ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើយោងតាមរបាយការណ៍របស់គណៈកម្មាធិការជាតិ រៀបចំការបោះឆ្នោត នៅក្នុងដំណើរការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ មានអ្នកសង្កេតការណ៍ជាតិ និងអ្នកសង្កេតការណ៍អន្តរជាតិចូលរួមសរុបប្រមាណ ជាង៩ម៉ឺននាក់ ក្នុងនោះសម្រាប់អ្នកសង្កេតការណ៍ជាតិ ដែលភាគច្រើនគេឃើញសុទ្ធសឹងតែជាយុវជន មានចំនួនប្រមាណ ៨៩៥៦២នាក់។ តើយុវជនទទួលបានផលប្រយោជន៍អ្វីខ្លះ ពីការងារសង្កេតការណ៍នេះ?
លោក ខាន់ សុភ័ណ ដែលជាយុវជនម្នាក់ចូលរួមជាអ្នកសង្កេតការណ៍បោះឆ្នោតនៅខេត្តព្រះវិហារ មានប្រសាសន៍ថា ការចូលរួមធ្វើជាអ្នកសង្កេតការណ៍បោះឆ្នោតនេះ គោលបំណងដំបូងបំផុត គឺលោកចង់ដឹងថា ការបោះឆ្នោតជ្រើសរើសតំណាងរាស្រ្តលើកទី៧នេះ ប្រព្រឹត្តទៅប្រកបដោយតម្លាភាព ប្រសិទ្ធិភាព និងត្រឹមត្រូវដែរឬអត់ ? តែយ៉ាងណា លោកមើលឃើញថា ការបោះឆ្នោតនេះ គឺត្រឹមត្រូវ និងយុត្តិធម៌ ស្របតាមច្បាប់របស់គណកម្មាធិការៀបចំការបោះឆ្នោត (គ.ជ.ប) ដោយអ្នកចូលរួមបោះឆ្នោតមិនមានការគាបសង្កត់ ឬបង្ខំអំពីអាជ្ញាធរ ប្រជាពលរដ្ឋទៅបោះឆ្នោតដោយការពេញចិត្ត ។
ដោយឡែកបើនិយាយអំពីផលប្រយោជន៍ដែលលោកទទួលបានពីការងារសង្កេតការណ៍បោះឆ្នោតនេះ គឺលោក សុភ័ណ បញ្ជាក់ថា លោកទទួលបានចំណេះដឹងយ៉ាងច្រើនពីការងារមួយនេះ ដូចជា យល់ដឹងពីច្បាប់នៃការបោះឆ្នោត, ដំណើរការនៃការបោះឆ្នោត, ការគ្រប់គ្រងពេលវេលា និងនីតិវិធី នៃការដោះស្រាយបញ្ហាជាដើម។
សម្រាប់ កញ្ញា ភន ស្រីល័ក្ខ ដែលក៏ជាយុវជនចូលរួមជាអ្នកសង្កេតការណ៍បោះឆ្នោតមួយដែរនោះ ការងារជាអ្នកសង្កេតការណ៍បោះឆ្នោតនេះ កញ្ញាទទួលបានចំណេះដឹង និងបទពិសោធន៍ថ្មីដែលមិនធ្លាប់មានពីមុនមក និងបានដឹងអំពីបញ្ហាប្រឈមដែលអាចកើតមាននៅក្នុងដំណើរការនៃការបោះឆ្នោត ព្រមទាំងវិធីដោះស្រាយបញ្ហាទាំងនោះ។ បើតាមកញ្ញា ភន ស្រីល័ក្ខ ការចូលរួមធ្វើជាអ្នកសង្កេតការបោះឆ្នោតនេះ កញ្ញាមិនបានរំពឹងទៅប្រាក់កម្រៃដែលទទួលបាននោះទេ ប៉ុន្តែកញ្ញាចង់បានបទពិសោធន៍ច្រើនជាង។
បើតាម លោក កែ រឹទ្ធិ ប្រធាននាយកដ្ឋានសេវាកម្មច្បាប់ និងវិវាទកម្ម (គ.ជ.ប) អ្នកសង្កេតការណ៍ជាតិ គឺជាជនជាតិខ្មែរ ឬជនបរទេសដែលជាសមាជិកនៃសមាគមន៍ ឬអង្គការមិនមែនរដ្ឋាភិបាលក្នុងស្រុកដែលបានចុះបញ្ជីរនៅក្រសួងមហាផ្ទៃ ហើយអនុញ្ញាតិដោយ គ.ជ.ប។ លោកថា អ្នកសង្កេតការណ៍បោះឆ្នោត ទទួលបានសិទ្ធិសំខាន់ៗដូចជា ទី១.សិទ្ធិដើរសង្កេតមើលក្នុងរាជធានីខេត្តដែលគាត់ស្នើសុំ គាត់អាចចូលទៅក្នុងការិយាល័យរាប់សន្លឹកឆ្នោតបាន, ទី២. អ្នកសង្កេតការណ៍មានសិទ្ធិធ្វើសកម្មភាពសង្កេតមើលទាំងមុនអំឡុងពេល ក្នុងអំឡុងពេល និងក្រោយអំឡុងពេលដំណើរការបោះឆ្នោត និង ទី៣. អ្នកសង្កេតការណ៍មានសិទ្ធិទទួលបានការការពារអំពីភ្នាក់ងារសន្តិសុខបោះឆ្នោត ពីសុវត្ថិភាពក្នុងការធ្វើដំណើរ តាមបណ្ដារាជធានីខេត្ត បើមានការគំរាមកំហែងបញ្ហាណាមួយ។
ប្រធាននាយកដ្ឋានសេវាកម្មច្បាប់ និងវិវាទកម្ម (គ.ជ.ប) បន្ថែមថា អ្នកសង្កេតការណ៍ ក៏ក្រមសីលធម៌ត្រូវប្រកាន់ភ្ជាប់ផងដែរ ដោយអ្នកសង្កេតការណ៍មានតួនាទីសង្កេតមើលគ្រប់ទីកន្លែងស្នើសុំ, រាយការណ៍, ធ្វើរបាយការណ៍អំពីសកម្មភាពទាំងឡាយក្នុងដំណើរការបោះឆ្នោត និងមានសិទ្ធិជជែកជាមួយអ្នកបោះឆ្នោត គណបក្សនយោបាយ និងបេក្ខជន ប៉ុន្តែមិនជជែកអំពីការគាំទ្រប្រឆាំងគណបក្សនយោបាយ ឬបេក្ខជនណាមួយឡើយ៕
