បច្ចុប្បន្ន បច្ចេកវិទ្យាកំពុងមានការរីកចម្រើន ដែលទាមទារឱ្យមនុស្សសម្របខ្លួនទៅនឹងជំនាញថ្មីៗ ដើម្បីជំនួសឱ្យតួនាទីចាស់ដែលមិនសូវសំខាន់។ ដូច្នេះ អ្នក​ជំនាញ​កំពុង​តែ​ផ្តល់​អាទិភាព​ដល់​ការ​សិក្សា​ពេញ​មួយ​ជីវិត ក្នុងការបើកទ្វារថ្មី និងផ្តល់ឱ្យមនុស្សនូវជំនាញដែលពួកគេត្រូវការដើម្បីរីកចម្រើនក្នុងវិស័យដែលខ្លួនកំពុងបំពេញការងារ។

តើការសិក្សាពេញមួយជីវិតគឺជាអ្វី?

ការសិក្សាពេញមួយជីវិត គឺជាការបន្តការសិក្សាលើសពីតម្រូវការរបស់សាលារៀន ឬការបណ្តុះបណ្តាលសាជីវកម្ម។ “អ្នកសិក្សាពេញមួយជីវិត” គឺជាបុគ្គលដែលមិនឈប់ក្នុងការជំនាញ និងពង្រីកចំណេះដឹងរបស់ខ្លួន។ លើសពីនេះ ចាប់អារម្មណ៍បន្តអភិវឌ្ឍខ្លួន ឬវិជ្ជាជីវៈ ដូចជា មានចំណង់ចំណូលចិត្តសិក្សាមុខវិជ្ជាមួយ រៀនភាសាមួយ ចូលរៀនមុខវិជ្ជាបណ្ដុះបណ្ដាលវិជ្ជាជីវៈ លេងកីឡាមួយ ឬចូលរួមក្លឹបសិក្សា ។ល។

ហេតុអ្វីមនុស្សត្រូវបន្តការសិក្សាពេញមួយជីវិត? តើការសិក្សាពេញមួយជីវិតផ្ដល់អត្ថប្រយោជន៍អ្វីខ្លះ?

ការរៀនសូត្រពេញមួយជីវិតអាចជួយយើងស្វែងរកគោលបំណងជីវិត និងធ្វើការសម្រេចចិត្តប្រកបដោយការយល់ដឹង។ សមត្ថភាពក្នុងការរៀនអ្វីថ្មី និងសម្របខ្លួនទៅនឹងការផ្លាស់ប្តូរ គឺជាជំនាញដ៏សំខាន់សម្រាប់ភាពជោគជ័យនាសតវត្សទី២១នេះ។

១. សុវត្ថិភាពការងារ ៖ នៅពេលដែលឧស្សាហកម្មបន្តវិវត្ត បុគ្គលិកជាច្រើនមានអារម្មណ៍ថាមានសម្ពាធក្នុងការបន្តទៅមុខ។ ការប្រកួតប្រជែងសម្រាប់ការងារអាចមានច្រើន ហើយតែងតែមានបុគ្គលិកថ្មីចូលមកបំពេញការងារទាក់ទងនឹងជំនាញថ្មីៗ។ យោងតាមការស្ទង់មតិពីមជ្ឈមណ្ឌលស្រាវជ្រាវ Pew ៨៧ភាគរយ នៃកម្មករគិតថា វាមានសារៈសំខាន់ក្នុងការស្វែងរកការបណ្តុះបណ្តាល និងអភិវឌ្ឍជំនាញថ្មីៗពេញមួយអាជីពរបស់ពួកគេ។

ការសិក្សាពេញមួយជីវិត អនុញ្ញាតឱ្យអ្នកពង្រឹងជំនាញ ដូច្នេះអ្នកអាចក្លាយធនធានដ៏មានតម្លៃសម្រាប់ឧស្សាហកម្មរបស់អ្នកនៅឆ្នាំខាងមុខ។ លើសពីនេះទៀត តាមរយៈការអភិវឌ្ឍសមត្ថភាពវិជ្ជាជីវៈ អ្នកអាចបង្ហាញពីការប្តេជ្ញាចិត្តរបស់អ្នកចំពោះឧស្សាហកម្ម និងអាជីពរបស់អ្នក ដើម្បីទទួលបានការជឿទុកចិត្ត និងការគោរពពីនិយោជកណាមួយ។

២. ជម្រើសអាជីព ៖ ការសិក្សាពេញមួយជីវិត មិនមែនគ្រាន់តែរក្សាការងារចាស់របស់អ្នកនោះទេ។ វាក៏អាចបើកទ្វារទៅរកតួនាទីថ្មី ឬសូម្បីតែអាជីពថ្មី។ ឧទាហរណ៍ ប្រសិនបើការងារបច្ចុប្បន្នរបស់អ្នកមិនទាន់រីកចម្រើន អ្នកអាចពិចារណាទទួលយកវគ្គសិក្សាតាមអ៊ីនធឺណិតដែលផ្តល់វិញ្ញាបណ្ណប័ត្រដ៏មានតម្លៃនៅក្នុងវិស័យដែលអ្នកពេញចិត្ត។ ក្នុងករណីខ្លះ អាចធ្វើឱ្យការផ្លាស់ប្តូរអាជីពដោយមិនចាំបាច់ត្រឡប់ទៅសាលារៀនវិញទេ។

៣. ការលើកទឹកចិត្តជាថ្មី ៖ បុគ្គលិក​ជា​ច្រើន​យល់​ថា​ខ្លួន​បាត់​បង់​ចំណាប់​អារម្មណ៍​លើ​អាជីព​របស់​ពួក​គេ​តាម​ពេល​វេលា។ ការងារ​ក្លាយ​ជា​ទម្លាប់ ដោយ​មិនចង់​បំពេញ​កិច្ចការ​ដែល​ធុញ​ទ្រាន់​ដដែល​ពី​មួយ​ថ្ងៃ​ទៅ​មួយ​ថ្ងៃ។ ជាសំណាងល្អ ការរៀនសូត្រពេញមួយជីវិត អាចជួយឱ្យចំណង់ចំណូលចិត្តរបស់អ្នកប្រសើរឡើងវិញបាន។ ការអភិវឌ្ឍជំនាញថ្មី អាចជាអាថ៌កំបាំងក្នុងការស្វែងរកឡើងវិញនូវអ្វីដែលទាក់ទាញអ្នកឱ្យមករកអាជីពដែលអ្នកពេញចិត្ត។

៤. ភាពខ្លាំងផ្នែកជំនាញទន់ ៖ ការអប់រំសម្រាប់មនុស្សពេញវ័យមានប្រយោជន៍ច្រើនជាងអ្វីដែលបានបង្រៀនអ្នកទៅទៀត។ សកម្មភាពនៃការរៀនអ្វីថ្មីៗជួយពង្រឹងជំនាញទន់សំខាន់ៗដូចជា ការកំណត់គោលដៅ, វិន័យខ្លួនឯង, ការច្នៃប្រឌិត, ការត្រិះរិះពិចារណា, ការគ្រប់គ្រងពេលវេលា, ការដោះស្រាយបញ្ហា និងការពង្រឹងចរិតលក្ខណៈដែលជាការឈានទៅដល់គោលដៅផ្ទាល់ខ្លួន និងវិជ្ជាជីវៈ។

៥. ការយល់ដឹងសុខភាពកាន់តែប្រសើរ ៖ ការ​សិក្សា​បាន​បង្ហាញ​ថា ការ​សិក្សា​ពេញ​មួយ​ជីវិត​ជួយ​ពង្រឹង​សុខភាព និង​មុខងារ​របស់​ខួរក្បាល។ អត្ថប្រយោជន៍ផ្លូវចិត្តនៃការរៀនអាចរួមមាន ផ្ដោតការយកចិត្តទុកដាក់បានល្អ, ការចងចាំកាន់តែខ្លាំង, ភាពសមហេតុផល, កាត់បន្ថយហានិភ័យនៃជំងឺវង្វេង។

៦. ទំនុកចិត្ត ៖ ការកែលម្អខ្លួនឯង គឺជាគន្លឹះក្នុងការកសាងទំនុកចិត្ត។ តាមរយៈការចេះស្ទាត់ជំនាញថ្មី អ្នកអាចបញ្ចេញសក្តានុពលដែលកប់ទុកយ៉ាងជ្រៅ និងបង្កើនការគោរពខ្លួនឯង។ ហើយនៅពេលដែលអ្នកប្រើជំនាញទាំងនោះដើម្បីជំរុញអាជីពរបស់អ្នក អារម្មណ៍នៃគោលបំណងរបស់អ្នកនឹងរីកចម្រើន។

៧. ឱកាសបង្កើតបណ្តាញថ្មីៗ ៖ ជម្រើសជាច្រើនសម្រាប់ការសិក្សាពេញមួយជីវិត ពាក់ព័ន្ធនឹងការធ្វើការយ៉ាងជិតស្និទ្ធជាមួយគ្រូបង្វឹក និងអ្នកសិក្សាផ្សេងទៀត។ នេះអនុញ្ញាតឱ្យអ្នកភ្ជាប់ជាមួយអ្នកជំនាញដែលមានគំនិតដូចគ្នា និងពង្រីកបណ្តាញផ្ទាល់ខ្លួន។

គួរជម្រាបជូនថា ការរៀនសូត្រពេញមួយជីវិតមានសារៈសំខាន់ចំពោះការអភិវឌ្ឍន៍ផ្ទាល់ខ្លួន និងវិជ្ជាជីវៈក្នុងសតវត្សទី២១ ។ វាផ្តល់នូវអត្ថប្រយោជន៍ជាច្រើន ចាប់ពីការលូតលាស់ផ្ទាល់ខ្លួន ដល់ការកែលម្អមុខងារ នៃការយល់ដឹង និងការរំពឹងទុកក្នុងអាជីព។ ទន្ទឹមគ្នានេះ ការទទួលយកការសិក្សាពេញមួយជីវិតតម្រូវឱ្យមានឆន្ទៈក្នុងការចង់ដឹង ចង់ឃើញ កំណត់គោលដៅ បង្កើតពេលវេលា ប្រើប្រាស់បច្ចេកវិទ្យា ស្វែងរកអ្នកណែនាំ និងអ្នកជំនាញ។ ជាពិសេស សម្រាប់ការប្តេជ្ញាចិត្តក្នុងការរៀនសូត្រពេញមួយជីវិត អនុញ្ញាតឱ្យយើងសម្របខ្លួនទៅនឹងការផ្លាស់ប្តូរ រក្សាការប្រកួតប្រជែង និងរួមចំណែកធ្វើឱ្យពិភពលោកប្រសើរជាងមុន៕