្នកអាចចំណាយពេលដើរហាត់ប្រាណ អានសៀវភៅ ជិះកង់ ឬធ្វើកិច្ចការផ្សេងៗដែលធ្វើឱ្យអ្នកមិននឹកដល់គ្រឿងអេក្រង់គ្រឿងអេឡិចត្រូនិច។

៥. បន្ថយពន្លឺអេក្រង់ ៖ ការចំណាយពេលច្រើនពេកសម្លឹងអេក្រង់ អាចធ្វើឱ្យឈឺភ្នែក និងប៉ះពាល់ដល់សុខភាពភ្នែក។ ដូច្នេះ អ្នកជំនាញលើកទឹកចិត្ត​ឱ្យអ្នកប្រើប្រាស់ ប្រើអេក្រង់ដែលមានទំហំជាជាងការប្រឹងសម្លឹងមើលអេក្រង់ដែលមានទំហំតូច។ ម្យ៉ាងទៀត ការបន្ថយពន្លឺពណ៌ខៀវលើអេក្រង់ ចំណែកមួយសំខាន់ ដើម្បីថែសុខភាពភ្នែក។

៦. ប្រើតែកម្មវិធីទូរស័ព្ទ (Mobile App) ដែលចាំបាច់ ៖ រៀបចំកម្មវិធីទូរស័ព្ទ កុំព្យូទ័រ និងថេប្លេតរបស់អ្នកឱ្យបានល្អ អ្នកនឹងអាចប្រើទូរស័ព្ទបានកាន់តែមានប្រសិទ្ធភាព។ ដូច្នេះ អ្នកអាចលុបកម្មវិធីដែលមិនសំខាន់ចេញពីទូរស័ព្ទ ដើម្បីកាត់បន្ថយ Notification ដែលអាចបង្កជាសំឡេងរំខាន និងធ្វើឱ្យល្បឿនដំណើរការនៃម៉ាស៊ីនទូរស័ព្ទយឺត។ ការរៀបចំកម្មវិធីទូរស័ព្ទបានល្អ ជាចំណែកមួយ ធ្វើឱ្យអ្នកកាន់តែមានផលិតភាពការងារខ្ពស់៕