ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងយុគសម័យដ៏ទំនើបនេះ បច្ចេកវិទ្យាបានជួយឱ្យយើងនៅជិតគ្នា និងអាចស្វែងរកចម្លើយគ្រប់យ៉ាងនៅត្រឹមចុងម្រាមដៃប៉ុណ្ណោះ។ ប៉ុន្តែ ការប្រើប្រាស់ឧបករណ៍ឌីជីថលជ្រុលហួសហេតុ អាចប៉ះពាល់ដល់សុខភាពផ្លូវកាយ និងផ្លូវចិត្តបាន។ ដូច្នេះ តើយើងអាចការពារសុខភាពយ៉ាងដូចម្តេច នៅក្នុងយុគសម័យបច្ចេកវិទ្យានេះ?
បើតាមអ្នកជំនាញ បច្ចេកវិទ្យាមិនមែនជារឿងអាក្រក់ទាំងស្រុងនោះទេ ប៉ុន្តែវាអាស្រ័យលើ របៀបដែលយើងប្រើប្រាស់វា។ ការប្រើប្រាស់ដើម្បីទំនាក់ទំនងគឺជារឿងល្អ ប៉ុន្តែការប្រើដើម្បីគ្រាន់តែអូសមើល (Scrolling) ដោយគ្មានគោលដៅ គឺជាប្រភព នៃភាពតានតឹង។ យ៉ាងណា អ្នកជំនាញបានផ្តល់នូវវិធីសាស្រ្តចំនួន៧ ដើម្បីកាត់បន្ថយការប្រើប្រាស់ឧបករណ៍ឌីជីថល និងទាញយកភាពម្ចាស់ការរបស់ខ្លួនឯងមកវិញ ៖
១. កំណត់ពេលវេលាឆ្ងាយពីអេក្រង់ក្នុងអំឡុងពេលថ្ងៃ ៖ ប្រសិនបើការងាររបស់អ្នកត្រូវប្រើកុំព្យូទ័រ ចូរដាក់ការរំលឹក (Alarm) ដើម្បីសម្រាក។ ដើរចេញពីតុធ្វើការទៅញ៉ាំបាយថ្ងៃត្រង់ ឬដើរកម្សាន្តខ្លីៗ ដោយមិនចាំបាច់យកទូរសព្ទទៅតាម។
២. សម្រាកពីកម្មវិធីដែលបង្កបញ្ហា ៖ សាកល្បងលុបកម្មវិធីណាដែលអ្នកចំណាយពេលអូសមើលច្រើនពេក (ដូចជា Facebook ឬ TikTok)។ ការចូលប្រើតាមរយៈកម្មវិធីរុករក (Browser) ជំនួសវិញ នឹងជួយឱ្យអ្នកមានពេលគិតពិចារណាមុននឹងសម្រេចចិត្តបើកវា។
៣. បន្ថយសមត្ថភាពទូរសព្ទ (Downgrade) ៖ ប្រសិនបើអ្នកពិបាកគ្រប់គ្រងខ្លួនឯង សាកល្បងប្រើទូរសព្ទធម្មតា (ចុចប៊ូតុង) ដែលអាចត្រឹមតែខលចេញ-ចូល ឬផ្ញើសារ។ វិធីនេះជួយឱ្យអ្នកមានវត្តមានពិតប្រាកដជាមួយមនុស្សជុំវិញខ្លួន។
៤. កំណត់ម៉ោងបិទទូរសព្ទ ៖ សាកល្បងបិទទូរសព្ទ ឬដាក់ក្នុងរបៀប Do Not Disturb ចាប់ពីពេលញ៉ាំបាយល្ងាច រហូតដល់ព្រឹកស្អែក ដើម្បីឱ្យខួរក្បាលបានសម្រាកពិតប្រាកដ។
៥. ប្រើប្រាស់មុខងារកំណត់ម៉ោងលើកម្មវិធី (App Limits) ៖ ប្រើប្រាស់មុខងារ Screen Time (សម្រាប់ iPhone) ឬ Digital Wellbeing (សម្រាប់ Android) ដើម្បីកំណត់ម៉ោងប្រើប្រាស់កម្មវិធីនីមួយៗ។ កាលណាអស់ម៉ោងដែលបានកំណត់ កម្មវិធីនោះនឹងផ្អាកដំណើរការ។
៦. បង្កើតតំបន់ «គ្មានទូរសព្ទ» ៖ កំណត់កន្លែងខ្លះក្នុងផ្ទះដែលមិនអនុញ្ញាតឱ្យប្រើទូរសព្ទជាដាច់ខាត ដូចជា បន្ទប់គេង ឬ តុបាយ។ ការមិនដាក់ទូរសព្ទក្បែរខ្លួនពេលគេង នឹងជួយឱ្យអ្នកមិនមានទម្លាប់អូសទូរសព្ទមុនពេលសម្រាក។
៧. ស្វែងរកជំនួយពីអ្នកជំនាញផ្លូវចិត្ត ៖ ប្រសិនបើអ្នកមានអារម្មណ៍ថា ការប្រើប្រាស់បច្ចេកវិទ្យាកំពុងគ្រប់គ្រងជីវិត បង្កឱ្យមានការថប់បារម្ភ បាក់ទឹកចិត្ត ឬប៉ះពាល់ដល់ការងារ និងទំនាក់ទំនង ចូរទៅពិគ្រោះជាមួយគ្រូពេទ្យជំនាញផ្នែកផ្លូវចិត្ត៕
