កម្មវិធីបណ្តុះបណ្តាល Women Innovators Bootcamp លើកទី១ ក្រោមកម្មវិធី SparkMeet រដូវកាលទី៤ លើប្រធានបទ “Vision Board and Goal Setting” កំពុងតែជំរុញនិស្សិតស្រី និងស្រ្តី ប្រមាណ៥៥នាក់ អភិវឌ្ឍសមត្ថភាពផ្នែកបច្ចេកវិទ្យា ភាពជាអ្នកដឹកនាំ និងសហគ្រិនភាព។

លោកស្រីវេជ្ជបណ្ឌិត លឹម ចាន់មុនីរត្ន័ អគ្គនាយិកា នៃមន្ទីសំរាកព្យាបាល ឌី.អរ ថប ឯកទេសសម្ភពនិងរោគស្រ្តី ដែល​បាន​ចូលរួម​កម្មវិធី Women Innovators Bootcamp មានប្រសាសន៍ថា ការចូលរួមកម្មវិធីរបស់លោកស្រី ក៏ព្រោះតែចង់អភិវឌ្ឍសមត្ថភាពខ្លួនឯងទៅមុខជានិច្ច ហើយចង់ស្គាល់នូវអ្វីដែលថ្មីៗ ជួបជាមួយមនុស្សថ្មីៗ ដើម្បីបាននូវគំនិតឆ្នៃប្រឌិតថ្មីៗបន្ថែមទៀត ។

លោកស្រីវេជ្ជបណ្ឌិតបន្ថែមថា កម្មវិធីបណ្ចុះបណ្ដាលនេះ មាន៣ចំណុចដែលលោកស្រីចង់រៀនសូត្របន្ថែម ដើម្បី​យកមក​អភិវឌ្ឍសមត្ថភាពខ្លួនឯង ក៏ដូចជាអភិវឌ្ឍក្រុមការងារ រួមមាន ទី១. ភាពជាអ្នកដឹកនាំ ព្រោះជាថ្នាក់ដឹកនាំចាំបាច់ត្រូវមានជំនាញក្នុងការដឹកនាំគ្រប់គ្រងបុគ្គលិកឱ្យបានល្អ, ទី២. ផ្នែកឌីជីថល ដើម្បីកែប្រែអាជីវកម្មមន្ទីរពេទ្យឱ្យដើរទាន់ការរីកចម្រើននៃបច្ចេកវិទ្យាឌីជីថលថ្មីៗ និងទី៣. របៀបធ្វើការងារជាក្រុម។

អគ្គនាយិកានៃមន្ទីសំរាកព្យាបាល ឌី.អរ ថប បន្ថែមថា បន្ទាប់ពីចូលរួមកម្មវិធីបណ្ដុះបណ្ដាលនេះហើយ ចំណេះដឹងថ្មីៗដែលលោកស្រីទទួលបាន គឺភាពជាអ្នកដឹកនាំ ការធ្វើការងារជាក្រុម ការមានទំនាក់ទំនងថ្មីៗជាមួយនឹងចំណេះដឹងផ្នែកឌីជីថល។ លោកស្រីចង់យកចំណេះដឹងដែលទទួលបានពីកម្មវិធីនេះ ទៅអនុវត្តជាមួយក្រុមការងារ ដើម្បីឱ្យអាជីវកម្មកាន់តែប្រសើរឡើង។

កញ្ញា​ ស៊ុន​ ជេសស៊ីកា ជានិស្សិតឆ្នាំទី៤ ផ្នែកវិទ្យាសាស្ត្រកុំព្យូទ័រ នៅសាកលវិទ្យាល័យភូមិន្ទភ្នំពេញ និងជាអ្នកបង្កើតកម្មវិធី, បង្កើតមាតិកានៅលើ TikTok ចែករំលែកចំណេះដឹងទាក់ទងនឹងព័ត៌មានវិទ្យា និងការសរសេរកូដ បានប្រាប់ឱ្យដឹងថា ការចូលរួមកម្មវិធីបណ្តុះបណ្តាល Women Innovators Bootcamp នេះ ក៏ព្រោះតែកញ្ញាចង់ជំរុញខ្លួនឱ្យចេញពីតំបន់ងាយស្រួល ខណៈការរៀនជំនាញបច្ចេកទេសត្រូវការការរីកចម្រើនក្នុងផ្នែកផ្សេងទៀតដូចជា ភាពជាអ្នកដឹកនាំ ការទំនាក់ទំនង និងការគិតប្រកបដោយភាពច្នៃប្រឌិត។

និស្សិតឆ្នាំទី៤ ផ្នែកវិទ្យាសាស្ត្រកុំព្យូទ័រ រូបនេះ បន្ថែមថា កញ្ញាមានចំណង់ចំណូលចិត្តផ្នែកបច្ចេកវិទ្យា ការច្នៃប្រឌិត និងការចូលរួមជាសហគមន៍ ហើយកម្មវិធីនេះជាឱកាសដើម្បីភ្ជាប់ទំនាក់ទំនងជាមួយស្ត្រីដែលមានគំនិតដូចគ្នា។ កញ្ញាបន្តថា វគ្គបណ្តុះបណ្តាលភាពជាអ្នកដឹកនាំ ការបង្កើតម៉ាកផ្ទាល់ខ្លួន និងការគិតបែបច្នៃប្រឌិតនេះ គឺបានបង្រៀនកញ្ញាពីរបៀបគិតជាយុទ្ធសាស្ត្រ និងច្នៃប្រឌិតបន្ថែមទៀត។ ហើយក្នុងនាមជាអ្នកបង្កើតមាតិកា កញ្ញានឹងអនុវត្តជំនាញទាំងនេះ ដើម្បីបង្កើតមាតិកាដែលមានអត្ថន័យអប់រំ និងបំផុសគំនិតអ្នកដទៃ។

“ខ្ញុំមានក្ដីសុបិន្តចង់បង្កើតអាជីវកម្មផ្ទាល់ខ្លួននៅថ្ងៃណាមួយ ហើយខ្ញុំមានអារម្មណ៍ថា កម្មវិធីនេះអាចផ្តល់ឱ្យខ្ញុំនូវគំនិត ឧបករណ៍ និងភាពច្នៃប្រឌិត ដើម្បីចាប់ផ្តើមបង្កើតចក្ខុវិស័យនោះ”

កញ្ញា​ ស៊ុន​ ជេសស៊ីកា បន្ថែមថា កញ្ញាក៏ចេះពីរបៀបនិយាយជាសាធារណៈ របៀបបង្ហាញគំនិតរបស់ខ្លួនដល់អ្នកដទៃកាន់តែប្រសើរឡើង ហើយចំណុចទាក់ទាញដ៏ធំបំផុត គឺការរៀនពីរបៀបដើម្បីមើលឃើញគោលដៅរបស់ខ្លួន ហើយប្ដេជ្ញាចិត្តធ្វើឱ្យសម្រេចតាមវិធីជាក់ស្តែង និងផ្តោតអារម្មណ៍។ ទន្ទឹមគ្នានេះ កញ្ញាទទួលបានការលើកទឹកចិត្ត និងត្រៀមខ្លួនកាន់តែច្រើនដើម្បីបន្តគោលដៅរយៈពេលវែងក្នុងការចាប់ផ្តើមអាជីវកម្ម។ មានទំនុកចិត្តលើសមត្ថភាពក្នុងការដឹកនាំរៀបចំផែនការ ដើម្បីចាត់វិធានការដំបូងឆ្ពោះទៅរកការប្រែក្លាយគំនិតឱ្យក្លាយជាការពិត។ កញ្ញាជេសស៊ីកា ក៏បានលើកទឹកចិត្តស្ត្រីទាំងអស់ស្វែងយល់ និងចាប់យកបច្ចេកវិទ្យាមកប្រើប្រាស់ក្នុងកិច្ចការងារប្រចាំថ្ងៃ និងជឿជាក់លើសក្តានុពលផ្ទាល់ខ្លួន។

គួរជំរាបជូនថា វគ្គបណ្តុះបណ្តាលលើកទី១ នៃកម្មវិធី SparkMeet Season 4: Women Innovators Bootcamp មានរយៈពេល ៦សប្តាហ៍ ដោយកំពុងធ្វើ នៅមជ្ឈមណ្ឌលបណ្តុះធុរកិច្ចថ្មី “តេជោ” ដើម្បីលើកកម្ពស់ និងគាំទ្រស្ត្រីក្នុងវិស័យបច្ចេកវិទ្យា, ភាពជាអ្នកដឹកនាំ និងសហគ្រិនភាព៕