មនុស្សមួយចំនួន មានភាពស្ទាក់ស្ទើរក្នុងការនិយាយថា «ទេ» ទាំងដែលខ្លួនឯងកំពុងស្ថិតក្នុងស្ថានភាពមួយដែលមិនសមប្រកបដូចជា កំពុងមានកាតព្វកិច្ចសំខាន់ កំពុងស្រ្តេស ឬភារកិច្ចផ្ទាល់ខ្លួនដែលរាប់មិនអស់ដទៃទៀត ។ បើសិនជា លោកអ្នកកំពុងជួបប្រទះនឹងរឿងហេតុទាំងនេះ វាមិនមែនជារឿងចម្លែកពេកនោះទេ។ ពីព្រោះមានមនុស្សជាច្រើនប្រឈមនឹងបញ្ហានេះដែរ ។ ដោយឡែក ចំណុចដែលត្រូវយកចិត្តទុកដាក់នោះ គឺ ត្រូវដឹងពីដំណើរប្រព្រឹត្តិទៅ ឬក៏របៀបដោះស្រាយនឹងករណីនេះ ដោយវិជ្ជមានក្នុងគោលបំណង ផ្តល់អទិភាពដល់ការងារស្នូល កាត់បន្ថយស្រ្តេស និងរក្សាដែលកំណត់ចំពោះសកម្មភាពចាំបាច់ៗប៉ុណ្ណោះ។

ពេលខ្លះ ពាក្យបដិសេធន៍ ជាប្រយោគមួយដែលគ្រាន់តែស្ដាប់មួយភ្លែត ហាក់ទាញបានផ្នត់គំនិតអវិជ្ជមានមួយរំពេច! ប៉ុន្តែវាមិនដូច្នោះឡើយ។ របៀបនិយាយបដិសេធ ក្លាយជាចំណែក ដ៏សំខាន់មួយជំរុញឱ្យមានផាសុកភាព ឬបែបបទក្នុងការរស់នៅប្រចាំថ្ងៃ ។ ដូច្នេះ ដើម្បីដឹងថា វាមានសារៈសំខាន់បែបណា ហើយហេតុអ្វីបានជាមនុស្សត្រូវរៀននិយាយថាទេ? ឬពេលណា ដែលត្រូវប្រើប្រាស់ពាក្យបដិសេធ? និងគួរអនុវត្តន៍ក្នុងករណីណាខ្លះ?

បើតាមគេហទំព័រ verywellmind បានបង្ហាញវិធី ឬរបៀបបដិសេធ ដែលសមស្រប មានហេតុផល និងប្រកបដោយផាសុកភាព និងប្រសិទ្ធភាព។

មូលហេតុអ្វីខ្លះទើបបណ្តាលឱ្យមនុស្សពិបាកក្នុងការបដិសេធអ្នកដទៃ? មានកត្តាជាច្រើន ដែលជំរុញឱ្យមនុស្សមិនហ៊ានបដិសេធន៍ នឹងការស្នើរបស់នរណាម្នាក់។ ដែលហេតុផល ទាំងនោះមានភាពខុសគ្នា ពីមនុស្សម្នាក់ ទៅមនុស្សម្នាក់ ដែលមានដូចជា ៖ ដោយសារតែអ្នកមិនចង់ឱ្យបុគ្គលដែលមកសុំជំនួយមានការអាក់អន់ចិត្ត ។ លោកអ្នកហាក់មិនចង់ឱ្យខ្លួនឯងមានអារម្មណ៍ខុសឆ្គង ឬស្ដាយក្រោយ និងរង្កៀសចិត្ត ខ្លាចខ្លួនឯងក្លាយជាចំណែកដែលនាំឱ្យនរណាម្នាក់មានក្ដីទោមនស្សជាដើម ។ មួយវិញទៀត អ្នកតែងតែគិតថា អ្នកអាចធ្វើវាបាន ឬក៏ពេលខ្លះលោកអ្នក តែងព្យាយាម សម្របខ្លួនជាមួយអ្នកដទៃស្ទើតែគ្រប់ដំណាក់កាល។

តើគួរបដិសេធន៍ក្នុងកាលៈទេសៈណាខ្លះ? លោកអ្នកដឹងទេ កាលដែលស្គាល់ពីរបៀបបដិសេធចំពោះអ្នកដទៃ ជារឿងមួយសំខាន់ណាស់ ដោយសារតែស្ថានភាពរបស់មនុស្សម្នាក់ៗ មានឡើង​ហើយនឹងមានចុះ ទើបយើងខ្លួនឯងមានតួនាទីសំខាន់ក្នុងការដោះស្រាយនិងការពារទាំងចិត្ត កាយ ក៏ដូចជាពេលវេលា ដោយយកចិត្តទុកដាក់។ ប៉ុន្តែបើនិយាយអំពី ថាតើពេលណាគួរតែគិតពីការប្រើជំនាញបដិសេធនោះគឺ កន្លែងការងារ ក្នុងទំនាក់ទំនងដៃគូនិងមិត្តភាព រួមទាំងសមាជិកគ្រួសារផងដែរ។  

តើចំណុចសម្គាល់អ្វីខ្លះ ដែលគួរតែដាច់ចិត្តហ៊ានបដិសេធ? ប្រសិនបើអ្នកពិបាកក្នុងការសម្រេចចិត្តមិនដឹងថាពេលណា ឬរឿងអ្វីដែលគួរឬមិនគួរបដិសេធ ​​​​​​​​​​​​​​​​​​​​នោះ​​​​​​​​​​​​​​​​​​​​​​​​​​អ្នក​​​​​​​អា​​​​​​​​ច​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​កត់ចំណាំតាមរយៈប៉ុន្មានសំណួរដូចជា ៖ តើការនិយាយថាទេ វាឆ្លើយតបនឹងគោលដៅរបស់អ្នកដែរទេ? តើកម្មវិធី ឬក៏ការស្នើសុំនេះ វាមានគុណតម្លៃឱ្យអ្នកចំណាយពេលជាមួយដែរទេ? បើអ្នកនិយាយយល់ព្រម តើវានឹងធ្វើឱ្យអ្នកកាន់តែលំបាកជាងមុនដែរទេ ឬក៏អ្នកអាចនឹងជួបផលពិបាកលើសពីការគ្រប់គ្រងដែរទេ? តើការស្នើសុំជំនួយនោះ វាប៉ះពាល់ដល់កិច្ចការសំខាន់បំផុតរបស់អ្នកដែរទេ? តើការយល់ព្រមនេះ ប៉ះពាល់ដល់សុខុមាលភាពក្នុងការរស់នៅប្រចាំថ្ងៃដែរទេ? ឬក៏ តើការយល់ព្រមតាមសំណើ របស់គេ អាចជំរុញឱ្យអ្នកកាន់តែស្រ្តេស ឬក៏នាំឱ្យលើស​ដែនកំណត់នៃសមត្ថភាពរបស់អ្នកដែរទេ?  ជារួមទៅ លោកអ្នកចាំបាច់គួរតែបដិសេធនៅសកម្មភាព ឬសំណើណាដែលយល់ថា វានាំឱ្យប៉ះពាន់ដល់សុខភាពផ្លូវចិត្ត ឬបង្កើនកម្រិតនៃភាពស្រ្តេសកាន់តែខ្ពស់ជាមុន។

តើបដិសេធបែបណា ទើបផ្លែផ្កានាំទៅរកភាពវិជ្ជមានទាំងទ្វេភាគី? ខណៈដែលការនិយាយថាទេ វាអាចនឹងពិបាកបន្តិច ប៉ុន្តែបើបានដឹងពីរបៀបប្រើប្រាស់ ឬវិធីសាស្រ្ត នោះវានឹងបន្ធូរបន្ថយស្ថានភាពតានតឹងបានខ្លះដែរ ដោយលោកអ្នកគ្រាន់តែប្រាប់ដោយស្មោះត្រង់ថា «សូមអភ័យទោស អ្នកពិតជាមិនអាចធ្វើបាន ឬមិនទាន់ទទួលសំណើបានឥឡូវនេះទេ» ឬក៏ «សូមទុកពេលឱ្យខ្ញុំបានគិតបន្តិចសិន » មួយវិញទៀត លោកអ្នកអាចបញ្ជាក់វិញថា ខ្ញុំមិនអាចធ្វើចំណុចនេះបានទេ ប៉ុន្តែអាចនឹងមានចំណែកផ្សេងទៀតដែលខ្ញុំអាចគាំទ្រទៅកាន់អ្នកបាន។  សូមចាំថា រាល់ការបដិសេធ ត្រូវប្រើប្រាស់ពាក្យគួរសម ច្បាស់លាស់ រួមទាំងភ្ជាប់ជាមួយនឹងការសូមអភ័យទោសផងដែរ៕