ភ្នំពេញ – ថ្លែងក្នុងទិវាពិភពលោកកំចាត់រោគរបេង ២៤ មីនា ឆ្នាំ២០២៣ ក្រោមប្រធានបទ “មែនហើយ!យើងអាច បញ្ចប់ជំងឺរបេងបាន” ដែលបានប្រារព្ធធ្វើឡើងនៅក្នុងបរិវេណវត្តសាលាអណ្ដែត ឃុំក្រាំងយ៉ូវ ស្រុកស្អាង ខេត្តកណ្ដាល កាលពីសប្តាហ៍កន្លងទៅនេះ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការនៃក្រសួងសុខាភិបាល មានប្រសាសន៍ថា អត្រាឈឺ និងស្លាប់ដោយសារជំងឺរបេងក្នុងប្រទេសកម្ពុជាមានការធ្លាក់ចុះយ៉ាងខ្លាំងច្រើនជាងប្រទេសដទៃ។

រដ្ឋលេខាធិការនៃក្រសួងសុខាភិបាល បន្ថែមថា អត្រាស្លាប់នៃជំងឺរបេងបានថយចុះពី៤២ករណី ក្នុងចំណោមប្រជាជន ១សែននាក់ នៅឆ្នាំ២០០០ មកត្រឹម ២១ករណី ក្នុងចំណោមប្រជាជន ១សែននាក់ ក្នុងឆ្នាំ២០២១ ដែលមានអត្រាធ្លាក់ចុះស្មើនឹង៥០%។ រីឯអត្រាកើតមានជំងឺថ្មី (អាំងស៊ីដង់) បានធ្លាក់ចុះពី ៥៧៩ករណី ក្នុង ចំណោមប្រជាជន ១សែននាក់ នៅឆ្នាំ២០០០ មកដល់ ២៨៨ករណី ក្នុងចំណោមប្រជាជន ១សែននាក់ នៅឆ្នាំ២០២១ ដែលស្មើនឹងធ្លាក់ចុះ ៥០% ផងដែរ។ លោកជំទាវវេជ្ជបណ្ឌិត បន្តថា កម្ពុជាបានសម្រេចគោលដៅអភិវឌ្ឍន៍សហស្សវត្សពាក់ព័ន្ធ នឹងការកាត់បន្ថយអត្រាឈឺនឹងស្លាប់ដោយសារជំងឺរបេងនេះរួចហើយ នៅមុនកាលកំណត់៤ឆ្នាំ។

លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការនៃក្រសួងសុខាភិបាល

“ជោគជ័យរបស់ កម្ពុជាក្នុងការកំចាត់ជំងឺរបេង គឺជាស្នាដៃមួយដែលមានប្រទេសក្នុងចំនួនតិចតួចប៉ុណ្ណោះអាចសម្រេចបាន”

លោកជំទាវវេជ្ជបណ្ឌិត យក់ សម្បត្តិ បន្ថែមថា ការរៀបចំប្រារព្ធទិវាពិភពលោកកំចាត់រោគរបេង គឺនៅក្នុងគោលបំណងបន្តជំរុញ និងយកចិត្តទុកដាក់បន្ថែមទៀត ក្នុងការលើកកម្ពស់សុខភាព របស់ប្រជាជនឱ្យបានកាន់តែទូលំទូលាយ និងបំផុសការយល់ដឹង ការយកចិត្តទុកដាក់ក្នុងការប្រយុទ្ធនឹងជំងឺរបេង ផ្សព្វផ្សាយជូនដល់បងប្អូនប្រជាពលរដ្ឋឱ្យបានយល់អំពីទំហំនៃបញ្ហា និងផលវិបាកនៃជំងឺរបេងសំដៅចូលរួមចំណែក លើកកម្ពស់សុខុមាលភាពសង្គម ព្រមទាំងលើកកម្ពស់តម្លៃ និងសេចក្ដីថ្លៃថ្នូររបស់សង្គមជាតិទាំងមូល។

ក្នុងឱកាសនោះដែរ ឯកឧត្តម ប្រាក់ សារ៉ាត់ អភិបាលរងខេត្តកណ្ដាល បានស្នើឱ្យរដ្ឋបាលក្រុង-ស្រុកទាំងអស់ ត្រូវបញ្ចូលបញ្ហារបេង ជាបញ្ហាអាទិភាពរបស់ខ្លួនក្នុងផែនការអភិវឌ្ឍមូលដ្ឋាន ហើយត្រូវលើកផែនការ និងប្តេជ្ញាបញ្ចប់ជំងឺរបេង នៅក្នុងមូលដ្ឋានរៀងៗខ្លួនដោយត្រូវសហការឱ្យបានល្អជាមួយអង្គការ និងសា្ថប័ន ជំនាញពាក់ព័ន្ធ ជាពិសេសប្រជាពលរដ្ឋទាំងអស់នៅក្នុងខេត្តកណ្តាល។ ទន្ទឹមគ្នានេះ សូមស្វែងយល់អំពីជំងឺរបេង ដោយមិនត្រូវមានការខ្មាសអៀន រើសអើង មាក់ងាយ និងត្រូវទទួលយកការពិនិត្យ ការធ្វើរោគវិនិច្ឆ័យ និងការព្យាបាលឱ្យទាន់ពេលវេលា ត្រឹមត្រូវ និងមានប្រសិទ្ធភាព នៅតាមមណ្ឌលសុខភាពដែលជិតមូលដ្ឋានខ្លួន ពីព្រោះរបងជាជំងឺបង្ការបាន ព្យាបាលបាន និងជាសះស្បើយមួយរយភាគរយ ដោយមិនមានការបង់ប្រាក់ឡើយ។

គួរជម្រាបជូនថា តាមការប៉ានស្មាននៅក្នុងពិភពលោកក្នុងមួយឆ្នាំៗមានប្រជាជនប្រមាណ ១០លាន ៦សែននាក់កើតជំងឺរបេង ប៉ុន្តែអ្នកជំងឺប្រហែល ៣លាននាក់ក្នុងមួយឆ្នាំៗពុំទាន់ទទួលសេវាថែទាំ និងព្យាបាលឡើយ។ លើសពីនេះ ជំងឺរបេងនៅតែឆក់យកអាយុជីវិតមនុស្សក្នុងមួយឆ្នាំៗប្រមាណ ១លាន៤សែននាក់៕