ដើម្បីឱ្យមានសិរីសួស្ដី មានថ្ងៃមង្គលសម្រាប់ខ្លួនឯង និងគ្រួសារក្នុងថ្ងៃបុណ្យចូលឆ្នាំខ្មែរបាន បុគ្គលគ្រប់រូបគួរតែដឹងអំពីរបៀបនៃការធ្វើខ្លួន និងអនុវត្តន៍ឱ្យបានល្អនៅមុនថ្ងៃ និងអំឡុងថ្ងៃបុណ្យចូលឆ្នាំខ្មែរ។ នេះជាប្រសាសន៍លើកឡើងរបស់ ឯកឧត្តម ឆាត សុឆេត អ្នកនាំពាក្យ និង​ជាមន្រ្តីជាន់ខ្ពស់​ក្រសួងធម្មការ និង​សាសនា។

ឯកឧត្ដម ឆាត សុឆេត លើកឡើងថា ទម្លាប់ដែលប្រជាពលរដ្ឋខ្មែរគួរតែមានមុនថ្ងៃ និងថ្ងៃមហាសង្ក្រាន្តមកដល់ ដំបូងគឺត្រូវកសាងខ្លួនឯងឱ្យមានសិរីខ្លួនឯងនៅពេលព្រឹក ទី២ការកសាងសិរីខ្លួនឯងនៅពេលថ្ងៃ និងទី៣ការកសាងខ្លួនឯងឱ្យមានសិរីខ្លួនឯងនៅពេលយប់។ ឯកឧត្ដមបន្តថា មិនត្រឹមតែការធ្វើឱ្យខ្លួនឯងមានសិរីប៉ុណ្ណោះទេ ប្រជាពលរដ្ឋខ្មែរតាំងពីដូនតាមកមានជាគំរូឱ្យមានសិរីជាច្រើនទៅកាន់យុវជនជំនាន់ក្រោយ ជាពិសេសអ្នកបន្តវេនដូចជា កូនប្រុសស្រីគ្រប់រូបទាំងអស់ត្រូវគោរពប្រត្តិបត្តិឪពុកម្ដាយ ជីដូនជីតា ចាស់ព្រឹទ្ធាចារ្យ និងគោរពរាមច្បង។

អ្នកនាំពាក្យរូបនេះបន្តថា ចំណុចជាពិសេសដែលបងប្អូនប្រជាពលរដ្ឋត្រូវធ្វើមុនថ្ងៃមហាសង្ក្រាន្តមកដល់គឺ ទី១ កុំខឹងក្រោធច្រើន ត្រូវចេះអាធ្យាស្រ័យគ្នានឹងគ្នា ផ្ដល់មេត្តាឱ្យគ្នាទៅវិញទៅមក ជាពិសេសគឺការធ្វើដំណើរបើកបរប្រកបដោយក្រមសីលធម៌ និងប្រុងប្រយ័ត្ន រឿងបន្តិចបន្តួចគួរមានការអាធ្យាស្រ័យគ្នាទៅវិញទៅមក ហើយនេះជាសិរីសួស្ដីមួយផ្នែក។ សិរីសួស្ដីមួយផ្នែកទៀត គឺគួរតែកុំលេងប៉ាតម្សៅ និងការលេងជះទឹកដែលមានភាពហួសហេតុព្រោះអាចធ្វើឱ្យមានបញ្ហាដល់អ្នកធ្វើដំណើរដោយម៉ូតូដូចជា មានការរអិលកង់ម៉ូតូដោយប្រការណាមួយ ឬដួលដែលបង្កជារបួស ស្លាកស្នាមណាមួយបង្កជាគ្រោះថ្នាក់មើលមិនឃើញផ្សេងៗជាដើម។

«មួយរយៈក្រោយនេះឃើញមានការលេងជះទឹក និងប៉ាតម្សៅរបស់យុវជនមួយចំនួនបង្ហាញអាកប្បកិរិយាមិនគួរឱ្យកើតមានឡើងដូចជា ការបន្លំថើប បន្លំឱប ឬកាយវិការមិនសមម្យផ្សេងទៀតដែលមិនគួរឱ្យកើតមានឡើងនៅក្នុងស្រុកទេសយើងទេ»

ឯកឧត្ដម ឆាត សុឆេត អ្នកនាំពាក្យក្រសួងធម្មការ និងសាសនា

ផ្នែកសំខាន់មួយទៀតដែលធ្វើឱ្យមានសិរីសួស្ដីនោះ គឺ កូនគ្រប់រូបគួរតែធ្វើបាយសម្លជូនឪពុកម្ដាយ និងអ្នកមានគុណ ឬទេយ្យទានចំពោះព្រះសង្ឃ ស្រង់ទឹកព្រះ ស្រង់ទឹកជូនព្រះសង្ឃ និងងូតទឹកជូនឪពុកម្ដាយ ឬអ្នកមានគុណ និងបង្កើនបរិយាកាសរីករាយក្នុងផ្ទះប្រកបទៅដោយការជួបជុំគ្នា ការចែករំលែកក្ដីស្រលាញ់ឱ្យគ្នាទៅមក ទាំងនេះហើយជាសេចក្ដីសុខដែលយើងត្រូវធ្វើ។

ជាមួយគ្នានេះឯកឧត្ដម ឆាត សុឆេត អ្នកនាំពាក្យក្រសួងធម្មការ និងសាសនាក៏បានស្នើ​សុំដល់បងប្អូនប្រជាពលរដ្ឋទាំងអស់ គួរស្វែងយល់ និងអនុវត្តន៍ឱ្យបានខ្ជាប់ខ្ជួននូវចំណុចខាងលើ ជាពិសេសការកាត់បន្ថយការប្រើប្រាស់គ្រឿងស្រវឹង ការបើកបរក្នុងល្បឿនសមរម្យ និងជៀសឱ្យផុតពីគ្រឿងញៀន៕