មនុស្សគ្រប់គ្នាតែងតែ​ប្រាថ្នាចង់បានជីវិតដែលមានសេចក្ដីសុខសុភមង្គល និងមានគុណភាពក្រោយពេលចូលនិវត្តន៍។ ជាពិសេស​ មិនចាំបាច់ខ្វល់ខ្វាយពីបញ្ហាលុយកាក់ ពេលវេលា និងសុខភាព ប៉ុន្តែដើម្បីមានសេរីភាពហិរញ្ញវត្ថុ ពេលវេលា និងសុខភាពល្អ ក្រោយចូលនិវត្តន៍ លុះត្រាតែយើង បានធ្វើរឿងដែលត្រឹមត្រូវមួយចំនួនខណៈពេលនៅពេញកម្លាំងធ្វើការ។

យោងតាម We forum ខាងក្រោមនេះ គឺជាដំបូន្មានជីវិតចំនួន ៤ចំណុច ដែលអ្នកចូលនិវត្តន៍នៅសហរដ្ឋអាមេរិកចំនួន ២០០នាក់ បានផ្ញើជូនយុវជនជំនាន់ក្រោយ៖

១. មានជំនាញមួយឱ្យច្បាស់ ៖ ការសោកស្ដាយដ៏ធំបំផុតរបស់អ្នកចូលនិវត្តន៍ គឺពួកគាត់មិនមានឱកាសទទួលបានការអប់រំតាមដែលខ្លួនឯងចង់បាន ខណៈគាត់នៅជាយុវវ័យ។ មនុស្សមួយចំនួនបានបោះបង់ការសិក្សាដើម្បីរកលុយផ្គត់ផ្គង់ខ្លួនឯង និងគ្រួសារ ព្រោះតែជីវភាពខ្វះខាត។ ប៉ុន្តែការឈប់រៀនគឺជាកំហុសដ៏ធំមួយ ព្រោះពួកគាត់មិនមានលទ្ធភាពប្រកួតប្រជែងក្នុងទីផ្សារការងារ និងមិនអាចទទួលបានប្រាក់ចំណូលខ្ពស់។

សារដែលគាត់ចង់ប្រាប់ទៅយុវជនជំនាន់ក្រោយគឺ មិនថាជីវភាពលំបាកប៉ុណ្ណាទេ មិនត្រូវបោះបង់ការសិក្សាដាច់ខាត់ យុវជនត្រូវមានជំនាញមួយច្បាស់លាស់ មិនថារៀនចប់ពីសាកលវិទ្យាល័យ ឬសាលាបច្ចេកទេសនោះទេ។ បន្ទាប់មកត្រូវដុសខាត់វាឱ្យមុត នោះប្រាក់នឹងរត់តាមជាមិនខាន។

២. ត្រូវផ្ដោតលើការថែសុខភាព ៖ មនុស្សចាស់ចូលនិវត្តន៍ជាច្រើនត្រូវចំណាយលុយដែលពួកគាត់រកបាននៅពេលធ្វើការលើថ្លៃព្យាបាលជំងឺ ។ ដោយសារកាលពីក្មេងពេញកម្លាំង ពួកគាត់ពុំបានខ្វល់ខ្វាយពីការថែសុខភាព។ ការមិនយកចិត្តទុកដាក់ថែសុខភាព គឺជាកំហុសដ៏ធំបំផុតមួយរ​បស់យុវជនគ្រប់សម័យកាល។ ទោះជាការរកលុយមានសារៈសំខាន់ប៉ុន្មានក៏ដោយ ក៏អ្នកមិនអាចភ្លេចពីសុខភាពបានដែរ ព្រោះវាជាមូលដ្ឋានគ្រឹះនៃជីវិត។

ដើម្បីជៀសវៀង ការចំណាយលុយ និងពេលវេលាចូលនិវត្តន៍របស់អ្នកនៅលើគ្រែ។ អ្នកគួរចាប់ផ្ដើម ផ្ដោតការយកចិត្តទុកដាក់ចំពោះសុខភាពចាប់ពីពេលនេះ។ ទោះជាការងាររវល់ខ្លាំងប៉ុណ្ណាក៏ដោយ អ្នកគួរតែចំណាយពេលខ្លះសម្រាក ដើម្បីផ្ដល់ថាមពលសម្រាប់ផ្លូវកាយ និងផ្លូវចិត្ត។

៣. កំណត់ចំណង់ចំណូលខ្លួនឯងឱ្យបានលឿន ៖ ការធ្វើកិច្ចការដែលខ្លួនឯងចូលចិត្ត ក៏ជាការរួមចំណែកដល់ការលើកកម្ពស់សុខុមាលភាពខ្លួនឯងផងដែរ។ នៅក្នុងភាពជាយុវវ័យ អ្នកត្រូវដឹងថា អ្នកស្រឡាញ់ និងចូលចិត្តធ្វើអ្វីជាងគេ ហេតុនេះ នឹងធ្វើឱ្យអ្នកមានភាពរីករាយក្នុងការបំពេញការងារ ដោយមិនចេះធុញទ្រាន់ ព្រោះអ្នកមិនមានអារម្មណ៍ថា វាជាការងារនោះទេ។ ផ្ទុយទៅវិញ បើសិនជាអ្នកមិនដឹងពីចំណង់ចំណូលចិត្តខ្លួនឯង និងធ្វើការដើម្បីតែទទួលបានប្រាក់ចំណូល ថ្ងៃណាមួយអ្នកនឹងបាត់បង់ថាមពលធ្វើវា ហើយអ្នកចូលនិវត្តន៍ជាច្រើន បានជួបហេតុការណ៍បែបនេះ ក្នុងជីវិតពួកគេ។ ចំណុចនេះ ក៏ជារឿងមួយដែលគួរឱ្យសោកស្ដាយខ្លាំងបំផុតផងដែរ។ ម្យ៉ាងវិញទៀត ការធ្វើការងារដែលខ្លួនឯងស្រឡាញ់អ្នកនឹងទទួលបានផលិតភាពខ្ពស់ និងមានឱកាសជោគជ័យច្រើនក្នុងអាជីព។

៤. ចំណាយពេលជាមួយមនុស្សសំខាន់ ៖ ការចំណាយពេល​របស់អ្នកជាមួយអ្នកដទៃ គឺជាសកម្មភាពយកចិត្តទុកដាក់ដ៏ថ្លៃថ្លាបំផុត ព្រោះការលះបង់ពេលវេលា គឺមិនអាចយកមកវិញបាននោះទេ។ ប៉ុន្តែ សូមកំណត់ប្រភេទមនុស្សដែលអ្នកគួរចំណាយពេលជាមួយ ព្រោះមិនមែនមនុស្សគ្រប់គ្នាសុទ្ធតែសក្តិសមទទួលបានការយកចិត្តទុកដាក់ពីអ្នកឡើយ។ យ៉ាងណាមិញ មនុស្សពីរនាក់ដែលអ្នកមិនត្រូវភ្លេចចំណាយពេលជាមួយ គឺអ្នកមានគុណ ព្រោះខណៈពេលដែលយើងកំពុងតែកើនអាយុ ពួកគាត់ក៏មានវ័យកាន់តែចំ​ណាស់ដូចគ្នា។ លើសពីនេះ អ្នកត្រូវដឹងអំពីប្រភេទមិត្តភក្តិ ក្រុមហ៊ុន និងមិត្តរួមការងារដែលអ្នកចង់រួមដំណើរជាមួយផងដែរ។ ពេលវេលារបស់យើងនៅលើផែនដីនេះខ្លីខ្លាំងណាស់ ហេតុនេះ ត្រូវចំណាយវាជាមួយមនុស្សដែលអ្នកគិតថាសក្តិសមបំផុត។

សរុបមក ដើម្បីទទួលបានជីវិតមួយដែលល្អប្រសើរក្រោយពេលចូលនិវត្តន៍ និងរស់នៅដោយមិនមានភាពស្ដាយក្រោយ មិនមែនជារឿងងាយស្រួលនោះទេ។ យើងត្រូវមានគម្រោង និងផែនការច្បាស់លាស់តាំងពីវ័យក្មេង ដោយត្រូវមានជំនាញមួយច្បាស់លាស់ ដើម្បីធ្វើជាប្រភពចំណូល។ លើសពីនេះ ត្រូវផ្ដោតលើការថែរក្សាសុខភាពជាចម្បង និងស្វែងរកចំណូលចិត្តខ្លួនឯងឱ្យឃើញ ព្រោះវាជំរុញឱ្យអ្នកធ្វើការដោយមិនហត់នឿយ។ ចំណែកចំណុចមួយចុងក្រោយ ត្រូវកំណត់ប្រភេទមនុស្សដែលអ្នកចង់ចំណាយពេលជាមួយ ព្រោះពេលវេលាគឺរបស់ដែលមានតម្លៃបំផុត ដូច្នេះក៏ត្រូវចំណាយវាជាមនុស្សសំខាន់បំផុតដូចគ្នា ហើយបុគ្គលដែលយុវជនត្រូវយកចិត្តទុកដាក់គ្រប់ពេលគឺអ្នកមានគុណ៕