ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីកែប្រែទម្លាប់មិនល្អបាន ជាដំបូងត្រូវកំណត់អំពីអ្វីទៅជាទម្លាប់មិនល្អ? ព្យាយាមយកសកម្មភាពថ្មីៗ មកជំនួសដើម្បីបង្កើនភាពរស់រវល់ដោយមានប្រសិទ្ធភាព និងព្យាយាមអនុវត្តន៍ការនិយាយពាក្យពេចន៍វិជ្ជមាន ចំពោះខ្លួនឯងរាល់ថ្ងៃ។ ទោះតិច ឬច្រើន មនុស្សគ្រប់គ្នា សុទ្ធតែធ្លាប់ជួបប្រទះនូវទម្លាប់មិនល្អ ដូចជាពន្យារពេលក្នុងការបញ្ចប់ភារកិច្ច ឬដឹងថាអាហារខ្លះមិនផ្តល់ផលវិជ្ជមាន ក៏នៅតែបរិភោគ ដែលបង្កបានទៅជា ភាពតានតឹង និងប៉ះពាល់ទៅកាន់សុខភាពផ្លូវចិត្ត។ យ៉ាងណាមិញ ការស្គាល់វិធីសាស្រ្ត រួមទាំងការ ប្តេជ្ញាចិត្តផ្ទាល់ខ្លួនក្នុងការផ្លាស់ប្តូរ គឺជាចំណុចចាប់ផ្តើមនាំទៅរកភាពល្អប្រសើរ។ តាមរយៈគេហទំព័រ Help បានបង្ហាញគន្លឹះមួយចំនួន១០ ក្នុងការកែប្រែទម្លាប់អវិជ្ជមានដូចតទៅ៖
១.កំណត់ប្រភេទបញ្ហា និងយល់ពីផលប៉ះពាល់ ៖ ជំហានដំបូងក្នុងការបំបែក ឬផ្លាស់ប្តូរទម្លាប់មិនល្អ គឺការចាប់ផ្តើមកំណត់ និងស្វែងយល់ពីបញ្ហាជាមុនសិនថា តើចង់ផ្លាស់ប្តូរអ្វី? ចាប់ផ្តើមឆ្លុះបញ្ចាំងរាល់ទម្លាប់ទាំងឡាយណា ដែលយល់ថានាំឱ្យប៉ះពាល់ទៅកាន់ការងារ និងការសិក្សា ឬសម្ពាធផ្លូវចិត្ត។ ប្រសិនបើរកឃើញថា បន្ទាប់ពីប្រព្រឹត្តសកម្មភាពទាំងនោះហើយបណ្តាលឱ្យមានភាពតានតឹង ឯកា ឬអាការផ្សេងៗ តាមរយៈទម្លាប់ចាស់ៗ ត្រូវកត់ចំណាំទុកឱ្យអស់ ដើម្បីមានភាពងាយស្រួលក្នុងការស្វែងរកវិធីសាស្រ្តក្នុងការដោះស្រាយក្នុងការ ឬកាត់ចោលទម្លាប់ ដែលមិនចង់ឱ្យកើតមានទៅក្នុងការរស់នៅប្រចាំថ្ងៃ។
២.បង្កើនឥរិយាបថថ្មី ជំនួសឥរិយាបថមិនល្អចាស់ៗ ៖ ដើម្បីបង្កើនប្រសិទ្ធភាព ក្នុងការគ្រប់គ្រងខ្លួនឯងឱ្យស្ថិតក្នុងទម្លាប់មួយ ដែលផ្តល់ជាប្រយោជន៍ ត្រូវតែបង្កើនសកម្មភាពល្អៗឱ្យបានច្រើនជាមុនសិន សឹមចាប់ផ្តើមកាត់ចោលទម្លាប់ដែលមិនល្អចោល។ (ជាឧទារហណ៍ រៀងរាល់ពេលសម្រាកពីការសិក្សាសិស្សម្នាក់ តែងតែទៅលេងល្បែងភ្នាល់គ្នាជាប្រចាំ ដូច្នេះក្នុងការកាត់ចោលនូវសកម្មភាពនេះ ជាដំបូងសិស្សម្នាក់នោះ ត្រូវរៀបកាលវិភាគកំឡុងពេលសម្រាកពីការសិក្សា ដូចជាទៅរៀនថ្នាក់តន្រ្តីបន្ថែមនូវជំនាញដែលខ្លួនស្រឡាញ់ ឬចំណាយពេលជាមួយអ្នកផ្ទះជាដើម) ជារួម គឺផ្តោតទៅលើ ការអភិវឌ្ឍនៅត្រង់ចំណុចណាដែលមានភាពវិជ្ជមានតែប៉ុណ្ណោះ។
៣.ស្វែងយល់ពីបុព្វហេតុ ដែលនាំឱ្យមានទម្លាប់មិនល្អ ហើយប្រើវាជាប្រយោជន៍ ៖ ការកើតមានសកម្មភាពមិនល្អមួយ ទៅក្នុងដំណើរជីវិតប្រចាំថ្ងៃ អាចបណ្តាលមកពីកត្តាអ្វីមួយ ដែលមនុស្សពុំបានកត់សម្គាល់ មិនថាកត្តាខ្លួនឯង កត្តាខាងក្រៅ ឬបរិយាកាសជុំវិញខ្លួន។ ការដឹងពីបុព្វហេតុ ដែលនាំឱ្យមានទម្លាប់មិនល្អកើតមាន គឺជាច្រកចេញមួយ ដែលជួយឱ្យខ្លួនឯង រកឃើញកម្លាំងជំរុញចិត្តក្នុងការផ្លាស់ប្តូរដូចគ្នា។
៤.និយាយវិជ្ជមានទៅកាន់ខ្លួនឯង ៖ ទោះដឹងពីគន្លឹះនៃការដោះស្រាយបញ្ហាប្រឈម យ៉ាងណាក៏ដោយ ប្រសិនបើនៅតែបន្ត និយាយមិនល្អទៅកាន់ខ្លួនឯង ដដែលជាដដែល នោះទម្លាប់មិនល្អពិបាកនឹងកាត់ចោលណាស់ ជាជំហានបន្ទាប់គឺការបណ្តុះស្មារតីឱ្យចេះនិយាយពាក្យល្អៗ ទៅកាន់ខ្លួនឯងឱ្យបានរឿយៗ។ រំឮកខ្លួនឯងជាប្រចាំថា ត្រឹមតែការនិយាយទៅកាន់ខ្លួនឯងនូវប្រយោគល្អៗគឺស្មើនឹងភាពអត់ធ្មត់នាំទៅរកការផ្លាស់ប្តូរ និងជាចំណែកជួយរំកិលខ្លួន បន្តិចម្តងៗ ទៅរកទម្លាប់ដែលផ្តល់នូវប្រយោជន៍ចំពោះខ្លួនឯង និងអ្នកដទៃ ក្រៅពីនោះសុំឱ្យអ្នកដទៃជួយរំឮកក៏ជាចំណែកពន្លឿនភាពការផ្លាស់ប្រែដែរ។
៥.ផ្លាស់ប្តូរតូចៗតែជាប់លាប់ ៖ ប្រសិនបើចាប់ផ្តើម ក្នុងទម្លាប់មួយដែលធំៗ អាចបណ្តាលមានអារម្មណ៍តានតឹងមិនដឹងថា ត្រូវធ្វើចំណុចណា ហើយបញ្ចប់នៅចំណុចណា រួមទាំងកើតមានអាការស្រ្តេស។ តែយ៉ាងណា ការចាប់ផ្តើមតូចៗ តែមានភាពទៀងទាត់ ជំរុញឱ្យមានការផ្លាស់ប្តូរមួយ ឆ្លើយតបក្នុងរយៈពេលវែង ទន្ទឹមគ្នានោះ ត្រូវមានមោទនភាព ឬអបអរសាទរផ្តល់រង្វាន់ឱ្យខ្លួនឯងរៀងរាល់ពេលផ្លាស់ប្តូរសកម្មភាពអាក្រក់ៗបានសម្រេចម្តងៗ។
៦.កំណត់គោលដៅផ្ទៀងផ្ទាត់ជាប្រចាំ ៖ ការមានគោលដៅជាក់លាក់ ជាចំណែកសំខាន់ហើយ ប៉ុន្តែប្រសិនបើមិនបានវាសវែង និងតាមដានជាប្រចាំនោះទេ ទោះបីការកំណត់ទាំងនោះ មានរូបភាពធំឬតូច គឺនៅតែពិបាក ក្នុងការសម្រេចឱ្យបានជាលទ្ធផល។ ដូច្នេះកិច្ចការបន្ទាប់ក្រោយពេលរកឃើញ ទម្លាប់ដែលចង់ប្ដូរ ឬក្រោយការរៀបចំផែនការរួចរាល់អស់ហើយ អ្វីដែលគួរធ្វើជាបន្ទាប់គឺ តាមដានការប្រឹងប្រែងខ្លួនឯងជាប្រចាំ តាមរយៈការសរសេរជាកំណត់ហេតុ ឬក៏ប្រើប្រាស់កម្មវិធីឌីជីថលជាជំនួយក្នុងការតាមដាន។
៧.នៅក្នុងបរិយាកាសមួយដែលផ្តល់ការគាំទ្រ ៖ ផ្តល់ឱកាសឱ្យខ្លួនឯង បាននៅក្បែរមនុស្សដែលផ្តល់នៅការគាំទ្រ និងជាបំណែកមួយក្នុងរំឮកលើកទឹកចិត្តឱ្យកំចាត់ចោលរាល់ទម្លាប់មិនល្អ។ ពេលរកបានក្រុមមនុស្សដែលផ្តល់ការគាំទ្របែបនេះ បានហើយជាកិច្ចបន្ទាប់ គឺចែករំលែកនូវគោលដៅ ឬក្ដីរំពឹងដែលកំពុងអនុវត្តន៍ឱ្យពួកគាត់បានដឹង ព្រោះក្នុងចំណោមនោះ ក៏អាចមានបុគ្គលខ្លះ កំពុងតែមានការប្តេជ្ញាចិត្តដូចគ្នានឹងយើងដែរ កត្តានេះជាឱកាសល្អដែលមានគ្នាដើម្បីអនុវត្តន៍ជាមួយគ្នា។ បរិយាកាសមួយ ដែលផ្តល់ការគាំទ្រ រឹងរឹតតែបំផុសបាននូវកម្លាំងចិត្ត ក្នុងការបំបែកទម្លាប់អវិជ្ជមានបានលឿនជាងការព្យាយាមធ្វើតែម្នាក់ឯង។
៨.ស្វែងយល់បន្ថែមអំពីអាការញៀននឹងបណ្តាញសង្គម ៖ នៅក្នុងសង្គមឌីជីថល នាពេលបច្ចុប្បន្ន បណ្តាញសង្គម មានឥទ្ធិពលយ៉ាងខ្លាំង រួមទាំងមានមាតិកាមួយចំនួន អាចអូសទាញអ្នកប្រើប្រាស់ឱ្យប្រព្រឹត្តទម្លាប់មិនល្អបានយ៉ាងងាយ ជាក់ស្តែងបណ្តាញសង្គម បានអន្ទងចិត្តមនុស្សឱ្យចុចអូសចុះ ចុចអូសឡើង ដោយប្រើពេលរាប់ម៉ោងនៅខាងមុខអេក្រង់ បង្កឱ្យមានទម្លាប់ពន្យារពេល។ ការដាក់ដែនកំណត់ និងការអប់រំចិត្តខ្លួនឯងឱ្យប្រើប្រាស់ត្រូវគោលដៅ ក៏ដូចជាការកំណត់ចំនួនសារនៃការទទួលបាន សុទ្ធសឹងតែជាចំណែកសំខាន់មិនគួរមើលរំលង។
៩.ដឹងពីដំណើរការរបស់ភាពរីករាយក្នុងរយៈពេលខ្លី ៖ សកម្មភាពខ្លះ ផ្តល់ភាពរីករាយក្នុងរយៈពេលខ្លី តែប៉ុណ្ណោះ ប៉ុន្តែផ្តល់ភាពសោកស្តាយក្នុងរយៈពេលវែង និងផ្តល់នូវលទ្ធផលមួយដែលខ្លួនមិនពេញចិត្តទៅវិញ។ ។ ជាក់ស្ដែងការលេងបណ្តាញសង្គម និងល្បែងភ្នាល់គ្នា មានឥទ្ធិពលធ្វើឱ្យជក់ចិត្តដិតអារម្មណ៍ រហូតពិបាកទាញខ្លួនឯង ឱ្យចេញពីសកម្មភាពទាំងនោះ។
១០.ពឹងអ្នកជំនាញ ៖ ស្ថិតក្នុងស្ថានភាពមួយរកឃើញថា ការចាកចេញពីទម្លាប់មិនល្អ មានភាពលំបាក់ខ្លាំង ឬទោះបីជាបានអនុវត្តន៍តាមគន្លឹះជាច្រើនកន្លងមករួចហើយក៏ដោយ នៅតែមិនបានផល ដល់ពេលដែលត្រូវពឹងពាក់អ្នកជំនាញឱ្យជួយដោះស្រាយចំណោទបញ្ហាមួយនេះ មិនថាការផ្តល់យោបល់ ឬប្រាប់បន្ថែមពីរបៀបនៃការផ្លាស់ប្តូរដោយប្រសិទ្ធភាព ព្រោះបើពុំនោះទេ បញ្ហាផ្លូវចិត្តអាចនឹងកើតមាន៕
