ការបំបែកទម្លាប់មិនល្អចេញពីការរស់នៅប្រចាំថ្ងៃ មានច្រើនប្រភេទ មានទាំងភាពសាមញ្ញផង និងភាពស្មុគស្មាញផង ដែលជាហេតុបង្កើតជាចំណោទបញ្ហាថា តើគួរចាប់ផ្តើមពីទម្លាប់អ្វី ឬសកម្មភាពអ្វីខ្លះ ដើម្បីឱ្យការចាប់ផ្តើមទាំងនោះមានប្រសិទ្ធភាព និងឆ្លើយតបទៅនឹងការរំពឹងទុក។ តាមរយៈគេហទំព័រ Lifestyle News បានបង្ហាញគន្លឹះមួយចំនួនដើម្បីរួមចំណែកបំបែកទម្លាប់ ដែលមិនល្អចេញពីបែបបទនៃការរស់នៅប្រចាំថ្ងៃ។

១. សរសេរគោលដៅចេញមកក្រៅ ៖ ក្នុងការសម្រេចគោលដៅឱ្យបានលឿន ការសរសេរគោលដៅចុះមកក្រៅ គឺជាចំណែកសំខាន់មួយ ព្រោះកាលដែលធ្វើបែបនេះបាន វាពុំមែនគ្រាន់តែជាទ្រឹះស្ដី ប៉ុណ្ណោះទេ! ប៉ុន្តែគឺជាភាពជាក់ស្តែងមួយដែលមនុស្សជាច្រើនបានទទួលលទ្ធផលពីការធ្វើសកម្មភាពផែនការ និងគោលដៅ មុនចាប់ផ្តើមធ្វើអ្វីមួយ ជាពិសេសនោះគឺការប្តេជ្ញាចិត្តកាត់ចោលនូវទម្លាប់ដែលមិនល្អចោល។ ក្នុងគោលដៅនៃការកែប្រែទៀតសោត ត្រូវការស្វែងរកចម្លើយឱ្យឃើញអំពីបុព្វហេតុ នៃការផ្លាស់ប្តូរ និងវិធីសាស្រ្តនៃការកែប្រែព្រមជាមួយគ្នាដែរ។

២. រៀនអំពីចំណុចមិនល្អ ៖ ការសិក្សាអំពីកត្តាដែលនាំឱ្យកើតមានចំណុចមិនល្អ តួយ៉ាងដូចជា ដាក់សំណួរមកកាន់ខ្លួនឯងថា តើទម្លាប់មិនល្អទាំងនោះកើតមានដោយសារអ្វី? ភាពអវិជ្ជមានកន្លងមកបណ្តាលមកពីអ្វីខ្លះ? រួមទាំងកត្តាដែលនាំឱ្យផ្លូវចិត្តមិនល្អ មិនថាបញ្ហាស្រ្តេស ដោយធ្វើយ៉ាងណារកឱ្យឃើញថា តើវាបណ្តាលមកពីបរិយាកាសជុំវិញ ឬក៏បណ្តាលមកពីខ្លួនឯងផ្ទាល់។ ការសិក្សាស៊ីជម្រៅអំពីទម្លាប់មិនល្អនីមួយៗ របស់ខ្លួន គឺជាដើមហេតុនាំឱ្យមានភាពងាយស្រួលក្នុងការចាត់ការ ឬរកវិធីសាស្រ្តដោះស្រាយ។

៣. ផ្តោតអំពីដើមហេតុ ៖ ហេតុអ្វីបានជាចង់កែប្រែ? នេះគឺជាសំណួរមួយដែលមានភាពសាមញ្ញ ប៉ុន្តែបើនិយាយអំពីប្រសិទ្ធភាពវិញហាក់មិនសាមញ្ញពេកទេ។ ឧទាហរណ៍ការចង់មានទម្លាប់ល្អ ពាក់ព័ន្ធនឹងសុខភាពរាងកាយ ដូច្នេះត្រូវវិភាគមើល៍លេងៗថា តើនៅពេលសុខភាពរាងកាយល្អរឹងមាំ តើនឹងផ្តល់ផលចំណេញអ្វីខ្លះមកកាន់ខ្លួនឯង? ជាចម្លើយនោះគឺ មានពេលកម្សាន្ត អាចសន្សំថវិកា និងមានថាមពលគ្រប់ក្នុងការបំពេញភារកិច្ចនានាដទៃទៀត។

៤. រក្សាភាពស្ងប់នៅក្នុងចិត្ត ៖ ដើម្បីឱ្យផ្លូវចិត្តទទួលបាននូវសុខភាពល្អ គេពុំដែលមើលរំលងអំពីការអនុវត្ត រាល់សកម្មភាព​ដែលនាំឱ្យចិត្តស្ងប់នោះទេ ដែលមានដូចជា ការសមាធិ ការហាត់យូហ្គា និងការដាក់ខ្លួននៅទីតាំងដែលមានធម្មជាតិជាដើម។ កាលដែលសុខភាពផ្លូវចិត្តមានភាពល្អប្រសើរ វាពង្រឹងបាននូវសេចក្ដីពេញចិត្តចំពោះខ្លួនឯង និងការគិតដែលមានភាពវិជ្ជមាន។ កត្តានេះបានរួមចំណែកធ្វើឱ្យខ្លួនមានភាពជឿជាក់ក្នុងការផ្លាស់ប្តូរអ្វីមួយ ជាពិសេសទម្លាប់ដែលមិនផ្តល់នូវភាពរីកចម្រើន៕