ក្នុងមួយ​ថ្ងៃនៅ​តាម​មន្ទីរពេទ្យ​ទូទាំ​ងប្រទេស​កម្ពុជា មាន​តម្រូវការឈាម​សរុប​ប្រមាណ១៤ម៉ឺន​ប្លោក ដើម្បីជួយសង្រ្គោះជីវិតមនុស្សដែលត្រូវការឈាម។ នេះ​បើតាម​ប្រសាសន៍លើកឡើងរបស់លោកវេជ្ជបណ្ឌិត សុខ ប៉ូ ប្រធាន​មជ្ឈមណ្ឌលជាតិផ្តល់ឈាម ក្នុងកម្មវិធីបរិច្ចាគឈាម ក្រោម​ប្រធានបទ «រួមគ្នា សង្គ្រោះជីវិត» រៀបចំឡើងដោយសហភាពសហព័ន្ធយុវជនកម្ពុជារាជធានីភ្នំពេញ សហការជាមួយសមាគមមីក្រូហិរញ្ញវត្ថុកម្ពុជា សមាគមធនាគារកម្ពុជា ធនាគារជាតិនៃកម្ពុជា និងមជ្ឈមណ្ឌលជាតិផ្ដល់ឈាម នាថ្ងៃទី១៦ កក្កដា។

បើតាម​ប្រសាសន៍របស់លោកវេជ្ជបណ្ឌិត សុខ ប៉ូ យើងត្រូវការឈាមមួយប្លោកនៅ​រៀងរាល់៥នាទីម្តង ដើម្បីជួយសង្គ្រោះជីវិតអ្នកជំងឺ ដូច្នេះ​តម្រូវការឈាមប្រចាំថ្ងៃ គឺមានសរុបប្រមាណពី៣០០ ទៅ៣៥០ប្លោកក្នុងមួយថ្ងៃ​សម្រាប់រាជធានីភ្នំពេញ។

ប្រធានមជ្ឈមណ្ឌលជាតិផ្ដល់ឈាម ក៏​បាន​ឱ្យដឹងដែរថា ក្នុង​តម្រូវការឈាមទូទាំងប្រទេសដែល​មានប្រមាណ១៤ម៉ឺនប្លោកក្នុងមួយថ្ងៃ គឺមជ្ឈមណ្ឌលជាតិផ្ដល់ឈាមបានធានាការផ្គត់ផ្គង់ប្រមាណ៧៥% នៃតម្រូវការឈាម ខណៈការទទួលអំណោយឈាមតាមរយៈសប្បុរសជនដោយស្ម័គ្រចិត្ត និងមិនទទួលកម្រៃ គឺឆ្លើយតបបានតែ ១៩.៥% ប៉ុណ្ណោះ។ ចំនួននេះ គឺនៅ​តិចតួចនៅឡើយ​បើធៀបជាមួយប្រទេសជិតខាងកម្ពុជា ដែលការបរិច្ចាគឈាមដោយស្ម័គ្រចិត្ត គេអាចផ្គត់ផ្គង់រហូតដល់លើសពី៩០%នៃតម្រូវការ, នេះបើយោងតាមទិន្នន័យរបស់អង្គការសុខភាពពិភពលោក។

បើតាមលោកវេជ្ជបណ្ឌិត សុខ ប៉ូ ការបរិច្ចាគឈាមមិនត្រឹមតែមិនប៉ះពាល់ដល់សុខភាពប៉ុណ្ណោះទេ ថែមទាំងមានអត្ថប្រយោជន៏ជាច្រើនទៀត។ ក្នុងនោះការបរិច្ចាគឈាមម្តង យើងទទួលបានការពិនិត្យពិគ្រោះសុខភាពម្ដងដើម្បីឱ្យយើងបានដឹងពីស្ថានភាពជំងឺឆ្លងផ្សេងៗដូចជា ជំងឺថ្លើមប្រភេទ បេ សេ ស្វាយ អេដស៍ ។ល។ ហើយក្រុមការងារនៃមជ្ឈមណ្ឌលជាតិផ្ដល់ឈាម នឹងរក្សាការសម្ងាត់ជូន។

ម៉្យាងវិញទៀត ការបរិច្ចាគឈាមជួយកាត់បន្ថយផងដែរនូវហានិភ័យនៃជំងឺមហារីកនានា, កាត់បន្ថយកំហាប់ឈាម និងការលើសជាតិដែក ដែលធ្វើឱ្យមានផលប៉ះពាល់ដល់ថ្លើមនិងលំពែង, ជួយធ្វើឱ្យប្រសើរឡើងនូវសុខភាពបេះដូង បន្ថយការឡើងទម្ងន់ ជំងឺដាច់សរសៃឈាមក្នុងខួរក្បាល, ហើយ​អ្នកនឹងមានភាពសប្បាយរីករាយ នៅពេលអ្នកអាចក្លាយជាជំនួយការខានមិនបានម្នាក់សម្រាប់វេជ្ជបណ្ឌិតក្នុងការសង្គ្រោះជីវិតអ្នកជំងឺ។

“សូមចងចាំថាកិច្ចបរិច្ចាគឈាមមិនប៉ះពាល់ដល់សុខភាពទេ ហើយឈាមមានប្រភពតែមួយគត់គឺពីមនុស្ស មិនមានរោងចក្រឱសថណាផលិតបានទេ”

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម

ជាមួយគ្នានេះ ប្រធានមជ្ឈមណ្ឌលជាតិផ្ដល់ឈាម ក៏បានលើកឡើងដែរថា ការបរិច្ចាគឈាម គឺជាការចូលរួមជួយគ្នាក្នុងសង្គមជាតិ ជាកាតព្វកិច្ចរបស់ពលរដ្ឋល្អដែលចង់ឃើញសង្គមជាតិមួយមានសុជីវធម៌ល្អ គុណធម៌ល្អ និងវប្បធម៌ល្អ ហើយនេះគឺជាការឆ្លើយតបយ៉ាងត្រឹមត្រូវទៅនឹងទិសស្លោក «យុវជនយុវនារីដើម្បីបុព្វហេតុជាតិ និងមាតុភូមិ» «ខ្មែរជួយខ្មែរ» «ខ្មែរធ្វើបាន» ដែលជាភាសាបេះដូងមួយសម្រាប់យុវជនកម្ពុជាយើង។ «សូមកុំរង់ចាំដល់វេលាមួយនៅពេលដែលយើងចង់ជួយគ្នា បែរជាហួសពេលនិងមិនអាចធ្វើបាន»៕