ក្រសួងការងារ និង​បណ្តុះបណ្តាលវិជ្ជាជីវៈ កម្ពុជា និងទីភ្នាក់ងារសហប្រតិបត្តិការ​អន្តរជាតិកូរ៉េ (KOICA) នឹងរួមគ្នាជួយ​លើក​កម្ពស់ជំនាញដល់យុវជន​កម្ពុជា តាមរយៈការ​អនុវត្តគម្រោង អភិវឌ្ឍកម្លាំងពលកម្ម​ជំនាញ ដើម្បីឆ្លើយតប​ទៅនឹង​តម្រូវការឧស្សាហកម្ម​ ឆ្នាំ២០២៦-២០៣០។

ក្នុងជំនួបកាលពីថ្ងៃសុក្រ ជាមួយ​លោកស្រី ឆយ ម៉ូនជុង (CHOI Moon Jung) នាយិកា ទីភ្នាក់ងារ​ KOICA ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ បានគូសបញ្ជាក់​ពីសារៈសំខាន់ នៃការ​ពង្រីក​កិច្ច​សហប្រតិបត្តិការរវាងក្រសួងការងារ និង​ទីភ្នាក់ងារ KOICA ដែលនាំ​មក​នូវ​អត្ថប្រយោជន៍​យ៉ាងច្រើន ជាពិសេស ការ​គាំទ្រ​ដល់ការលើក​កម្ពស់​កម្លាំងពលកម្ម​កម្ពុជា ឱ្យ​ក្លាយ​ជា​កម្លាំងពលកម្មមានជំនាញច្បាស់លាស់ ដែលជាទិសដៅ​អាទិភាពមួយរបស់រាជរដ្ឋាភិបាលកម្ពុជា។

រដ្ឋមន្រ្តីក្រសួងការងារបានសង្កត់ធ្ងន់ថា តាមរយៈការអនុវត្តគម្រោងនេះ កម្ពុជាសង្ឃឹមថា នឹងអាចបង្កើតកម្លាំងពលកម្មជំនាញកាន់តែច្រើនលើជំនាញមេកានិកឧស្សាហកម្ម ផ្សាអគ្គិសនី និងសំណង់ ដែលឆ្លើយតបនឹងលក្ខខណ្ឌ និងតម្រូវការទីផ្សារការងាររបស់សាធារណរដ្ឋកូរ៉េ។

លោកស្រី ឆយ ម៉ូន ជុង នាយិកាទីភ្នាក់ងារ​ KOICA ប្រចាំកម្ពុជា បានបង្ហាញការពេញចិត្តចំពោះការពង្រីកកិច្ចសហប្រតិបត្តិការដែលមានគោលដៅរួម គឺធានាឱ្យនិស្សិតកម្ពុជាអាចបង្កើនជំនាញវិជ្ជាជីវៈបានយ៉ាងពេញលេញទាំងចំណេះដឹងផ្នែកទ្រឹស្តី និងការអនុវត្តជាក់ស្តែងនៅសាលា។ លោកស្រីថា គម្រោងនេះ មិនត្រឹមតែផ្តល់ការបណ្តុះបណ្តាលនិស្សិតប៉ុណ្ណោះទេ ប៉ុន្តែថែមទាំងភ្ជាប់ពួកគេទៅនឹងឱកាសការងារនៅក្រៅប្រទេស ព្រោះថាគម្រោងនេះក៏នឹងផ្តល់នូវបទពិសោធកម្រិតស្តង់ដាឧស្សាហកម្មសកលទៀតផង។

យោង​តាមទិន្នន័យរបស់ក្រសួងការងារ និង​បណ្តុះបណ្តាលវិជ្ជាជីវៈ ចាប់តាំងពីឆ្នាំ២០០៧ មក​ដល់បច្ចុប្បន្ន​នេះ កម្ពុជា​បាន​បញ្ជូន​ពលករខ្មែរ​ទៅធ្វើការនៅប្រទេសកូរ៉េ​ប្រមាណជាង ១០ម៉ឺននាក់ហើយ។ ការងារភាគច្រើនរបស់ពលករកម្ពុជាធ្វើ មាននៅក្នុងវិស័យ​ឧស្សាហកម្ម កសិកម្ម សំណង់ និង​វិស័យសេវាកម្ម​ជាដើម៕