តាមការព្យាករណ៍ ដោយផ្អែក​តាមលទ្ធផលជំរឿនទូទៅ នៃប្រជាជនឆ្នាំ​២០១៩ បានបង្ហាញថា នៅឆ្នាំ​២០៥០ កម្ពុជាមានចំនួន​ប្រជាជនដែលមានវ័យចំណាស់ចាប់ផ្តើម​កើន​ ដែលអាច​នឹងធ្វើ​ឱ្យ​មានបញ្ហា​កង្វះកម្លាំង​ពលកម្ម​នៅក្រោយឆ្នាំ២០៥០។ សម្រាប់សម្តេចធិបតី ហ៊ុន ម៉ាណែត នាយករដ្ឋមន្រ្តី បញ្ហា​កង្វះ​កម្លាំងពលកម្ម​នៅក្រោយ​ឆ្នាំ​២០៥០ មិន​ជាបញ្ហាចោទនោះទេ ប៉ុន្តែអ្វីដែលត្រូវយកចិត្តទុកដាក់ គឺ​ការ​ពង្រឹង​សមត្ថភាពជំនាញ​ដល់យុវជន ដើម្បី​ទាញយកផលប្រយោជន៍​ពី​ភាគលាភប្រជាសាស្រ្ត និង​ភាគលាភ​យ៉េនឌ័រ ឱ្យបានជាអតិប្បរមា ដូចមានបែងចែក​នៅក្នុងយុទ្ធសាស្រ្ត​បញ្ចកោណដំណាក់កាលទី១។

ក្នុង​ឱកាស​អញ្ជើញ​ជាអធិបតីពិធីបិទស្និបាតបូកសរុបលទ្ធផល​ការងារ​ឆ្នាំ​២០២៣ និង​លើក​ទិសដៅ​អនុវត្តការងារឆ្នាំ​២០២៤ របស់ក្រសួងផែនការ នាព្រឹកថ្ងៃទី៩ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្រ្តី​បានគូស​បញ្ជាក់ថា នៅឆ្នាំ២០៥០ កម្ពុជាមានចំនួនប្រជាជននៅក្រោម១៥ឆ្នាំ ប្រហែលជា ១៥,៥ភាគរយ ប្រជាជនអាយុ១៥ ទៅ៦៤ឆ្នាំ មានប្រមាណ ៦៧,៥ភាគរយ និងចំនួនប្រជាជន​ដែលមានអាយុ​៦៥ឆ្នាំឡើង មាន ១៧,១ភាគរយ ។ នៅក្នុងន័យនេះ បានន័យថា នៅឆ្នាំ​២០៥០ កម្ពុជានៅមានប្រជាជនក្នុងវ័យធ្វើការច្រើន ប៉ុន្តែប្រជាជន​ដែលមានវ័យចាស់ ចាប់ផ្តើម​មានចំនួនច្រើនជាងក្មេងៗជាបណ្តើរៗ ។ ផលធៀបនៅក្នុងបន្ទុកសេដ្ឋកិច្ច បង្ហាញថា កម្ពុជាមានបន្ទុកសេដ្ឋកិច្ចស្រាល ដូច្នេះសម្តេចអាចនិយាយបានថា បញ្ហាកង្វះពលកម្មនៅក្រោយឆ្នាំ២០៥០ នៅមិនជាបញ្ហាចោទធំប៉ុន្មានទេ ប៉ុន្តែអ្វីដែលត្រូវយកចិត្តទុកដាក់ គឺក្នុងនោះការពង្រឹងសមត្ថភាពជំនាញដល់យុវជន។

ទោះជាយ៉ាងនេះក្តី សម្តេចធិបតី ក៏លើកទឹកចិត្ត​ដល់ទឹកចិត្តដល់គូស្វាមីភរិយាដែលមានលទ្ធភាពសេដ្ឋកិច្ច គួរ​មានកូនច្រើនលើសពីចំនួនកំណត់ ដើម្បីជៀសវាងនូវហានិភ័យកង្វះកម្លាំងពលកម្ម។

ទោះជាការព្យាករណ៍ផ្អែកទៅលើទិន្នន័យ នៃការជំរឿននេះ គិតថា យើងមិន​ទាន់មានជាបញ្ហាចោទនៅឆ្នាំ២០៥០ ប៉ុន្តែយើងឃើញសញ្ញានៃការថយចុះគម្លាតរវាងអ្នកដែលមានអាយុចាស់លើសកម្លាំង ចាប់ផ្តើមកើន…

សម្តេចធិបតី ហ៊ុន ម៉ាណែត នាយករដ្ឋមន្រ្តី

បើតាម​ប្រសាសន៍របស់សម្តេចនាយករដ្ឋមន្រ្តី ការ​មាន​កូន​នាពេលបច្ចុប្បន្ន​គឺងាយស្រួល​ជាង​នៅ​ឆ្នាំ​២០៥០ ខណៈដែលនៅឆ្នាំ​២០៥០ តម្លៃនៃការចិញ្ចឹមកូនគឺខុសពីពេលបច្ចុប្បន្ន រួមទាំងផ្នត់គំនិត​របស់ប្រជាជនផងដែរ៕