ភ្នំពេញ – លោកវេជ្ជបណ្ឌិត យ៉ិល ដារ៉ាវុធ មន្ត្រីជំនាញបច្ចេកទេសនៃអង្គការសុខភាពពិភពលោក មានប្រសាសន៍ថា គ្រឿងស្រវឹងបានធ្វើឱ្យមនុស្សម្នាក់បាត់បង់ជីវិតរៀងរាល់ ១០នាទី។ ប្រសាសន៍​នេះ បាន​ធ្វើ​ឡើង​នៅក្នុងសិក្ខាសាលាពិគ្រោះយោបល់ស្តីពីផលប៉ះពាល់នៃគ្រឿងស្រវឹងទៅលើស្រ្តី កាលពីថ្ងៃទី២៣ ខែធ្នូ ឆ្នាំ២០២២កន្លងទៅ ក្រោមកិច្ចសហការរៀបចំដោយអង្គការគណៈកម្មាធិការសម្របសម្រួលសកម្មភាពសុខភាព(HACC) និងអង្គការចលនាដើម្បីសុខភាពកម្ពុជា។

ជាមួយ​គ្នានេះ តំណាងក្រសួងកចិ្ចការនារី អង្គការជាតិ និងអន្តរជាតិដែលបានចូលរួមសិក្ខាសាលានោះ បានទទួលស្គាល់ថា ការប្រើប្រាស់គ្រឿងស្រវឹង និងការផ្សព្វផ្សាយពាណិជ្ជកម្មគ្រឿងស្រវឹងតាមគ្រប់មធ្យោបាយ បានផលប៉ះពាល់យ៉ាងខ្លាំងទៅលើស្រ្តី រួមទាំងការប៉ះពាល់លើសិទ្ធិរស់នៅដោយគ្មានអំពើហិង្សាជាដើម។

តើគ្រឿងស្រវឹងផ្ដល់ផលប៉ះពាល់អ្វីខ្លះទៅលើស្រ្តី?

ឆ្លើយនឹងសំណួរនេះ វេជ្ជបណ្ឌិត យ៉ិល ដារ៉ាវុធ មានប្រសាសន៍ថា គ្រឿងស្រវឹងផ្ដល់ផលប៉ះពាល់ទៅលើស្រ្តីដូចជា៖

ទី១. ការខូចខាតខួរក្បាល (Brain damage)៖ ស្រ្តីងាយរងការខូចខាតខួរក្បាលដោយសារគ្រឿងស្រវឹងដូចជា បាត់បង់មុខងារផ្លូវចិត្ត និងកាត់បន្ថយទំហំខួរក្បាល។ លើសពីនេះ ការកើនឡើងនៃភស្ដុតាងបង្ហាញថា គ្រឿងស្រវឹងអាចមានភាពខុសប្លែកគ្នានៃឥទ្ធិពលនៃគ្រឿងស្រវឹងលើខួរក្បាលរបស់ក្មេងជំទង់ដែលផឹក។

ទី២. ជំងឺបេះដូង (Heart disease)៖ ស្រ្តីងាយនឹងកើតជំងឺបេះដូងទាក់ទងនឹងការប្រើប្រាស់គ្រឿងស្រវឹងជាងបុរស ទោះបីជាពួកគាត់ផឹកគ្រឿងស្រវឹងតិចជាងបុរសក្នុងមួយជីវិតរបស់ពួកគាត់ក៏ដោយ។

ទី៣. ជំងឺមហារីកសុដន់ (Breast Cancer)៖ មានទំនាក់ទំនងរវាងការផឹកគ្រឿងស្រវឹង និងការវិវត្តទៅជាកើតជំងឺមហារីកសុដន់។ ការសិក្សាបានបង្ហាញថា ស្រ្តីដែលផឹកគ្រឿងស្រវឹងប្រហែល មួយដូស ក្នុងមួយថ្ងៃមានឱកាសកើតជំងឺមហារីកសុដន់ពី ៥ទៅ៩ភាគរយ ខ្ពស់ជាងស្រ្តីដែលមិនផឹកទាល់តែសោះ។ ហានិភ័យនេះ កើនឡើងសម្រាប់រាល់ការផឹកគ្រឿងស្រវឹងបន្ថែមក្នុងមួយថ្ងៃ។

ទី៤. គ្រឿងស្រវឹង និងការមានផ្ទៃពោះ (Alcohol and Pregancy)៖ មិនមានបរិមាណគ្រឿងស្រវឹងណាដែលមានសុវត្ថិភាពសម្រាប់ស្រ្តីមានផ្ទៃពោះ ឬអាចមានផ្ទៃពោះនោះទេ។ ការប៉ះពាល់គ្រឿងស្រវឹងមុនពេលសម្រាលអាចបណ្ដាលឱ្យកុមារជួបប្រទះបញ្ហាផ្លូវកាយ ការយល់ដឹង និងអាកប្បកិរិយា ដែលអាចបង្កឱ្យមានភាពមិនប្រក្រតីនៃវិសាលគមជាតិអាល់កុលរបស់ទារក (fetal alcohol spectrum disorders)។ ការផឹកគ្រឿងស្រវឹងក្នុងអំឡុងពេលមានផ្ទៃពោះក៏អាចបង្កើនហានិភ័យនៃការសម្រាលកូនមិនគ្រប់ខែផងដែរ។

វេជ្ជបណ្ឌិត យ៉ិល ដារ៉ាវុធ បញ្ជាក់បន្ថែមថា ប្រៀបធៀបស្រ្តីដែលមិនផឹកគ្រឿងស្រវឹង និងស្រ្តីដែលផឹកក្នុងកម្រិតមធ្យម ច្រើនក៏មានហានិភ័យកើនឡើងដែរ រួមមាន ជំងឺពុកឆ្អឹង (ការស្ដើងនៃឆ្អឹង) ការដួលនិងការបាក់ឆ្អឹងត្រគាក ឆាប់អស់រដូវមុនអាយុ ភាពគ្មានកូន និងការរលូតកូន និងកើតជំងឺលើសសម្ពាធឈាមនិងជំងឺបេះដូង។

គួរបញ្ជាក់ថា បើតាមអង្គការសុខភាពពិភពលោក វិធានការមានប្រសិទ្ធភាពក្នុងការកាត់បន្ថយ ការប្រើប្រាស់គ្រឿងស្រវឹង គឺវិធានការពន្ធកំណត់ជាក់លាក់ទៅលើគ្រឿងស្រវឹងដែលបង្កើនតម្លៃពិតប្រាកដនៃគ្រឿងស្រវឹង ជាទូទៅគឺជាយុទ្ធសាស្រ្តមួយប្រកបដោយប្រសិទ្ធភាព ក្នុងការកាត់បន្ថយការប្រើប្រាស់ដែលបង្កការបំផ្លិចបំផ្លាញ និងគ្រោះថ្នាក់ពាក់ព័ន្ធក្នុងចំណោមយុវជនវ័យក្មេងនិងមនុស្សពេញវ័យ៕