ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជាការបញ្ជាក់ដើម្បីកុំឱ្យមានការយល់ច្រឡំពីប្រជាពលរដ្ឋដែលថា មានការបិទសាលារៀនជំនាន់ថ្មីនោះ នៅរសៀលថ្ងៃម្សិលមិញនេះ ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់ក្រសួងទេសចរណ៍ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានបញ្ជាក់យ៉ាងច្បាស់ថា ចំពោះសាលារៀនជំនាន់ថ្មី ដែលកំពុងដំណើរការចំនួន១៣សាលា គឺមិនមានការបិទនោះទេ ហើយរាជរដ្ឋាភិបាលនឹងពិនិត្យលទ្ធភាពដើម្បីពង្រីកបន្ថែមទៀត, ប៉ុន្តែសាលាដែលសម្តេចបានប្រកាសផ្អាកឈប់ឱ្យមានការរៀបចំបន្ថែម គឺមជ្ឈមណ្ឌលសិក្សាទំនើប។
សម្តេចនាយករដ្ឋមន្រ្តីបានបញ្ជាក់ថា សាលារៀនជំនាន់ថ្មី និងមជ្ឈមណ្ឌលសិក្សាទំនើប គឺជាសាលាពីរខុសគ្នា ដោយសាលារៀនជំនាន់ថ្មី គឺជាសាលាដែលរដ្ឋគ្រប់គ្រង ទាំងនាយកសាលា ទាំងគ្រូបង្រៀន ទាំងកម្មវិធីសិក្សាផ្សេងៗ ប៉ុន្តែមជ្ឈមណ្ឌលសិក្សាទំនើប ត្បិតស្រដៀងនឹងសាលារៀនជំនាន់ថ្មី ប៉ុន្តែជារូបមន្ត BOT ជាមួយក្រុមហ៊ុនឯកជន ធ្វើការវិនិយោគរយៈពេល១៥ឆ្នាំនៅក្នុងសាលារដ្ឋ។
សម្តេចពន្យល់ថា ការប្រកាសឱ្យផ្អាកមិនឱ្យមានបន្ថែមមជ្ឈមណ្ឌលសិក្សាទំនើប ក៏ព្រោះតែរូបមន្តនេះមិនអាចទទួលយកបាន ដោយសារ ទី១ ការជួលអគាររបស់ក្រុមហ៊ុនឯកជននៅក្នុងសាលារដ្ឋ គឺធ្វើឱ្យរដ្ឋបាត់ភាពម្ចាស់ការ, ទី២ មជ្ឈមណ្ឌលនេះមានស្តង់ដារអប់រំពីរ ពោលគឺសិស្សនៅក្នុងសាលាតែមួយ រវាងសិស្សដែលបង់លុយបានចូលរៀនកុំព្យូទ័រ ហើយសិស្សមិនបានបង់លុយត្រូវនៅមួយផ្នែក ខណៈដែលសាលានេះប្រើប្រាស់ធនធាន ថវិការបស់រដ្ឋ ធនធានមនុស្សរបស់រដ្ឋ ហេដ្ឋារចនាសម្ព័ន្ធដែលរដ្ឋវិនិយោគ។
យ៉ាងណាក៏ដោយ បើតាមប្រសាសន៍របស់សម្តេចធិបតីនាយករដ្ឋមន្រ្តី ការអនុវត្តការផ្អាកមជ្ឈមណ្ឌលសិក្សាទំនើបទាំង១៨សាលានេះ ក៏មានភាពបត់បែន ដោយសម្តេចបានផ្តល់ជាគោលការណ៍រួចហើយ ក្នុងនោះមជ្ឈមណ្ឌលសិក្សាទំនើបចំនួន១០ ដែលបានចាប់ផ្តើមនៅឆ្នាំនេះ នឹងអនុញ្ញាតឱ្យបន្តរហូតដល់ចប់ឆ្នាំ, ចំពោះសាលាដែលបានអនុវត្តប៉ុន្មានឆ្នាំហើយ ក្រសួងអប់រំនឹងចរចាដើម្បីរកដំណោះស្រាយកាត់បន្ថយពេលវេលា ហើយឈានទៅដល់ការគិតគូរប្រគល់មកឱ្យរដ្ឋរ៉ាប់រងវិញ។
ជាថ្មីម្តងទៀត សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានបញ្ជាក់ថា សាលារៀនជំនាន់ថ្មី គឺមិនមានការបិទទេ ដោយបន្តថែរក្សាអ្វីដែលមាន និងឈានទៅរកការពង្រីកបន្ថែមទៀត ទៅតាមលទ្ធភាព ប៉ុន្តែអ្វីដែលបញ្ឈប់ចំពោះសាលារៀនជំនាន់ថ្មី គឺពីមុនឪពុកម្តាយមានកាតព្វកិច្ចក្នុងការបង់លុយទៅសាលានេះ ឥឡូវបញ្ឈប់ការបង់លុយជាកាតព្វកិច្ច ហើយរដ្ឋរ៉ាប់រង តែឪពុកម្តាយគឺមានសិទ្ធិចូលដោយស្ម័គ្រចិត្ត, ជាមួយគ្នានេះ រាជរដ្ឋាភិបាលនឹងធ្វើការពង្រឹងគ្រប់សាលាទាំងអស់ ដើម្បីឈានទៅមានស្តង់ដារមួយកាន់តែទំនើបទៅថ្ងៃមុខ តាមរយៈការពង្រឹងថ្នាក់បឋមសិក្សាឡើងទៅ ។ ដោយឡែកការផ្អាកមជ្ឈមណ្ឌលសិក្សាទំនើប គឺរាជរដ្ឋាភិបាលបានដាក់អភិក្រម មិនឱ្យមានការពង្រីកថ្មី ហើយខិតខំដោះស្រាយនៅក្នុងអភិក្រម ដើម្បីឈានទៅដល់ការពន្លត់នៅក្នុងរយៈពេលណាមួយដែលអាចទទួលយកបាន ដែលអាចផ្តល់នូវប្រយោជន៍ជូនសិស្ស ជូនលោកគ្រូអ្នកគ្រូ ក៏ដូចជាមាតាបិតាសិស្ស៕
